ބަންގްލަދޭޝް ބަލިކުރަން ރާއްޖެއަށް މަޖުބޫރު

މިހާރު ރާއްޖޭގައި ކުރިއަށްދާ ދެކުނު އޭޝިއާގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގައި ކުޅުނު ފުރަތަމަ މެޗުން ރާއްޖެ ވަނީ ނޭޕާލް އަތުން 1-0 ގެ ނަތީޖާއަކުން ބަލިވެފައެވެ. މިއީ ސާފް ޗެމްޕިއަންޝިޕުގެ ތާރީޚުގައި ނޭޕާލް އަތުން ރާއްޖެ ބަލިވި ފުރަތަމަ ފަހަރެވެ.

މި ފަހަރުގެ މުބާރާތުގައި ފަސް ގައުމު ވާދަކުރާތީ، މުބާރާތް ކުރިއަށްދަނީ ލީގު އުސޫލުން ކުޅުމަށްފަހު އެންމެ ގަދަ ދެ ޓީމު ފައިނަލަށް ދާ ގޮތަށެވެ. މި ވަގުތު ތާވަލުގެ އެއްވަނައިގައި އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓް ހޯދާފައިވާ ނޭޕާލެވެ. ދެވަނައިގައި އޮތީ ދެ މެޗުން ހަތަރު ޕޮއިންޓް ހޯދާފައިވާ ބަންގްލަދޭޝްއެވެ. އަދި ދެ ޕޮއިންޓާއެކު ތާވަލުގެ ތިންވަނައިގައި އިންޑިއާ އޮތްއިރު، ހަތަރުވަނައިގައި އޮތް ރާއްޖެ އާއި ފަސްވަނައިގައި އޮތް ސްރީ ލަންކާއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.

މި މުބާރާތުގެ ދެވަނަ މެޗުގައި ބުރާސްފަތި ދުވަހުގެރޭ ބަންގްލަދޭޝްއާ ދެކޮޅަށް ރާއްޖެ ނުކުންނައިރު، މި މެޗުން މޮޅުވާން ރާއްޖެއަށް މަޖުބޫރެވެ. އެއީ މި މެޗުން ތިން ޕޮއިންޓް ނުހޯދިއްޖެނަމަ، ފައިނަލަށް ދިޔުމުގެ ފުރުސަތު ރާއްޖެއަށް ވަރަށް ބޮޑަށް ހަނިވާނެތީއެވެ.

ބަންގްލަދޭޝް މެޗުގެ ކުރިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ބުނީ ނޭޕާލް އަތުން ބަލިވުމުގެ މާޔޫސްކަން ކުރިމަތިވި ކަމަށާއި އެކަމަކު މިހާރު މުޅި ޓީމުގެ ރޫހު ރަނގަޅުވަމުން އަންނަ ކަމަށެވެ. އަދި ބަންގްލަދޭޝް އަތުން މޮޅު ނުވެ އމުބާރާތުގައި ކުރިއަށް ދެވޭނެ ގޮތެއް ނެތް ކަމަށާއި، އެހެންކަމުން މި މެޗަށް ނުކުންނާނީ ބަންގްލަދޭޝް ބަލިކޮށްގެން މުބާރާތުގައި ކުރިއަށްދާން ކަމަށްވެސް ވަނީ ބުނެފައެވެ.

މިހާތަނަށް ރާއްޖެ އާއި ބަންގްލަދޭޝް 12 ފަހަރު ބައްދަލުކޮށްފައިވާއިރު، ބަންގްލަދޭޝްއިން އެންމެ ފަހުން ރާއްޖެ ބަލިކުރީ 2003 ވަނަ އަހަރު އެ ގައުމުގައި ކުޅުނު ސާފް ޗެމްޕިއަންޝިޕިގެ ފައިނަލުގައި ޕެނަލްޓީ ޖަހައިގެންނެވެ.

އޭގެ ފަހުން ރާއްޖޭން ވަނީ ބަންގްލަދޭޝާ ދެކޮޅަށް ކުޅުނު ތިން މެޗުންވެސް މޮޅުވެފައެވެ. އެގޮތުން 2011 ވަނަ އަހަރާއި 2015 ވަނަ އަހަރު ބޭއްވި ސާފް ޗެމްޕިއަންޝިޕުގެ މެޗުތަކުގައި ރާއްޖޭން ބަންގްލަދޭޝް ބަލިކޮށްފައިވާއިރު، 2016 ވަނަ އަހަރު މާލޭގައި ކުޅުނު އެކުވެރިކަމުގެ މެޗުން ރާއްޖޭން ވަނީ 5-0 ގެ ތަފާތު ބޮޑު ނަތީޖާއަކުން ބަންގްލަދޭޝް ބަލިކޮށްފައެވެ.