ލަންކާ މެޗަކީ ޗެލެންޖެއް، ފަސޭހައެއް ނުވާނެ: ސުޒޭން

މި ފަހަރުގެ "އުރީދޫ ސާފް ޗެމްޕިއަންޝިޕް 2021" ގައި ސްރީ ލަންކާއާ ދެކޮޅަށް ރާއްޖޭން ކުޅޭ މެޗު ފަސޭހައެއް ނުވާނެ ކަމަށާއި، އެ މެޗަކީ ޗެލެންޖެއް ކަމަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނެފިއެވެ.

ލަންކާއާ ދެކޮޅަށް ރާއްޖެ ނުކުންނައިރު، މުބާރާތުގައި އެންމެ ފަހު ކުޅުނު މެޗުގައި ބަންގްލަދޭޝް އަތުން 2-0 ގެ ނަތީޖާއަކުން މޮޅުވެ، ރާއްޖެ ވަނީ ފައިނަލުގެ އުއްމީދު އާކޮށްފައެވެ. މި މުބާރާތުގައި ކުޅުނު ފުރަތަމަ މެޗުން ރާއްޖެ ބަލިވީ ނޭޕާލް އަތުން 1-0 ގެ ނަތީޖާއަކުންނެވެ.

އާދީއްތަ ދުވަހުގެ ހަވީރު ލަންކާއާ ދެކޮޅަށް ނުކުތުމުގެ ކުރިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒޭން ބުނީ އެންމެ ފަހުން ބަންގްލަދޭޝްއާ ދެކޮޅަށް ކުޅުނު މެޗަށްފަހު ބޮޑަށް ކުރިއަށް ދިޔައީ ރިކަވަރީ ބައި ކަމަށެވެ. އަދި ބަންގްލަދޭޝް މެޗުގައި ކަންތައްތައް ރަނގަޅަށް ދިޔުމުން ކުޅުންތެރިން ތިބީ އިތުރު މޯޓިވޭޝަނެއްގައި ކަމަށެވެ.

މިހާތަނަށް މި މުބާރާތުގައި ރާއްޖޭން ދެ މެޗުވެސް ކުޅެފައިވަނީ ރޭގަނޑެވެ. އަދި ރާއްޖެ އެންމެ ފަހުން ކުޅުނު މެޗުގައި އަނިޔާގެ މައްސަލަތަކެއް ދިމާވެ، ދެ މިޑްފީލްޑަރުން ކަމަށްވާ އައްސަދު އަލީ (އަޑުބަރޭ) އާއި ހުސެއިން ނިހާން (ނިހާޓް) ވަނީ ބަދަލުކޮށްފަ އެވެ. ސުޒޭން ބުނީ ކުރިއަށް އޮތް ލަންކާ މެޗަކީ ހަވީރު ކުޅޭ މެޗެއް ކަމުން ޓީމުން ކޮންމެސް ވަރެއްގެ ބަދަލުތަކެއް އަންނާނެ ކަމަށެވެ. އެކަމަކު އަނިޔާގެ މައްސަލައަކާ ގުޅިގެން މި މެޗުގައި ބޭނުން ނުކުރެވޭނެ އެއްވެސް ކުޅުންތެރިއެއް ނެތް ކަމަށްވެސް ވަނީ ބުނެފައެވެ.

ރާއްޖެއާ ދެކޮޅަށް ލަންކާއިން ނުކުންނައިރު، އެ ޓީމު މިހާރު ވަނީ މި މުބާރާތުން ކަޓާފައެވެ. އެގޮތުން މިހާތަނަށް ކުޅުނު ތިން މެޗުގެ ތެރެއިން ދެ މެޗުން ބަލިވިއިރު، އެ ޓީމަށް ލިބިފައިވަނީ އެންމެ ޕޮއިންޓެކެވެ. އެއާއެކު މި މުބާރާތުން ކެޓި ނަމަވެސް، އެންމެ ފަހުން ކުޅުނު މެޗުގައި ލަންކާއިން ވަނީ އިންޑިއާއާ އެއްވަރުކޮށްފައެވެ.

ސުޒޭން ބުނީ ލަންކާއާ ދެކޮޅަށް ކުޅުމަކީ އުނދަގޫ ޗެލެންޖެއް ކަމަށާއި، މި މުބާރާތުގައި ލަންކާ ޓީމުގެ ފަރާތުން ފެނިގެންދިޔައީ މަސައްކަތުގެ ރޭޓު ވަރަށް މަތިކޮށް ކަމަށެވެ. އަދި އެ ޓީމުގެ ޑިފެންސް ވަރަށް އޯގަނައިޒް ކަމަށްވެސް ސުޒޭން ވަނީ ބުނެފައެވެ.

މި ފަހަރުގެ މުބާރާތުގައި ރާއްޖެ އާއި ލަންކާ ބައްދަލުކުރާއިރު، މީގެ ކުރިން 2018 ވަނަ އަހަރުގެ ސާފް ޗެމްޕިއަންޝިޕުގައި ރާއްޖެ އާއި ލަންކާ ބައްދަލުކުރި މެޗު ނިމުނީ ލަނޑެއް ނުޖެހި އެއްވަރުވެގެންނެވެ.

ސާފް ޗެމްޕިއަންޝިޕުގައި ރާއްޖެ އާއި ލަންކާ ބައްދަލުކުރާ މެޗު ފަށާނީ އާދީއްތަ ދުވަހުގެ ހަވީރު 16:00 ގައެވެ.