މާޒިޔާ އަތުން މަދުވެގެން ޕޮއިންޓެއް ހޯދަން މަސައްކަތްކުރާނީ، ދުލެއް ނުދޭނަން: ސޮބާ

މާލޭ ލީގުގައި މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށް ކުޅޭ މެޗުގައި މަދުވެގެން ޕޮއިންޓެއް ހޯދަން މަސައްކަތްކުރާނެ ކަމަށާއި، ދުލެއް ނުދޭނެ ކަމަށް ކްލަބް ގްރީން ސްޓްރީޓުގެ ކޯޗު ޞަބާހު މުހައްމަދު ބުނެފި އެވެ.

މެޗު ފެށުމުގެ ކުރިން ނޫސްވެރިންނަށް މައުލޫމާތު ދެމުން ސޮބާ ބުނީ މާޒިޔާ މި ސީޒަނާ ކުރިމަތިލީ ވަރަށް ބޮޑަށް ތައްޔާރުވެގެން ކަމަށާއި، އެގޮތުން އެ ޓީމު ފެންނަނީ ވަރަށް އޯގަނައިޒްކޮށް ކަމަށެވެ.

ސޮބާ ބުނީ މިވަގުތު އޭނާއަށް އެންމެ އުނދަގުލީ މާޒިޔާއާ ދެކޮޅަށް ކުޅެން ކަމަށާއި، އެހެންނަމަވެސް އެ މެޗަށް ވެސް ނިކުންނާނީ އެއްވެސް ދުލެއް ދިނުމުގެ ބަދަލުގައި މަދުވެގެން ޕޮއިންޓެއް ވެސް އަތުލުމުގެ އަޒުމުގައި ކަމަށެވެ.

އެގޮތުން ސޮބާ ބުނީ މާޒިޔާ އަތުން ޕޮއިންޓެއް ލިބުމަކީ ލީގުގައި ކުރިޔަށްދާން ލިބޭ ވަރަށް ބޮޑު އެއްޗަކަށް ވާނެ ކަމަށެވެ. އެގޮތުން ސޮބާ ބުނީ އެންމެ ފަހުވަގުތާ ޖެހެންދެން ވެސް ކުރަމުން އަންނަ އުންމީދު ކަނޑާ ނުލާނެ ކަމަށެވެ.

މީގެއިތުރުން އޭނާ ބުނީ މެޗުގެ ފުރަތަމަ މިނެޓުން ފަހު މިނެޓާ ހަމައަށް މަސައްކަތްކުރާނެ ކަމަށާއި، ވިކްޓްރީއާ ދެކޮޅަށް ކުޅުނު މެޗުން ވެސް މޮޅުވީ ކުޅުންތެރިން ދެއްކި މޮޅު ކުޅުމުން ކަމަށެވެ. އެގޮތުން އެ ކުޅުން ތަކުރާރުވުމަށް އެދޭ ކަމަށް ވެސް އޭނާ ވަނީ ބުނެފައެވެ.

ގްރީން ސްޓްރީޓް ވަނީ އެ ޓީމު ކުޅުނު ފުރަތަމަ މެޗުން ވިކްޓްރީ އަތުން 0-1 ގެ ނަތީޖާއިން މޮޅުވެފަ އެވެ. ދެވަނަ މެޗުން އެ ޓީމު ވަނީ ވެލެންސިއާ އަތުން 1-1 ގެ ނަތީޖާއިން އެއްވަރުވެފައެވެ. މާޒިޔާ ލީގުގައި ކުޅުނު ފުރަތަމަ މެޗުން 0-1 ގެ ނަތީޖާއިން ވަނީ އީގަލްސް ބަލިކޮށްފައެވެ.