ފްރެންޗް ލީގުގައި އާދީއްތަ ދުވަހުގެ ހަވީރު ރެން އަތުން ބަލިވެ، ޕީއެސްޖީން ލީގުގައި ދަމަހައްޓަމުން އައި މޮޅުވުމުގެ ސިލްސިލާއަށް ނިމުން އަތުވެއްޖެއެވެ.

ރަށުން ބޭރުގައި ކުޅުނު މެޗުން ޕީއެސްޖީ ބަލިވީ 2-0 ގެ ނަތީޖާއަކުންނެވެ.

މި މެޗުން ޕީއެސްޖީ ބަލިވިއިރު، ލީގުގައި މީގެ ކުރިން ކުޅުނު އަށް މެޗުންވެސް ޕީއެސްޖީ ވަނީ މޮޅުވެފައެވެ. އަދި މި މެޗުގެ ކުރިން ލީގު މެޗަކުން ޕީއެސްޖީ ބަލިވެފައިވަނީ މި އަހަރުގެ އޭޕްރީލް މަހުގެ ތިންވަނަ ދުވަހު މިދިޔަ ސީޒަނުގެ ޗެމްޕިއަންކަން ހޯދި ލިލް އަތުންނެވެ.

އާދީއްތަ ދުވަހު ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، ފުރަތަމަ ހާފުގައި ލަނޑެއް ޖަހަން ޕީއެސްޖީއަށް ވަނީ ރަނގަޅު ފުރުސަތުތަކެއް ލިބިފައެވެ. އެގޮތުން މި ހާފުގައި އެ ޓީމުގެ ނޭމާ އާއި ކީލިއަން އެމްބާޕޭއަށް އޭރިއާ ތެރެއިން ހުސް ފުރުސަތުތަކެއް ލިބުނު ނަމަވެސް، އެ ދެ ކުޅުންތެރިން ފޮނުވާލި ހަމަލާތައްވެސް ދިޔައީ ގޯލާ އަމާޒުނުވެއެވެ. އަދި މި ހާފުގައި ޕީއެސްޖީގެ ލިއޮނެލް މެސީ ފޮނުވާލި ހިލޭ ޖެހުމެއް ވަނީ ގޯލުގެ ހުރަސް ދަނޑިއަށް އަމާޒުވެފައެވެ.

މި މެޗުގައި ރެންއިން ލީޑު ނަގާފައިވަނީ ފުރަތަމަ ހާފުގެ ފަހު މިނެޓުގައެވެ. ކަމަލްދީން ސުލެމާނާ ހުރަސްކޮށްދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ގައެޓަން ލަބޯޑެވެ. އަދި ދެވަނަ ހާފު ފަށައިގެން ފުރަތަމަ މިނެޓުގައި ލަބޯޑް ތަނަވަސްކޮށްދިން ފުރުސަތަކުން ފްލަވިއެން ޓެއިޓް ވަނީ ލަނޑެއް ޖަހައި، ރެންއަށް ލީޑު ފުޅާކޮށްދީފައެވެ.

އޭގެ ފަހުން މެޗުގެ 68 ވަނަ މިނެޓުގައި އެމްބާޕޭ ޕީއެސްޖީއަށް ލަނޑެއް ޖަހައިދިން ނަމަވެސް، އޭނާ އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ. އަދި މެޗުގެ 81 ވަނަ މިނެޓުގައި އޭރިއާ ތެރެއިން ރެންގެ ލަބޯޑަށް ޕީއެސްޖީގެ އަޝްރަފް ހަކީމީ ކުރި ފައުލަކަށް ރެފުރީ ޕެނަލްޓީއެއް ދިން ނަމަވެސް، ވީއޭއާރް ބެލުމަށްފަހު ވަނީ އެ ނިންމުންވެސް ބަދަލުކޮށްފައެވެ.

މި މެޗުން ޕީއެސްޖީ ބަލިވި ނަމަވެސް، އެ ޓީމު އޮތީ ތާވަލުގެ އެއްވަނައިގައި ކުޅުނު ނުވަ މެޗުން ލިބުނު 24 ޕޮއިންޓާއެކުއެވެ. ދެވަނައިގައި އޮތް ލެންސްއަށް ނުވަ މެޗުން 18 ޕޮއިންޓް ލިބިފައިވާއިރު، ޕީއެސްޖީ ބަލިކުރި ރެން އޮތީ ތާވަލުގެ ހަތްވަނައިގައި ނުވަ މެޗުން 12 ޕޮއިންޓާއެކުއެވެ.