ނޭޕާލް އަތުން ރާއްޖެއަށް ނާކާމިޔާބު

ދެކުނު އޭޝިއާ ސަރަހައްދުގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގައި ކުޅުނު ފުރަތަމަ މެޗުން ނޭޕާލް އަތުން އެންމެ ފަހުގެ ޗެމްޕިއަން ރާއްޖެ ބަލިވެއްޖެއެވެ.

ހުކުރު ދުވަހުގެރޭ ގައުމީ ފުޓްބޯޅަ ދަނޑުގައި ކުޅުނު މެޗުން ނޭޕާލް އަތުން ރާއްޖެ ބަލިވ 1-0 ގެ ނަތީޖާއަކުންނެވެ. މިއީ ސާފް ޗެމްޕިއަންޝިޕުގެ ތާރީޚުގައި ނޭޕާލް އަތުން ރާއްޖެ ބަލިވި ފުރަތަމަ ފަހަރެވެ.

ގިނަ އަދަދެއްގެ ދިވެހި ސަޕޯޓަރުންގެ ކުރިމަތީގައި ކުޅުނު މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، މި ހާފުގައި ލަނޑެއް ޖަހަން ރާއްޖެއަށް ވަނީ ގިނަ ފުރުސަތުތަކެއް ލިބިފައެވެ. އެގޮތުން މެޗު ފަށައިގެން ހަވަނަ މިނެޓުގައި ހަމްޒާ މުޙައްމަދު (ހަމްޕު) އާއި އަލީ ފާސިރު (ސެންޓޭ) ފޮނުވާލި ހަމަލާތައް ނޭޕާލުގެ ޑިފެންޑަރުން ވަނީ ދިފާއުކޮށްފައެވެ.

އޭގެ ފަހުން މެޗުގެ 19 ވަނަ މިނެޓުގައި އޭރިއާ ބޭރުން ސެންޓޭ ފޮނުވާލި ހަމަލާއެއް ނޭޕާލުގެ ގޯލްކީޕަރު ކިރަން ޝެމްޝޮން ދިފާއުކުރިއިރު، މެޗުގެ 27 ވަނަ މިނެޓުގައި ހުސެއިން ސިފާއު ޔޫސުފް (ކުރޯ) ހުރަސްކޮށްދިން ބޯޅައަކުންވެސް ސެންޓޭ ވަނީ ބޮލުން ހަމަލާއެއް އުފައްދާފައެވެ. އެކަމަކު އެ ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. އަދި އޭގެ ފަހުން މެޗުގެ 33 ވަނަ މިނެޓުގައި ނޭޕާލުގެ ދެ ކުޅުންތެރިއެއް ކައިރިން ނައްޓާލުމަށްފަހު އިތުބާރު ފޯވާޑް އަލީ އަޝްފާގު (ދަގަނޑޭ) ފޮނުވާލި ބޯޅައެއްވެސް ކިރަން ވަނީ ހުއްޓުވާފައެވެ.

މި މެޗުގެ ދެވަނަ ހާފު ފަށައިގެން ނޭޕާލުން ކުޅުން ރަނގަޅުކުރި ނަމަވެސް، މި ހާފު ފަށައިގެން 14 ވަނަ މިނެޓުގައި ސންޓޭ ހުރަސް ކޮށްދިން ބޯޅައަކުން ސަމޫހް އަލީ ސަމުއްޓެ ވަނީ ބޮލޫން ނުރައްކާތެރި ހަމަލާއެއް ފޮނުވާލާފައެވެ. އެ ހަމަލާގެ ހުރަހަކަށްވީ ނޭޕާލުގެ ގޯލްކީޕަރު ކިރަންއެވެ.

މި މެޗުގެ 65 ވަނަ މިނެޓުގައި ނޭޕާލުގެ އަންޖަން ބިސްޓާއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ރާއްޖޭގެ ގޯލްކީޕަރު މުޙައްމަދު ފައިސަލް ވަނީ ދިފާއުކޮށްފައެވެ. އޭގެ ފަހުން މެޗުގެ 75 ވަނަ މިނެޓުގައި އޭރިއާ ތެރެއިން ދަގަނޑޭއަށް ހުސް ފުރުސަތެއް ލިބުނު ނަމަވެސް، އޭނާ ފޮނުވާލި ހަމަލާ ދިޔައީ ގޯލާ އަމާޒުނުވެއެވެ. އަދި އޭގެ ހަތަރު މިނެޓު ފަހުން ނާއިޒް ހަސަން (ދާދު) ފޮނުވާލި ހަމަލާއެއްވެސް ދިޔައީ ގޯލުގެ ހުރަސް ދަނޑި ކައިރިން ބޭރަށެވެ.

މި މެޗުގައި ނޭޕާލުން ލީޑު ނަގާފައިވަނީ މެޗު ނިމެން ފަސް މިނެޓަށް ވެފައި ވަނިކޮށެވެ. ކައުންޓަ އެޓޭކެއްގައި މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މަނީޝް ޑަންގީއެވެ.

މި ފަހަރުގެ ސާފް ޗެމްޕިއަންޝިޕުގައި ކުޅުނު ފުރަތަމަ މެޗުން ރާއްޖެ ބަލިވިއިރު، މި މުބާރާތުގައި ރާއްޖޭން ދެން މެޗެއް ކުޅޭނީ އަންނަ ބުރާސްފަތި ދުވަހުގެރެއެވެ. އެރޭ ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ. މި މުބާރާތުގައި ކުޅުނު ފުރަތަމަ މެޗުން ބަންގްލްދޭޝް ވަނީ ސްރީ ލަންކާ އަތުން 1-0 ގެ ނަތީޖާއަކުން މޮޅުވެފައެވެ.