ފުރަތަމަ މެޗު ގެއްލިގެންދިއުމަކީ ޕްރެޝަރެއް: ސުޒޭން

މި ފަހަރުގެ "އުރީދޫ ސާފް ޗެމްޕިއަންޝިޕް 2021" ގައި ކުޅުނު ފުރަތަމަ މެޗުން ބަލިވުމަކީ ރާއްޖެއަށް ކުރިމަތިވި ޕްރެޝަރަކަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނެފިއެވެ.

މި ފަހަރުގެ މުބާރާތުގައި ކުޅުނު ފުރަތަމަ މެޗުން ރާއްޖެ ބަލިވީ ނޭޕާލް އަތުން 1-0 ގެ ނަތީޖާއަކުންނެވެ. މިއީ ސާފް ޗެމްޕިއަންޝިޕުގެ ތާރީޚުގައި ނޭޕާލް އަތުން ރާއްޖެ ބަލިވި ފުރަތަމަ ފަހަރެވެ. މީގެ ކުރިން ރާއްޖޭން ވަނީ ނޭޕާލާ ކުޅުނު ހަތް މެޗުގެ ތެރެއިން ފަސް މެޗުން މޮޅުވެފައެވެ. އަނެއް ދެ މެޗު ނިމުނީ އެއްވަރުވެގެންނެވެ.

ހުކުރު ދުވަހުގެރޭ ކުޅުނު މެޗަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒޭން ބުނީ ފުރަތަމަ މެޗުން ބަލިވުމަކީ ޓީމަށް ކުރިމަތިވާނެ ޕްރެޝަރެއް ކަމަށާއި، އެގޮތުން މިހާރު އޮތީ ކުރިއަށްވުރެ އުނދަގޫ ހާލަތެއް ކަމަށެވެ. އެހެންކަމުން އެއަށް ގޮތްތަކެއް ރާވައިގެން ހައްލު ގެންނަން ޖެހޭނެ ކަމަށްވެސް ސުޒޭން ބުންޏެވެ.

ސުޒޭން ބުނީ މެޗުން ބަލިވި ނަމަވެސް، މި މެޗުގައި ރާއްޖޭން ރަނގަޅަށް ކުޅުނު ކަމަށާއި، އެހެން ނަމަވެސް ކައުންޓާ އެޓޭކުގައި ޓީމު ޕްރެޝަރަށް ވެއްޓިގެންދިޔަ ކަމަށެވެ. އަދި މުޅި މެޗުގައިވެސް ނޭޕާލުން ކުޅުނީ ޑިފެންސްކޮށް، ކައުންޓާ އެޓޭކެެއްގައި ހަމަލާ އުފައްދަން ކަމަށާއި، އެކަން އެ ޓީމަށް ކާމިޔާބުވީ ކަމަށްވެސް ބުންޏެވެ.

ސުޒޭން އިތުރަށް ބުނީ މި މެޗުން ބަލިވި ނަމަވެސް، ކުރިއަށް އޮތް މެޗަށް ދާއިރު ފުރަތަމަ އެގާރައަށް މާ ބޮޑު ބަދަލެއް އަންނާނެ ކަމަށް ގަބޫލުނުކުރާ ކަމަށެވެ. އެކަމަކު ތަމްރީނުތައް ހަދަން ފަސްވަރަކަށް ދުވަސް އޮތުމުން، ދެތިން ދުވަސް ފަހުން ގެންނާނެ ބަދަލުތަކަކަށް ވިސްނާނެ ކަމަށްވެސް ބުންޏެވެ.

މި ފަހަރުގެ ސާފް ޗެމްޕިއަންޝިޕުގައި ކުޅުނު ފުރަތަމަ މެޗުން ރާއްޖެ ބަލިވިއިރު، މި މުބާރާތުގައި ރާއްޖޭން ދެން މެޗެއް ކުޅޭނީ އަންނަ ބުރާސްފަތި ދުވަހުގެރެއެވެ. އެރޭ ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ. އޭގެ ފަހުން މި މަހުގެ 10 ވަނަ ދުވަހުގެ ހަވީރު ސްރީ ލަންކާއާ ދެކޮޅަށް ރާއްޖެ ނުކުންނައިރު، ފަހު މެޗުގައި މި މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.

މި ފަހަރުގެ މުބާރާތުގައި ފަސް ގައުމު ވާދަކުރަމުން އަންނާތީ، މުބާރާތް ކުރިއަށްދަނީ ލީގު އުސޫލުން ކުޅުމަށްފަހު، އެންމެ މޮޅު ދެ ޓީމު ފައިނަލަށް ދާ ގޮތަށެވެ.