މޯލްޑިވްސް ނެޝަނަލް ޕާޓީ (އެމްއެންޕީ) އުފެއްދުމަށް ބާއްވާ ބައްދަލުވުމުގައި އިންތިޚާބުުކުރުމަށް، ޕާޓީގެ އިންޓަރިމް އެގްޒެކެޓިވް ކައުންސިލްގެ މަގާމުތަކަށް 54 ފޯމް ހުށަހަޅައިފިއެވެ.

އެމްއެންޕީން ބުނީ 08 އޮކްޓޫބަރ ވާ ހުކުރު ދުވަހު އެމްއެންޕީ އުފެއްދުމަށް ބާއްވާ ބައްދަލުވުމުގައި އިންތިޚާބުުކުރުމަށް، ޕާޓީގެ އިންޓަރިމް އެގްޒެކެޓިވް ކައުންސިލްގެ މަޤާމުތަކަށް ކުރިމަތިލުމުގެ ސުންގަޑި އާދިއްތަ ދުވަހުގެ މެންދުރުފަހު 2:00ށް ހަމަވެފައިވާ ކަމަށެވެ. މިއާ ގުޅިގެން އިންތިޚާބުގައި ބައިވެރިވުމަށް މުޅި ޖުމްލަ 54 ފޯމް ހުށަހަޅާފައިވާ ކަމަށް އެމްއެންޕީން ބުނެއެވެ.

އިންޓަރިމް އެގްޒެކެޓިވް ކައުންސިލަށް ކުރިމަތިލުމަށް ހުޅުވާލެވިފައިވާ މަގާމުތަކަކީ ޕާޓީގެ ރައީސް، 6 ނާއިބު ރައީސުން (އޭގެ 1 މަގާމަކީ އަންހެން މެންބަރަކަށް ޚާއްސަ މަގާމު)، އަންހެނުންގެ ވިންގ ލީޑަރ، ޒުވާނުންގެ ވިންގ ލީޑަރު އަދި ކައުންސިލް މެންބަރުންގެ ގޮތުގައި 21 މެންބަރުން (އޭގެ ތެރެއިން 7 މަގާމަކީ އަންހެނުންނަށް ޚާއްސަ މަގާމު) އެވެ.

އެގޮތުން ޕާޓީގެ ރައީސް ކަމަށް ކުރިމަތިލައްވާފައިވަނީ ކާނަލް (ރޓޑ) މުޙައްމަދު ނާޒިމް ކަމަށް އެމްއެންޕީން ބުނެއެވެ.

މޯލްޑިވްސް ނެޝަނަލް ޕާޓީ އުފެއްދުމަށް ބާއްވާ ބައްދަލުވުން ބޭއްވުމަށް ހަމަޖެހިފައިވަނީ 08 އޮކްޓޫބަރ ވާ ހުކުރު ދުވަހު ޣިޔާސުއްދީން އިންޓަނޭޝަނަލް ސްކޫލްގެ ހޯލުގައެވެ. 2 ދަންފަޅިއަށް ކުރިޔަށްގެން ދިއުމަށް ރޭވިފައިވާ މި ބައްދަލުވުމުގެ ފުރަތަމަ ދަންފަޅި އެދުވަހުގެ މެންދުރުފަހު 2ން 6ށް، އަދި ދެވަނަ ދަންފަޅި ރޭގަނޑު 9ން ފެށިގެން ކުރިޔަށްދާނެއެވެ. ފުރަތަމަ ދަންފަޅީގައި ކުރިޔަށް ދާނީ ސިޔާސީ ޕާޓީތަކުގެ ގާނޫނުން ލާޒިމުކުރާ ކަންކަމުގެ ތެރެއިން ޕާޓީގެ ނަން، ލޯގޯ، ކުލަ، ދިދަ އަދި އަސާސީ ގަވާއިދު ފާސްކުރުމާއި އިންޓަރިމް އެގްޒެކެޓިވް ކައުންސިލްގެ މަގާމުތަކަށް މެންބަރުން އިންތިޚާބު ކުރުމެވެ.

މިބައްދަލުވުމުގައި މަގާމުތަކަށް މެންބަރުން އިންތިޚާބުކުރުމަށް ކުރިޔަށްދާ ވޯޓުލުމުގެ މަރުހަލާގައި ބޭނުންކުރުމަށް ހަމަޖެހިފައިވަނީ ކިއޮސްކް އިލެކްޓްރޯނިކް ވޯޓިންގ ސިސްޓަމެކެވެ. އަދި ބައްދަލުވުމުގެ އެހެނިހެން ކަންކަމާއި އިސް މަގާމުތަކަށް އިންތިޚާބުވި ފަރާތްތަކުގެ ވާހަކަފުޅު ދެއްކެވުން ކުރިޔަށްދާނީ ދެވަނަ ދަނފަޅީގައެވެ.