ރާއްޖެ ވާދަކުރާ ފޯ ނޭޝަންސް ކަޕް އަންނަ މަހު

ސްރީ ލަންކާގައި ކުރިއަށް ގެންދަން ނިންމާފައިވާ ފޯ ނޭޝަންސް ކަޕް އަންނަ ނޮވެމްބަރު މަހު ބޭއްވުމަށް ތާވަލުކޮށްފިއެވެ.

ލަންކާ ފުޓްބޯޅަ ފެޑެރޭޝަނުން އިންތިޒާމުކުރާ މި މުބާރާތުގައި ބައިވެރިވާނެކަން މި އަހަރުގެ ޖުލައި މަހުގެ ތެރޭގައި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވަނީ ހާމަކުރައްވާފައެވެ. އެ ފަހަރު ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ މި މުބާރާތުގައި ކުޅެވޭ މެޗުތައް ވެގެންދާނީ ބައިނަލްއަގުވާމީ އެކުވެރިކަމުގެ މެޗުތަކަކަށް ކަމަށެވެ. އެހެންކަމުން މި މެޗުތަކާއެކު ފީފާ ރޭންކިންގައި ކުރިއަށް ޖެހިލުމުގެ ފުރުސަތު ރާއްޖެއަށް އޮންނާނެ ކަމަށާއި، އަދި މި މެޗުތައް ވެގެންދާނީ ގައުމީ ޓީމަށް ރަނގަޅު ތަމްރީނުތަކެއް ހެދުމަށް ލިބިގެންދާ މެޗުތަކަކަށް ކަމަށްވެސް ވިދާޅުވިއެވެ.

ހަތަރު ގައުމު މި މުބާރާތުގައި ވާދަކުރާއިރު، އެ ގައުމުތަކަކީ ރާއްޖެ އާއި ލަންކާގެ އިތުރުން ބަންގްލަދޭޝް އާއި ސީޝެލްސްއެވެ. އަންނަ މަހުގެ އަށްވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް މުބާރާތް ބާއްވާއިރު، ރާއްޖޭން ކުޅޭ ފުރަތަމަ މެޗުގައި އަށްވަނަ ދުވަހުގެރޭ ނުކުންނާނީ ލަންކާއާ ދެކޮޅަށެވެ. އަދި އޭގެ ފަހުން 11 ވަނަ ދުވަހު ހަވީރު ބަންގްލަދޭޝްއާ ދެކޮޅަށް ނުކުންނައިރު، ލީގު ބުރުގެ ފަހު މެޗުގައި ސީޝެލްސްއާ ކުޅޭނީ 14 ވަނަ ދުވަހެވެ.

ލަންކާގައި ބާއްވާ ފޯ ނޭޝަންސް ކަޕުގައި ރާއްޖެއިން ލަންކާ އާއި ބަންގްލަދޭޝްއާ ދެކޮޅަށް ނުކުންނައިރު، މިހާރު މާލޭގައި ކުރިއަށްދާ ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގައި ރާއްޖެ ވަނީ އެ ދެ ގައުމާ ދެކޮޅަށް ކުޅެފައެވެ. އެގޮތުން ބަންގްލަދޭޝް އަތުން 2-1 ގެ ނަތީޖާއަކުން ރާއްޖެ މޮޅުވިއިރު، ލަންކާ އަތުން މޮޅުވީ 1-0 ގެ ނަތީޖާއަކުންނެވެ.

މި ފަހަރުގެ ސާފް ޗެމްޕިއަންޝިޕަށް ރާއްޖޭގެ ކޯޗަކަށް ހަމަޖެއްސީ ރާއްޖޭގެ އެންމެ ކާމިޔާބު ކޯޗު އަލީ ސުޒޭނެވެ. އެކަމަކު ސާފް ޗެމްޕިއަންޝިޕަށްފަހު ގައުމީ ޓީމަށް ބިދޭސީ އައު ކޯޗެއް ހަމަޖައްސާނެކަމަށް އެފްއޭއެމުގެ ރައީސް ބައްސާމް އަދީލް ޖަލީލް މީގެ ކުރިން ވަނީ ވިދާޅުވެފައެެވެ.

އަންނަ މަހު ލަންކާގައި ބާއްވާ މުބާރާތެއްގައި ރާއްޖެ ވާދަކުރަން ނިންމިއިރު، ރާއްޖޭގެ އަމާޒަކީ 2023 ވަނަ އަހަރުގެ އޭޝިއަން ކަޕަށް ކޮލިފައިވުން ކަމަށްވެސް ބައްސާމް ވަނީ ވިދާޅުވެފައެވެ. އެގޮތުން ކޮލިފައިންގެ ފައިނަލް ބުރުގެ މެޗުތައް އަންނަ އަހަރުގެ ފެބްރުއަރީ މަހު ކުޅޭއިރު، އެ މެޗުތަކަށް ތައްޔާރުވުމަށް ގައުމީ ޓީމަށް ގިނަ މެޗުތަކެއް ބޭނުންވާ ކަމަށްވެސް ވިދާޅުވިއެވެ.

އެކަމަކު ގައުމީ ޓީމުން އެންމެ ފަހުން ބައިނަލްއަގުވާމީ އެކުވެރިކަމުގެ މެޗެއް ކުޅެފައިވަނީ 2018 ވަނަ އަހަރުގެ ނޮވެމްބަރު މަހުގެ ތެރޭގައެވެ. އެ ފަހަރު މެލޭޝިއާއާ ދެކޮޅަށް ރާއްޖެ ނުކުތްއިރު، އެ މެޗުން ރާއްޖެ ވަނީ 3-0 ގެ ނަތީޖާއަކުން ބަލިވެފައެވެ.