ފުލުހުންނަށްދޭ އެލަވެންސްތައް ބޮޑުކުރިއިރު، ސިވިލް ސާރވިސް މުވައްޒިފުނަށްވެސް އެލަވެންތައް ހަމަޖައްސައިދިނުމަށް ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒް ގޮވާލައްވައިފި އެވެ.
ރިޔާޒް އެގޮތަށް ގޮވާލެއްވީ، ފުލުހުންނަށް ދޭ އެލަވެންސްތަކަށް ބޮޑެތި ބަދަލުތަކެއް ގެނެސް، ފުލުހުންނަށް ލިވިންގ އެލަވެންސް ދިނުމަށް ނިންމި ނިންމާ ގުޅިގެން ކުރެއްވި ޓުވީޓެއްގަ އެވެ.
ރިޔާޒްގެ ޓްވީޓުގައި އޭނާ ވިދާޅުވެފައިވަނީ، ފުލުހުންގެ އެލަވަންސްތައް އިތުރުކުރާގޮތަށް ހަމަޖެއްސުމުން އެކަމަށް މަރުހަބާ ކިޔާކަމަށެވެ. އެއާއެކު ދިހަ ހާސް ރުފިޔާއަށްވުރެ މަދުން މުސާރަ ލިބޭ ސިވިލް ސާރވިސްގެ މުވައްޒިފުންނަށްވެސް އެލަވެންސްތައް ހަމަޖައްސައިދޭންޖެހޭކަމަށް އޭނާ ވިދާޅުވެފައިވެއެވެ.
Fuluhunnah allowance ithurukuraagothah hamajessumun maruhabaa. Civil Servicegai Mvr10k ahvure madhunlibey staffs ahves allowance eh dhehvaa! https://t.co/CVROiutsTi
— Abdulla Riyaz MP (@riyazabdulla) January 11, 2017
ފުލުހުންގެ ބައެއް އިސް އޮފިޝަލުންނާ ހަވާލާދީ ބައެއް މީޑިއާ ތަކުގައި ބުނެފައިވަނީ ފުލުހުންގެ ވެލްފެއާގެ ކަންކަން ރަނގަޅު ކުރުމުގެ ގޮތުން ބައެއް ފުލުހުންނަށް ލިބޭ އެލަވަންސްތަކަށް ބަދަލުތަކެއް ގެނެސްފައިވާ ކަމަށެވެ. އެގޮތުން މައިގަނޑު ގޮތެއްގައި އެލަވަންސްތައް ބޮޑުކޮށްފައިވަނީ ފީލްޑަށް ނުވަތަ މަގުމައްޗަށް ނިކުމެ މަސައްކަތް ކުރާ ފުލުހުންނަށް ލިބޭ އެލަވަންސްތަކެވެ. މީގެއިތުރުން ފުލުހުންގެ ތެރޭގައި ފަންނީ ބައެއް މަސައްކަތްތައް ކުރާ ފުލުހުންގެ އެލަވަންސްތަކާއި ތަހުގީގު ކުރުމުގައި ހަރަކާތްތެރިވާ ފުލުހުންގެ އެލަވަންސްތަކަށް ވެސް ބަދަލުތަކެއް ގެނެސްފައިވެ އެވެ. އޭގެއިތުރުން ހުރިހާ ފުލުހުންނަށް ލިވިންގ އެލަވެންސް ދިނުމަށްވެސް ނިންމާފައިވާކަމަށް މީޑިއާތަކުގައި ރިޕޯޓްކޮށްފައިވެއެވެ.
ފުލުހުންގެ މުސާރައިގެ އޮނިގަނޑަށް ބަދަލު ގެނެސްފައިމިވަނީ ލޯކަލް ކައުންސިލް އިންތިހާބަށް ތައްޔާރުވަމުންދާ ދަނޑިވަޅެއްގައެވެ.
