އިތުރު 1،000 ޓިކެޓު ސަޕޯޓަރުންނަށް ވިއްކަނީ

ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގައި އާދިއްތަ ދުވަހުގެ ހަވީރު ދިވެހިރާއްޖެ އާއި ސްރީ ލަންކާ ބައްދަލުކުރާ މެޗުގެ އިތުރު 1،000 ޓިކެޓު ސަޕޯޓަރުންނަށް ވިއްކުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

ރާއްޖެ އާއި ލަންކާ ބައްދަލުކުރާ މެޗުގެ ޓިކެޓު ހޮނިހިރު ދުވަހުގެ ހެނދުނު 10:00 ޖެހިއިރު ވިއްކަން ފެށިއިރު، އެތައް ސަތޭކަ ބަޔަކު ވަނީ ފަތިހުން ފެށިގެން ކިޔޫ ހަދާފައެވެ. ޖުމްލަ 4،800 ސަޕޯޓަރުންނަށް ދަނޑަށް ވަދެވޭއިރު، ރާއްޖެ އާއި ލަންކާ މެޗުގައި ވިއްކުމަށް މީގެ ކުރިން ނެރެފައިވަނީ ސިޑިބަރިން 1،200 ޓިކެޓެވެ. އެކަމަކު ގޮނޑި ބަރީގެ ޓިކެޓު ވިއްކަން ނެރިފައި ނުވަނީ ގައުމީ ޓީމުގެ ކުޅުންތެރިންގެ އާއިލާ އާއި، އެފްއޭއެމުގެ ސްޕޮންސަރުންނާއި އަދި ފުޓްބޯޅަ ކުލަބުތަކަށް ޓިކެޓު ވިއްކަން ޖެހޭތީ ކަމަަށް އެފްއޭއެމުން ވަނީ ބުނެފައެވެ.

މި މެޗުގެ ޓިކެޓު ލިބުން މަދުވުމާއެކު، ދިވެހި ސަޕޯޓަރުން ވަނީ ގައުމީ ފުޓްބޯޅަ ދަނޑު ކައިރީގައި މުޒާހަރާ ކޮށްފައެވެ. އެއާއެކު އެފްއޭއެމުން ނެރުނު ބަޔާނެއްގައި ބުނީ ރާއްޖެ އާއި ލަންކާ ބައްދަލުކުރާ މެޗުގެ ކުޅިބެލުމަށް ގައުމީ ޓީމުގެ ކުޅުންތެރިންގެ އާއިލާ އާއި، އެފްއޭއެމުގެ ސްޕޮންސަރުންނާއި އަދި ފުޓްބޯޅަ ކުލަބުތަކަށް ވިއްކުމަށް ހަމަޖައްސާފައިވާ 2،500 ޓިކެޓުގެ އިތުރުން ކުޅި ބެލުންތެރިންނަށް ވިއްކުމަށް ހަމަޖައްސާފައިވާ ހުރިހާ ޓިކެޓެއް މިހާރު ވިކި ހުސްވެފައިވާ ކަމަށެވެ. އެކަމަކު ރާއްޖެ ކުޅޭ މެޗުގެ ކުޅިބަލަން ދަނޑަށް ވަނުމަށް ގިނަ އަދަދެއްގެ ބަޔަކު އެދެމުންދާތީވެ އެކަމަށް ހައްލެއް ހޯދައިދިނުމަށް އެފްއޭއެމުން ނިންމާފައިވާ ކަމަށްވެސް ވަނީ ބުނެފައެވެ.

އެ ގޮތުން ސްޕޮންސަރުންނާއި، ކުލަބުތަކަށް އަދި ކުޅުންތެރިންގެ އާއިލާތަކަށް ވިއްކުމަށް ހަޖެހިފައިވާ ޓިކެޓުތަކުގެ ތެރެއިން އިތުރު 1،000 ޓިކެޓު ސަޕޯޓަރުންނަށް ވިއްކުމަށް ނިންމާފައިވާ ކަމަށާއި، މި 1،000 ޓިކެޓު ވިއްކަން ފަށާނީ މީހަކަށް ޓިކެޓެއްގެ މަގުން ހޮނިހިރު ދުވަހުގެރޭ 20:00 ގައި ޒުވާނުންގެ މަރުކަޒުން ކަމަށްވެސް ވަނީ ބުނެފައެވެ.

ޓިކެޓު މައްސަލައިގައި ދިވެހި ސަޕޯޓަރުން މުޒާހަރާކުރިއިރު، ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ގައުމީ ޓީމުގެ ކޯޗު އަލީ ސުޒޭން ބުނީ ދިވެހި ގައުމުގައި ފުޓްބޯޅައަށް އޮންނަ ލޯތްބަށް ބަލާއިރު 5،000 ޓިކެޓަކީ މަދު އަދަދެއް ކަމަށެވެ. އެކަމަކި މި ދަނޑިވަޅުގައި ހުރިހާ ސަޕޯޓަރުންވެސް ގައުމީ ޓީމުގެ ފަހަތުގައި ތިބެން ސުޒޭން ވަނީ އެދިފައެވެ.

ސާފް ޗެމްޕިއަންޝިޕަށް ގޮނޑި ބަރީގެ ޓިކެޓެއް އެފްއޭއެމުން ވިއްކާފައިވަނީ 100 ރުފިޔާއަށެވެ. އަދި ސިޑިބަރީގެ ޓިކެޓުގެ އަގަކީ 75 ރުފިޔާއެވެ. އެކަމަކު ރާއްޖޭގައި އަބަދުވެސް ގައުމީ ޓީމު ކުޅޭ މެޗުތަކަށް ޓިކެޓުގެ ޑިމާންޑް ބޮޑުވާއިރު، ކަޅު ބާޒާރުގައި އެތައް ބަޔަކު އަގު ބޮޑުކޮން ޓިކެޓު ވިއްކާކަމުގެ މައުލޫމާތު ވަނީ ލިބިފައެވެ. އެގޮތުން 1،000 ރުފިޔާއަށް ސިޑިބަރީގެ ޓިކެޓު ވިއްކާފައިވާ ކަމަށްވެސް ވަނީ މައުލޫމާތު ލިބިފައެވެ.

ޓިކެޓު މައްސަލައިގައި ދިވެހި ސަޕޯޓަރުން ގައުމީ ފުޓްބޯޅަ ދަނޑު ކައިރީގައި މުޒާހަރާކުރިއިރު، މި މުބާރާތުގެ އިތުރުން 2008 ވަނަ އަހަރުގެ ސާފް ޗެމްޕިއަންޝިޕާއި، 2014 ވަނަ އަހަރުގެ އޭއެފްސީ ޗެލެންޖް ކަޕް ބޭއްވިއިރު ޓިކެޓުތަކުގެ ޑިމާންޑް ބޮޑުވެ، އެތައް ބަޔެއްގެ ނުރުހުން އެފްއޭއެމަށް އަމާޒުވެ، އެފްއޭއެމް ދޮށުގައި އެ ފަހަރުވެސް ވަނީ މުޒާހަރާ ކޮށްފައެވެ.