ނޭޕާލް މެޗުގައި ހެދުނު ގޯސްތައް ރަނގަޅުކުރެވިއްޖެ: ސުޒޭން

މި ފަހަރުގެ "އުރީދޫ ސާފް ޗެމްޕިއަންޝިޕް 2021" ގައި ކުޅުނު ފުރަތަމަ މެޗުން ނޭޕާލް އަތުން ރާއްޖެ ބަލިވިއިރު، އެ މެޗުގައި ހެދުނު ގޯސްތައް މިދިޔަ ފަރިތަކުރުންތަކުގައި ރަނގަޅުކުރެވިފައިވާ ކަމަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނެފިއެވެ.

މި ފަހަރުގެ މުބާރާތުގައި ކުޅުނު ފުރަތަމަ މެޗުން ރާއްޖެ ބަލިވީ ނޭޕާލް އަތުން 1-0 ގެ ނަތީޖާއަކުންނެވެ. މިއީ ސާފް ޗެމްޕިއަންޝިޕުގެ ތާރީޚުގައި ނޭޕާލް އަތުން ރާއްޖެ ބަލިވި ފުރަތަމަ ފަހަރެވެ.

މި މުބާރާތުގެ ދެވަނަ މެޗުގައި ބުރާސްފަތި ދުވަހުގެރޭ ބަންގްލަދޭޝްއާ ދެކޮޅަށް ނުކުތުމުގެ ކުރިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒޭން ބުނީ ނޭޕާލް މެޗުގައި ބޭނުންވި ކާމިޔާބު ނުލިބުނު ކަމުގައިވިއަސް، އެ މެޗުގައި ދެއްކި ކުޅުމާާ ދޭތެރޭ ހިތްހަމަޖަހޭ ކަމަށެވެ. އެގޮތުން ނޭޕާލް މެޗުގައި ރާއްޖޭގެ ޓީމުން ވަރަށް ގިނަ ކަންތައްތަކެއް ރަނގަޅަށް ކުރި ކަމަށާއި، އެ މެޗުގައި ހަމައެކަނި މަދުވީ ނަތީޖާ ނެރުން ކަމަށްވެސް ސުޒޭން ބުންޏެވެ.

ސުޒޭން ބުނީ ނޭޕާލް މެޗުން ބަލިވި ނަމަވެސް، އެ މެޗުގައި ހެދުނު ގޯސްތައް މިހާރު ދެނެގަނެ، އޭގެއިން ރަނގަޅު ކުރެވެން ހުރި ބައިވަރު ކަންކަން މިދިޔަ ފަރިތަކުރުންތަކުގައި ރަނގަޅުކުރެވިފައިވާ ކަމަށެވެ.

ސާފް ޗެމްޕިއަންޝިޕުގެ ދެވަނަ މެޗުގައި ރާއްޖޭން ބަންގްލަދޭޝްއާ ދެކޮޅަށް ނުކުންނައިރު، އެ ޓީމު ވަނީ މިހާތަނަށް ދެ މެޗެއް ކުޅެފައެވެ. އެގޮތުން މުބާރާތުގައި ކުޅުނު ފުރަތަމަ މެޗުގައި ސްރީ ލަންކާ އަތުން 1-0 ގެ ނަތީޖާއަކުން ބަންގްލަދޭޝް މޮޅުވިއިރު، ދެވަނަ މެޗުގައި ވަނީ އެއް ކުޅުންތެރިއަކު މަދުކޮށް ކުޅެ އިންޑިއާއާ 1-1 ގެ ނަތީޖާއަކުން އެއްވަރުކޮށްފައެވެ.

ސުޒޭން ބުނީ ބަންގްލަދޭޝްއާ ދެކޮޅަށް ނުކުންނައިރު، އެ ޓީމަކީ ވަރަށް ވަރުގަދަ ޓީމެއްކަން އެނގޭ ކަމަށާއި، އައެގޮތުން މި މުބާރާތުގައި އެ މީހުންގެ ފޯމް ވަރަށް ރަނގަޅު ކަމަށެވެ. އެކަމަކު މި މެޗަށް ރާއްޖެ އޮތީ ވަރަށް ފުރިހަމައަށް ތައްޔާރުވެފައި ކަމަށްވެސް ސުޒޭން ވަނީ ބުނެފައެވެ.

މީގެ ކުރިން ނޭޕާލާ ދެކޮޅަށް ކުޅުނު މެޗަށްފަހު ސުޒޭން ވަނީ  ފުރަތަމަ މެޗުން ބަލިވުމަކީ ރާއްޖެއަށް ކުރިމަތިވި ޕްރެޝަރެއް ކަމަށް ބުނެފައެވެ. ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ސުޒޭން ބުނީ އެ ފަހަރު އޭނާ ފާހަގަކުރި ޕްރެޝަރު މިހާރު ފެންނަން އެބައޮތް ކަމަށާއި، އެގޮތުން ނޭޕާލާއި ބަންގްލަދޭޝް ކުޅުނު ދެ މެޗުން އެ ދެ ޓީމު ތާވަލުގެ ކުރިއަށް ޖެހިލުމަކީ، ޕޮއިންޓެއް ނެތް ރާއްޖެއަށް އޮތް ޕްރެޝަރެއް ކަމަށެވެ.

މި ފަހަރުގެ ސާފް ޗެމްޕިއަންޝިޕުގައި ރާއްޖެ އާއި ބަންގްލަަދޭޝް ބައްދަލުކުރާއިރު، ބަންގްލަދޭޝް އޮތީ ތާވަލުގެ ދެވަނައިގައި ކުޅުނު ދެ މެޗުން ހަތަރު ޕޮއިންޓް ހޯދައިގެންނެވެ. އަދި ރާއްޖެ ބަލިކުރި ނޭޕާލް އޮތީ ކުޅުނު ދެ މެޗުންވެސް މޮޅުވެ ހަ ޕޮއިންޓާއެކު އެއްވަނައިގައެެވެ. ލީގު އުސޫލުން ކުޅުމަށްފަހު އެންމެ ގަދަ ދެ ޓީމު ފައިނަލަށް ދާއިރު، ރާއްޖެއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.

ސާފް ޗެމްޕިއަންޝިޕުގައި ރާއްޖެ އާއި ބަންގްލަަދޭޝް ބައްދަލުކުރާ މެޗު ފަށާނީ ބުރާސްފަތި ދުވަހުގެރޭ 21:00 ގައެވެ.