އެމްއެންޕީގެ އަންހެނުންގެ ގޮފީގެ ރައީސަކަށް ދުންޔާ
ޒުވާނުންގެ ވިންގުގެ ލީޑަރަކީ އުމެއިރު އަހުމަދު
ދުންޔާ މައުމޫން - އެމްއެންޕީގެ އަންހެނުންގެ ގޮފީގެ ރައީސް
މޯލްޑިވްސް ނޭޝަނަލް ޕާޓީ (އެމްއެންޕީ)ގެ ވަގުތީ އެގްޒެކްޓިވް ކައުންސިލަށް މެންބަރުން ހޮވުމަށް ބޭއްވި އިންތިޚާބުގައި އެޕާޓީގެ އަންހެނުންގެ ގޮފީގެ ރައީސަށް ކުރީގެ ފޮރިން މިނިސްޓަރ ދުންޔާ މައުމޫން އިންތިޚާބް ކޮށްފިއެވެ.
އެމްއެންޕީ އުފެއްދުމަށްޓަކައި ވަގުތީ ގޮތުން އިންތިޚާބު ކުރަންޖެހޭ މަގާމުތަކަށް ހުކުރު ދުވަހު ވަނީ މެމްބަރުން އިންތިޚާބު ކޮށްފައެވެ. އަންހެން ވިންގުގެ ލީޑަރަށް ތިން ބޭފުޅަކު ވަދާކުރެއްވިއިރު، ދުންޔާ އެ މަގާމަށް އިންތިޚާބުކުރީ 207 މީހުންގެ ވޯޓުންނެވެ. އެ މަގާމަށް ދެން ވާދަކުރި އައިޝަތު އަބްދުﷲ އަށް 43 ވޯޓު އަދި އައިޝަތު ހުސެއިން މަނިކަށް 11 ވޯޓު ލިބުނެވެ.
ނާއިބުރައީސުންގެ ތެރެއިން ޝިދާތާ ޝަރީފް ވަނީ މަތި އުތުރު ރީޖަންގެ ނާއިބުރައީސްކަން ކާމިޔާބު ކުރައްވާފަވެ. އެ ރީޖަންގެ ނާއިބުރައީސް ކަމަށް އޭނާއާ އެކު ކުރިމަތިލެއްވީ އަހުމަދު އަނޫޝާއި މުހައްމަދު ސައީދެވެ. ޖުމުލަ 276 މީހުން ވޯޓުލިއިރު، ޝިދާތާ ކާމިޔާބުކުރެއްވީ 137 މީހުންގެ ވޯޓުންނެވެ. އަނޫޝަށް 118 ވޯޓު ލިބުނުއިރު، ސައީދަށް ހޯއްދެވުނީ 21 ވޯޓެވެ.
އެމްއެންޕީގެ އެކި މަގާމުތަކަށް އިންތިޚާބު ވެފައިވާ މީހުން:
– އަންހެނުންނަށް ޚާއްސަ ކޮށްފައިވާ ރައީސް - މިރުފަތު އިސްމާއީލް ޝަފީގް
– ޒުވާނުންގެ ވިންގު ލީޑަރު - އުމެއިރު އަހުމަދު
– ކައުންސިލްގެ 14 މެމްބަރުންގެ ގޮނޑި، ކާމިޔާބު ކުރެއްވީ، އަސްރާ އަހްމަދު، މުހައްމަދު މަނިކު، މުހައްމަދު ހާނިމް، ހުސެއިން ފަޔާޒް، އިބްރާހިމް ޝަބާހު، އަހްމަދު ރިޔާޒް، އަހަމްދު ސާލިމް ސައީދު، މުހައްމަދު ނިޒާމް، އަހްމަދު އަމްޖަދު، އިބްރާހިމް މުހައްމަދު، އަބްދުﷲ ޝުހޫދު، އަޝްރަފު މުހައްމަދު އަލީ އަދި އަލީ އަބްދުލް ލަތީފެެވެ
– ކައުންސިލްގެ އަންހެނުންނަށް ޚާއްސަކުރި ހަތް ގޮނޑި އަށް ހޮވުނީ، އައިމިނަތު ޝާއިދާ، އިފާ ޝަރީފް، އައިމިނަތު އަޒީމާ، އައިޝަތު ޝައްމާ، ޝިޔާމާ އަލީ، ފާތިމަތު ނާޒީން އަދި ފާތިމަތު ރިފާއެވެ.
އެމްއެންޕީގައި ހަ ނާއިބުރައީސުން ތިއްބަވާނެއެވެ. ވަދާކުރާނެ އިތުރު މީހަކު ނެތިގެން، އިންތިޚަބަކާ ނުލައި ހަތަރު ނާއިބުރައީސުން މިހާރު ވަނީ ހޮވިފައެވެ. އެއީ އުތުރު ރީޖަންގެ ނާއިބުރައީސަކަށް ހުސައިން އިސްމާއީލާއި މެދު ރީޖަންގެ ނާއިބުރައީސަކަށް ވިލިމާލެ ދާއިރާގެ މެމްބަރު އަހުމަދު އުޝާމާއި މެދުދެކެނު ރީޖަންގެ ނާއިބުރައީސަކަށް ތިމަރަފުށި ދާއިރާގެ މެމްބަރު އަބްދުﷲ ރިޔާޒާއި ދެކުނު ރީޖަނަށް ސައިރިކްސްގެ ޗެއާމަން އަހުމަދު ޝަރީފެވެ.
އެޕާޓީގެ އަމާޒަކީ މިއަހަރު ނިމުމުގެ ކުރިން 10،000 މެމްބަރުން ހަމަކުރުމެވެ.
