ބަންގްލަދޭޝްއިން އިންޑިއާއާ އެއްވަރުކޮށްފި

ދެކުނު އޭޝިއާ ސަރަހައްދުގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގައި ހޯމަ ދުވަހުގެ ހަވީރު ކުޅުނު މެޗުގައި އެއް ކުޅުންތެރިއަކު މަދުކޮށް ކުޅެ ބަންގްލަދޭޝްއިން އިންޑިއާ އެއްވަރުކޮށްފިއެވެ.

ގައުމީ ފުޓްބޯޅަ ދަނޑުގައި ކުޅުނު މެޗު އެއްވަރުވީ 1-1 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، ފުރަތަމަ ހާފުގައި ބަންގްލަދޭޝްގެ ޓީމުން ވަނީ އިންޑިއާގެ ހާފަށް ބާރުބޮޑުކޮށް ރަނގަޅު ފުރުސަތުތަކެއް ތަނަވަސްކޮށްފައެވެ. އެކަމަކު މި މެޗުގައި އެންމެ ފުރަތަމަ ލަނޑު ޖަހައި ލީޑު ނަގާފައިވަނީ އިންޑިއާއިންނެވެ. މެޗުގެ 25 ވަނަ މިނެޓުގައި އުދަންތާ ސިންގް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ކެޕްޓަން ސުނިލް ޗެތުރީއެވެ.

އޭގެ ދެ މިނެޓު ފަހުން ބަންގްލަދޭޝްގެ ބިޕްލޯ އަޙްމަދު އޭރިއާ ބޭރުން ފޮނުވާލި ނުރައްކާތެރި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ. އަދި މެޗުގެ 37 ވަނަ މިނެޓުގައި އޭރިއާ ބޭރުން ޗެތުރީ ފޮނުވާލި ނުރައްކާތެރި ހަމަލާއެއްގެ ހުރަހަކަށްވީ ބަންގްލަދޭޝްގެ ގޯލްކީޕަރު އަނީސުރް ރަހްމާނެވެ. އަދި އޭގެ މިނެޓެއް ފަހުން ކައުންޓަ އެޓޭކެއްގައި ބަންގްލަދޭޝްގެ ޓޯޕޫ ބަރްމަން ފޮނުވާލި ނުރައްކާތެރި ހަމަލާއެއް، އިންޑިއާގެ ކީޕަރު ގުރްޕްރީތު ސިންގް ސަންދޫ ވަނީ ހުށިޔާރުކަމާއެކު ދިފާއުކޮށްފައެވެ.  

މި މެޗުގެ ދެވަނަ ހާފު ފަށައިގެން ފުރަތަމަ ހަމަލާ އުފައްދާފައިވަނީ ބަންގްލަދޭޝްއިންނެވެ. އެގޮތުން މި ހާފު ފަށައިގެން ހަތަރުވަނަ މިނެޓުގައި ބަންގްލަދޭޝްގެ ރަކީބް ހުސެއިން ފޮނުވާލި ހަމަލާ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. އޭގެ ފަހުން މި މެޗުގައި ބަންގްލަދޭޝްއަށް މައްސަލަތަކެއް ކުރިމަތިވީ މެޗުގެ 54 ވަނަ މިނެޓުގައި އެ ޓީމުގެ ބިޝްވަނާތު ގޯޝްއަށް ސީދާ ރަތް ކާޑެއް ދެއްކުމުންނެވެ. އޭނާއަށް ރެފުރީ ރަތް ކާޑެއް ދެއްކީ އިންޑިއާގެ ލިސްޓަން ކޮލާސޯއަށް ކުރި ނުރައްކާތެރި ފައުލަކާ ގުޅިގެންނެވެ. 

އެއާއެކު އިންޑިއާއިން އެ ޓީމުގެ އެޓޭކުތައް ވަރުގަދަކުރި ނަމަވެސް، ފުލުފުލުގައި އެ ޓީމުގެ މަންވީރު ސިންހަ އާއި، އުޑާންތަ ސިންގް ކުމާރު ފޮނުވާލި ބޯޅަތަކުގެ ހުރަހަކަށްވީ ބަންގްލަދޭޝްގެ ގޯލްކީޕަރު އަނީސުރް ރަހްމާންއެވެ. ނަމަވެސް އެއް ކުޅުންތެރިއަކު މަދުކޮށް ކުޅެމުން އައި ބަންގްލަދޭޝްއިން ވަނީ މެޗުގެ 73 ވަނަ މިނެޓުގައި ނަތީޖާ އެއްވަރުކޮށްފައެވެ. ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ ޔާސީން އަރަފާތެވެ.

މި ނަތީޖާއާއެކު ބަންގްލަދޭޝް އޮތީ ތާވަލުގެ އެއްވަނައިގައި ކުޅުނު ދެ މެޗުން ލިބުނު ހަތަރު ޕޮއިންޓާއެކުއެވެ. ދެވަނައިގައި އޮތީ އެއް މެޗުން ތިން ޕޮއިންޓް ހޯދާފައިވާ ނޭޕާލެވެ. އަދި ބަންގްލަދޭޝް އަތުން ލިބުނު ޕޮއިންޓަކާއެކު ތާވަލުގެ ތިންވަނައިގައި އިންޑިއާ އޮތްއިރު، ހަތަރުވަނައިގައި އޮތް ރާއްޖެ އާއި ފަސްވަނައިގައި އޮތް ސްރީ ލަންކާއަށް އަދި މިހާތަނަށް ޕޮއިންޓެއް ލިބިފައެއް ނުވެއެވެ.