ދެކުނު އޭޝިއާގެ ފުޓުބޯޅައިގެ މައި މުބާރާތް "އުރީދޫ ސާފް ޗެމްޕިއަންޝިޕް 2021" ގައި ރާއްޖެ އާއި ބަންގްލަދޭޝް ބައްދަލުކުރާ މެޗުގެ ޓިކެޓް ވިކި ހުސްވެއްޖެއެވެ.

އަންގާރަ ދުވަހުގެ ހެނދުނު މި މެޗުގެ ޓިކެޓް ވިއްކަން ފަށާފައިވާއިރު، އިދިކޮޅު ސަޕޯޓަރުންނަށް ދީފައިވަނީ ދަނޑުގެ 20 އިންސައްތަ ޓިކެޓެވެ. ޓިކެޓް ވިއްކަން ފެށިތާ 3 ގަޑިއިރުގެ ތެރޭގައި ބަންގްލަދޭޝް ސަޕޯޓަރުންނަށް ދީފައިވާ 20 އިންސައްތަ ޓިކެޓް ވަނީ ވިކި ހުސްވެފައެވެ. އެއާއިއެކު ބަންގްލަދޭޝް ސަޕޯޓަރުން ވަނީ ދަނޑު ކައިރީގައި ނުރުހުންވެސް ފާޅުކޮށްފައެވެ.

މި މެޗުގެ ހުރިހާ ޓިކެޓެއް ވިކި ހުސްވެފައިވާކަން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ އޮފިޝަލަކު ވަނީ ރާއްޖެޓީވީއަށް ކަށަވަރު ކޮށްދީފައެވެ.

މެޗުގެ ޓިކެޓް ވިއްކަން ފެށުމާއިއެކު ބަންގްލަދޭޝްގެ ސަޕޯޓަރުންނާއި، ރާއްޖޭގެ ސަޕޯޓަރުން ވަނީ ދަނޑު ބޭރުގައި ބޮޑު ކިޔުއެއް ހަދާފައެވެ.

ސާފް ޗެމްޕިއަންޝިޕަށް ގޮނޑިބަރީގެ ޓިކެޓެއް ވިއްކާނީ 100 ރުފިޔާއަށެވެ. އަދި ސިޑިބަރީގެ ޓިކެޓުގެ އަގަކީ 75 ރުފިޔާއެވެ.

ސާފް ޗެމްޕިއަންޝިޕުގެ މެޗުތައް ބަލަން ދަނޑަށް ސަޕޯޓަރުން ވެއްދުމުގެ ހުއްދަ ލިބިފައިވާއިރު، މީގެ ކުރިން މީހުން ވެއްދުން މަނާކޮށްފައިވާ ދެކުނު ފަރާތް (ސަހާރާ ފަޅި) ގެ ސިޑިބަރިތައް މަރާމާތުކޮށް، އެ ސިޑިބަރީގެ ތިރީ ބަޔަށް ސަޕޯޓަރުން ވައްދަން މިހާރު ވަނީ ހަމަޖެހިފައެވެ.

މި ފަހަރުގެ ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.