އިދިކޮޅު ފަރާތްތަކުގެ ފާޑު ކިޔުމަށް ފަރުވާލެއް ނެތް: އަބްދުއް ރަހީމް އަބްދުﷲ
ބޮޑު ޕާޓީއެއްގެ ތެރޭގައި ހަމަނުޖެހުން އޮންނާނެ
އަބްދުއް ރަހީމު އަބްދުﷲ
ޕީޕީއެމް ބޮޑުވަމުންދާ ވަރަކަށް ޚީޔާލު ތަފާތުވުން އޮންނާނެ ކަމަށާއި ސިޔާސީ މައިދާނުގައި ގޮންޖެހުންތައް ގިރާކޮށް ކުރިއަށް ދެވެންޖެހޭނެ ކަމަށް ޕީޕީއެމްގެ ނައިބު ރައީސް ފޮނަދޫ ދައިރާގެ މަޖިލީސް މެމްބަރު އަބްދުއްރަހީމް އަބްދުﷲ ވިދާޅުވެއްޖެ އެވެ.
ބުރާސްފަތި ދުވަހުގެ ރޭ ޕީޕީއެމް އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަބްދުއްރަހީމް ވިދާޅުވީ ޕާޓީގެ ތެރޭގައި ޚިޔާލު ތަފާތުވުންތަކާ ވެސް ކުރިމަތިލާން ޖެހޭނެ ކަމަށާއި އެއީ އެއްވެސް ހާލެއްގައި މައްސަލައެއް ނޫން ކަމަށެވެ. ގިނަ ބަޔަކު އެކީގައި މަސައްކަތް ކުރާ އިރު ދިމާވާ އެފަދަ މައްސަކަތަކަކީ ހައްލު ކުރެވެންޖެހޭ މައްސަލަތަކެއް ކަަމަށް އޭނާ ވިދާޅުވި އެވެ.
ޕީޕީއެމް އިން ހޯދާފައިވާ ކާމިޔާބީތައް ފާހަގަކުރައްވާ، އަބްދުއްރަހީމް ވިދާޅުވީ، އެޕާޓީގެ ވެރިކަމުގައި އެހެން އެއްވެސް ސަރުކާރުން ގެނެސް ނުދޭ މިންވަރަށް ތަރައްގީ ގެނެސްދީފައިވާ ކަމަށެވެ. އެގޮތުން މިއީ އެޕާޓީއަށް ލިބުނު އެންމެ ބޮޑު ކާމިޔާބީ ކަމަށް އޭނާ ވިދާޅުވި އެވެ. އަބްދުއްރަހީމް ވިދާޅުވީ، އެހެން ޕާޓީތަކުން ކިޔާ ފާޑު ކިޔުންތަކަށް ރައްދު ދިނުމަކީ އޭނާ ގަބޫލުކުރާ ކަމެއް ނޫން ކަމަށާއި އޭގެ ބަދަލުގައި ޕީޕީއެމް އިން މަސައްކަތްކުރަނީ ރައްޔިތުންނަށް ބޭނުންވާ ކުރިއެރުމާއި ފާގަތިކަން ގެނެސްދިނުމަށް ކަމަށެވެ.
ޕީޕީއެމް އަބަދުވެސް މަސައްކަތް ކުރާނީ ޕީޕީއެމްގެ މޮޓޯ ކަމުގައިވާ އެންމެ ފުރަތަމަ ގައުމުގެ ޝިއާރުގެ ދަށުން ކަމަށް ވެސް އޭނާ ވިދާޅުވި އެވެ.
"އަޅުގަނޑުމެން ޕާޓީގެ މަގްސަދަކީ މިޕާޓީގެ ސަރުކާރު، ރައީސް ޔާމީންގެ ވެރިކަމަކީ ރައްޔިތުންނަށް ލާބަޔާއި މަންފާ ލިބޭނެ ޕާޓީ އަކަށް ހެދުން، ދިވެހިރާއްޖެއަށް ކުރިއެރުމާއި ތަރައްގީ ލިިބިގެންދިޔުން، ރާއްޖެއަކީ ހިންހަމަޖެހިގެން ރައްޔިތުންނަށް އުޅެވޭނެ ތަނަކަށް ހެދުން" އަބްދުއްރަހީމް ވިދާޅުވި އެވެ.
ޕީޕީއެމް އަށް ތާއީދެއް ނެތް ކަމަށް ބުނެ ބައެއް ފަރާތްތަކުން ވާހަކަ ދައްކާއިރު ޕީޕީއެމްއަކީ މިއަދު ރާއްޖޭގައި އޮތް އެންމެ ބޮޑު ޕާޓީ ކަމަށް އޭނާ ވިދާޅުވި އެވެ.
ރައީސް ޔާމީނަށް ފުރިހަމަ ތާއީދު އޮތް ކަމަށާއި ދެން އޮތް ރިޔާސީ އިންތިހާބުގައިވެސް އެކަން ފެނިގެންދާނެ ކަމުގެ ޔަގީންކަން އެބައޮތް ކަމަށް އޭނާ ވިދާޅުވި އެވެ.
