މިހާރު ރާއްޖޭގައި ކުރިޔަށްދާ އުރީދޫ ސާފް ޗެމްޕިއަންޝިޕް 2021 ގައި އިންޑިއާ އަތުން ބަލިވެ، ރާއްޖެ މުބާރާތާއި ވަކިވުމުގައި ކޯޗުގެ އަދި ކުޅުންތެރިންގެ މައްސަލައެއް ނެތް ކަމަށް ކުރީގެ މަޝްހޫރު ގޯލްކީޕަރު އަދި ސްޕޯޓްސް ކޯޕަރޭޝަނުގެ މެނޭޖިންގ ޑިރެކްޓަރ މައުރޫފް އަހުމަދު (މާއްޓޭ) ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަމުން މާއްޓޭ ވިދާޅުވީ، ރާއްޖޭން ފުޓުބޯޅަ މިހާރު ކުޅެނީ އެލީޓް ލެވަލްގައި ކަމަށާއި، އެހެންކަމުން ފުޓުބޯޅައިގެ ޒަމާންވީ ސަގާފަތް އެލީޓް ލެވަލްއަށް ބަދަލުވާން ޖެހޭ ކަމަށެވެ.

މާއްޓޭ ވިދާޅުވީ އިންޑިއާ ބަލިކުރެވޭނެ ފެންވަރު ރާއްޖޭގެ ޓީމުގައި އެބަހުރި ކަމަށާއި، އެކަމަކު ފުޓުބޯޅައިގެ އިންފްރާސްޓަކްޗަރ އަދިވެސް ރަނގަޅު ކުރަން ޖެހޭ ކަމަށެވެ. ނެޝަނަލް ލެވެލްގައި މީގެ ކުރިންވެސް އިންޑިއާ ފަދަ ގައުމުތަކާ ބަދަލުކޮށް ރާއްޖެއިން ކާމިޔާބު ހޯދާފައިވާ ކަމަށެވެ.

މާއްޓޭ ވިދާޅުވީ ބުދަ ދުވަހުގެރޭ ކުޅުނު މެޗުން ފެނިގެންދިޔައީ ރާއްޖޭގެ ކުޅުންތެރިން ބިރު ގަނެފައިވާ މަންޒަރު ކަމަށާއި، ބައެއް ސީނިއާ ކުޅުންތެރިންގެ ފަރާތުންވެސް ގޯސް ހެދުނުތަން ފެނުނު ކަމަށެވެ.

ބުދަ ދުވަހުގެރޭ މި ފަހަރުގެ ސާފް ޗެމްޕިއަންޝިޕުގެ ލީގު ބުރުގެ ކުޅުން ނިމުނުއިރު، އެއްވަނައިގައި އޮތީ އިންޑިއާއެވެ. އެ ޓީމަށް ކުޅުނު ހަތަރު މެޗުން އަށް ޕޮއިންޓް ލިބުނުއިރު، ދެވަނައިގައި އޮތް ނޭޕާލަށް ހަތަރު މެޗުން ލިބުނީ ހަތް ޕޮއިންޓެވެ. އަދި ރާއްޖެއަށް ތިންވަނަ ލިބުނުއިރު، ކުޅުނު ހަތަރު މެޗުން ރާއްޖެއަށް ލިބިފައިވަނީ ހަ ޕޮއިންޓެވެ. އަދި ހަތަރުވަނައިގައި އޮތް ބަންގްލަދޭޝަށް ހަތަރު މެޗުން ފަސް ޕޮއިންޓް ލިބުނުއިރު، ފުލުގައި އޮތް ސްރީ ލަންކާއަށް ހަތަރު މެޗުން ލިބިފައިވަނީ އެންމެ ޕޮއިންޓެކެވެ.