ލަންކާއާ އެއްވަރުވެ އިންޑިއާއަށް ހުރަސްތަކެއް

މިހާރު ރާއްޖޭގައި ކުރިއަށްދާ ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގައި ބުރާސްފަތި ދުވަހުގެ ހަވީރު ކުޅުނު މެޗުން ސްރީ ލަންކާއާ އެއްވަރުވެ، ވަރުގަދަ އިންޑިއާއަށް ހުރަސްތަކެއް ކުރިމަތިވެއްޖެއެވެ.

ގައުމީ ފުޓްބޯޅަ ދަނޑުގައި ކުޅުނު މި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ. މިއީ 2003 ވަނަ އަހަރަށް ފަހު ލަންކާ އިން ސާފް ޗެމްޕިއަންޝިޕެއްގައި އިންޑިއާއާ އެއްވަރުކުރި ފުރަތަމަ ފަހަރެވެ.

މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މި ހާފުގައި ދެ ޓީމަށްވެސް މާ ނުރައްކާތެރި ހަމަލާއެއް އުފެއްދިފައެއް ނުވެއެވެ. އެކަމަކު މެޗު ފަށައިގެން ނުވަވަނަ މިނެޓުގައި ލަންކާގެ އަޙްމަދު ވަސީމް ރަޒީކަށް އޭރިއާ ތެރެއިން ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.

އޭގެ ފަހުން ފުރަތަމަ ހާފުގައި ލަނޑެއް ޖަހަން އެންމެ ހުސް ފުރުސަތެއް ލިބުނީ އިންޑިއާގެ ލިސްޓަން ކޮލާސޯއަށެވެ. އެކަމަކު އޭރިއާ ތެރޭގައި ހުހަށްހުރެ އޭނާ ބޮލުން ފޮނުވާލި ހަމަލާވެސް ދިޔައީ ގޯލާ އަމާޒުނުވެއެވެ.

މި މެޗުގެ ދެވަނަ ހާފުގައި އިންޑިއާއިން ކުޅުން ރަނގަޅުކުރިއިރު، މި ހާފު ފަށައިގެން ނުވަވަނަ މިނެޓުގައި އެ ޓީމުގެ ކެޕްޓަން ސުނިލް ޗެތުރީ ބޮލުން ފޮނުވާލި ބޯޅައެއް ލަންކާގެ ގޯލްކީޕަރު ސުޖަން ޕެރޭރާ ވަނީ ދިފާއުކޮށްފައެވެ. އަދި އޭގެ ހަ މިނެޓު ފަހުން އޭރިއާ ތެރެއިން އިންޑިއާގެ އަނީރުދް ތާޕާއަށް ވަނީ ހުސް ފުރުސަތެއް ލިބި ބޭކާރުވެފައެވެ.

މި މެޗުގައި ލަންކާއިން ވަރަށް ރަނގަޅަށް ޑިފެންސްކޮށްގެން ކުޅުނުއިރު، މެޗުގެ 72 ވަނަ މިނެޓުގައި އިންޑިއާގެ ފަރޫޚް ހާޖީ ކަސަމް ވަނީ ލަނޑެއް ޖަހާފައެވެ. އެކަމަކު އޭގެ ކުރިން އޭރިއާ ތެރެއިން އިންޑިއާގެ ކުޅުންތެރިން ފައުލްކޮށްފައި އޮތުމުން، ރެފުރީ ވަނީ އެ ލަނޑު ބަލައިނުގަންނަން ނިންމާފައެވެ. އަދި މެޗު ނިމެން ދެ މިނެޓަށް ވެފައި ވަނިކޮށް އޭރިއާ ތެރެއިން ސުބާސިޝް ބޯސްއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ދިޔައީ ގޯލާ އަމާޒުނުވެއެވެ.

މި މެޗު އެއްވަރުވުމުން ބާކީ އެއް މެޗު އޮއްވައި ލަންކާ ވަނީ މުބާރާތުން ކަޓާފައެވެ. އަނެއްކޮޅުން އިންޑިއާއަށް ވަނީ މުބާރާތުގައި ކުރިއަށްދާން ހުރަސްތަކެއް ކުރިމަތިވެފައެވެ. އިންޑިއާއަށް މިހާތަނަށް ކުޅުނު ދެ މެޗުވެސް އެއްވަރުވެފައިވާއިރު، އެ ޓީމު ތިންވަނައިގައި އޮތީ ދެ ޕޮއިންޓާއެކުއެވެ. އެއްވަނައިގައި އޮތީ ކުޅުނު ދެ މެޗުން މޮޅުވެ ހަ ޕޮއިންޓް ހޯދާފައިވާ ނޭޕާލެވެ. ދެވަނައިގައި އޮތީ ދެ މެޗުން ހަތަރު ޕޮއިންޓް ހޯދާފައިވާ ބަންގްލަދޭޝްއެވެ. އަދި ހަތަރުވަނައިގައި އޮތް ރާއްޖެ އާއި ފަސްވަނައިގައި އޮތް ލަންކާއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.