ހާލަންޑް ހޯދަން ޗެލްސީން މަސައްކަތްކުރޭ: ޓުޗެލް

ޖަރުމަނުގެ ބޮރޫޝިއާ ޑޯޓުމުންޑަށް ކުޅެމުން އަންނަ ނޯވޭގެ ޒުވާން ތަރި އާލިއަން ބްރައުޓް ހާލަންޑް ގަތުމަށް ޗެލްސީން މަސައްކަތްކުރަމުން އަންނަ ކަމަށް އެ ޓީމުގެ ކޯޗު ތޯމަސް ޓުޗެލް އެއްބަސްވެއްޖެއެވެ.

ރިޕޯޓުތައް ބުނާ ގޮތުން ޗެލްސީ އޮތީ އުމުރުން 21 އަހަރުގެ ހާލަންޑް ހޯދުމަށް 150 މިލިޔަން ޕައުންޓް ޚަރަދުކުރުމަށް ތައްޔާރަށެވެ. އެގޮތުން ހާލަންޑް ގަތުމަށް ޗެލްސީން އޭނާގެ އޭޖެންޓާ ވާހަކަ ދައްކާފައިވާ ކަމަށާއި، މިހާރު ޗެލްސީން ކުރަމުން އަންނަ މަސައްކަތަކީ ޑޯޓުމުންޑުގެ ވެރިންނާ ވާހަކަ ދެއްކުން ކަމަށްވެސް ރިޕޯޓުތައް ބުނެއެވެ.

ދާދި ފަހުން ދިން އިންޓަވިއުއެއްގައި ޓުޗެލް ބުނީ ކުރިއަށް އޮތް ޓްރާންސްފާ ބާޒާރުގައި ހާލަންޑުގެ ސޮއި ހޯދުން އެއީ ޗެލްސީގެ އަމާޒެއް ކަމަށާއި، އެގޮތުން ހާލަންޑް ގަތުމަށް ޑޯޓުމުންޑާ ވާހަކަ ދައްކަމުން އަންނަ ކަމަށެވެ. އަދި ހާލަންޑަކީ ޗެލްސީގެ ގޭމް ޕްލޭނަށް ފައްކާވެފައިވާ ކުޅުންތެރިއެއް ކަމަށާއި، އެހެންކަމުން ޔުއެފާ ޗެމްޕިއަންސް ލީގު ދިފާއުކުރަން ހާލަންޑަކީ ޗެލްސީއަށް މުހިންމު ކުޅުންތެރިއަކަށްވާނެ ކަމަށްވެސް ވަނީ ބުނެފައެވެ.

ރިޕޯޓުތައް ބުނާ ގޮތުން ޗެލްސީގެ އިތުރުން ޔޫރަޕުގެ ބޮޑެތި ބާރުތަކުން އަންނަނީ ހާލަންޑުގެ ސޮއި ހޯދުމަށް މަސައްކަތްކުރަމުންނެވެ. އޭގެ ތެރޭގައި ސްޕެއިނުގެ ގަދަ ބާރު ރެއާލް މެޑްރިޑާއި، ފްރާންސްގެ ޕީއެސްޖީއާ، އިންގްލެންޑުގެ މެންޗެސްޓާ ޔުނައިޓެޑުގެ އިތުރުން މެންޗެސްޓާ ސިޓީވެސް ހިމެނޭ ކަމަށް ރިޕޯޓުތައް ބުނެއެވެ.

މިދިޔަ އަހަރުގެ ޖެނުއަރީ މަހު އާރްބީ ސާލްޒްބާގް ދޫކޮށް ހާލަންޑް ޑޯޓްމުންޑަށް ބަދަލުވީ ހަތަރު އަހަރާ ބައިގެ އެއްބަސްވުމެއްގެ ދަށުން، 20 މިލިޔަން ޔޫރޯއަށެވެ. އެހެންކަމުން ހާލަންޑް މިހާރު ހަދާފައިވާ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުއެވެ.

ޑޯޓްމުންޑާއެކު ހާލަންޑް ތަފާތު މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް އެ ޓީމަށް ކުޅެދިން 69 މެޗުގައި 70 ލަނޑު ކާމިޔާބުކޮށްފައެވެ. އަދި ވަނީ ޑޯޓްމުންޑާއެކު މިދިޔަ ސީޒަނުގެ ޖަރުމަން ކަޕް ކާމިޔާބުކޮށްފައެވެ.