މި ފަހަރުގެ "އުރީދޫ ސާފް ޗެމްޕިއަންޝިޕް 2021" ގައި ބުރާސްފަތި ދުވަހުގެރޭ ބަންގްލަދޭޝް އަތުން މޮޅުވި މެޗުގައި ތަފާތު ފެނުނީ ގެނައި ބަދަލުތަކަކުން ނޫން ކަމަށާއި، އޭގެ ބަދަލުގައި ތަފާތު ފެނުނީ ހުރިހާ ކުޅުންތެރިން ކުރި މަސައްކަތުން ކަމަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނެފިއެވެ.

މި ފަހަރުގެ މުބާރާތުގައި ކުޅުނު ދެވަނަ މެޗުން ބަންގްލަދޭޝް އަތުން ރާއްޖެ މޮޅުވީ 2-0 ގެ ނަތީޖާއަކުންނެވެ.

މި މެޗުގެ ފުރަތަމަ އެގާރައިގައި ސުޒޭން ވަނީ ނޭޕާލް މެޗުގައި ފުރުސަތު ދީފައިނުވާ މިޑްފީލްޑަރު ހުސެއިން ނިހާން (ނިހާޓް) ހިމަނާފައެވެ. އަދި ނޭޕާލް މެޗުގައި ފުރަތަމަ އެގާރައިގައި ހިމަނައިގެން ފާޑުކިއުން އަމާޒުވި މިޑްފީލްޑަރު އަސްހަދު އަލީ (އަޑުބަރޭ) މި މެޗުގެ ފުރަތަމަ އެގާރައިގައި ހިމެނި ނަމަވެސް، މެޗުގެ 27 ވަނަ މިނެޓުގައި ލިބުނު އަނިޔާއެއްގެ ސަބަބުން ރާއްޖޭގެ އަސްހަދު އަލީ (އަޑުބަރޭ) ބަދަލުކުރަން ޖެހުނެވެ. އޭނާގެ ބަދަލުގައި ކުޅެން އަރާފައިވަނީ އިބްރާހީމް އައިސަމެވެ.

މި މެޗަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒޭން ބުނީ މި މެޗުގައި ތަފާތު ފެނުނީ ގެނައި ބަދަލުތަކަކުން ނޫން ކަމަށާއި، އޭގެ ބަދަލުގައި ތަފާތު ފެނުނީ ހުރިހާ ކުޅުންތެރިން ކުރި ބުރަ މަސައްކަތުން ކަމަށެވެ. އެގޮތުން ބަދަލުތެއް ގެނައި ކުޅުންތެރިންނަށް އަނިޔާވުމުން، މަޖުބޫރުވެގެން ކަމަށްވެސް ވަނީ ބުނެފައެވެ.

މި މެޗަށްފަހު ސުޒޭން ވަނީ މި މެޗުގައި ކުޅުންތެރިން ދެއްކި ކުޅުމަށް ތައުރީފުކޮށްފައެވެ. އެގޮތުން އެންމެ ބޮޑަށް ފާހަގަކުރި އެއް ކުޅުންތެރިޔަކީ މި މެޗުގައި އަލަށް ކުޅުނު ނިހާޓުގެ ކުޅުމެވެ. ސުޒޭން ބުނީ ނިހާނުގެ ފަރާތުން ފެނުނު ތަފާތު މޮޅު ކުޅުން ފާހަގަކުރަންޖެހޭ ކަމަށާއި، އެގޮތުން އޭނާގެ ފަރާތުން އެ ކުޅުން ބޭނުންވެގެން ފަރިތަކުރުންތަކުގައި އެކަމަށް ތަމްރީނުކުރި ކަމަށެވެ.

މި މެޗުން މޮޅުވެ ރާއްޖެ ވަނީ ކުޅުނު ދެ މެޗުން ލިބުނު ތިން ޕޮއިންޓާއެކު ތާވަލުގެ ތިންވަނައަށް ޖެހިލާފައެވެ. ރާއްޖެއަށް މުބާރާތުގައި ބާކީ ދެ މެޗު އޮތްއިރު، އާދިއްތަ ދުވަހު ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި އޭގެ ފަހުން ބުދަ ދުވަހުގެރޭ އިންޑިއާއާ ދެކޮޅަށް ރާއްޖެ ނުކުންނާނެއެވެ.