ލަންކާ ބަލިކޮށް ބަންގްލަދޭޝަށް ރަނގަޅު ފެށުމެއް

ދެކުނު އޭޝިއާ ސަރަހައްދުގެ އެންމެ ބޮޑު ފުޓްބޯޅަ މުބާރާތް ކަމަށްވާ "އުރީދޫ ސާފް ޗެމްޕިއަންޝިޕް 2021" ގެ ފެށުން ބަންގްލަދޭޝްއިން ރަނގަޅުކޮށްފިއެވެ.

ހުކުރު ދުވަހުގެ ހަވީރު ގައުމީ ފުޓްބޯޅަ ދަނޑުގައި ކުޅުނު މެޗުން ބަންގްލަދޭޝް މޮޅުވީ ސްރީ ލަންކާ އަތުން 1-0 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ފެނިފައި ނުވި ނަމަވެސް، މި ހާފުގައި ލަނޑެއް ޖަހަން ރަނގަޅު ފުރުސަތުތަކެއް ލިބިގެންދިޔައީ ބަންގްލަދޭޝްއަށެވެ. އެގޮތުން މެޗުގެ 39 ވަނަ މިނެޓުގައި އެ ޓީމުގެ ޖެވެލް ރަނާއަށް އޭރިއާ ތެރެއިން ރަނގަޅު ފުރުސަތެއް ލިބުނު، އޭނާއަށް އެ ބޯޅަ އެންމެ ރަނގަޅަށް ފޮނުވާލެވިފައެއް ނުވެއެވެ.

އޭގެ ފަހުން ފުރަތަމަ ހާފުގެ އިތުރު ވަގުތުގައި ޔަސީން އަރަފާތު ހުރަސްކޮށްދިން ބޯޅައަކުން ބަންގްލަދޭޝްގެ ޓޯޕޫ ބަރްމަން ވަނީ ބޮލުން ނުރައްކާތެރި ހަމަލާއެއް ފޮނުވާލާފައެވެ. އެކަމަކު ލަންކާގެ ގޯލްކީޕަރު އަދި އެ ޓީމުގެ ކެޕްޓަން ސުޖަން ޕެރޭރާ ވަނީ ހިށިޔާރުކަމާއެކު އެ ހަމަލާ ދިފާއުކޮށްފައެވެ.

މި މެޗުގައި ފެނިގެންދިޔަ ހަމައެކަނި ލަނޑު ބަންގްލަދޭޝްއިން ކާމިޔާބުކޮށްފައިވަނީ ދެވަނަ ހާފު ފަށައިގެން 11 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ޓޯޕޫއެވެ. މިއީ އޭރިއާ ތެރެއިން ލަންކާގެ ޑަކްސަން ޕުސްލަސްގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ. އަދި އޭގެ ފަހުން ރެފުރީއާ ނުރުހުން ފާޅުކޮށް ވާހަކަދެއްކުމުން ޑަކްސަންއަށް ވަނީ ދެވަނަ ރީނދޫ ކާޑާއެކު ރަތް ކާޑެއް ދައްކާފައެވެ.

އޭގެ ފަހުން ނަތީޖާ އެއްވަރުކުރަން ލަންކާއަށް އެންމެ ރަނގަޅު ފުރުސަތެއް ލިބުނީ އެ ޓީމުގެ އަހުމަދު ވަސީމް ރަޒީކަށެވެ. އެކަމަކު މެޗުގެ 76 ވަނަ މިނެޓުގައި އޭނާ ފޮނުވާލި ހަމަލާ ބަންގްލަދޭޝްގެ ގޯލްކީޕަރު ވަނީ ދިފާއުކޮށްފައެވެ.

މި ފަހަރުގެ ސާފް ޗެމްޕިއަންޝިޕުގައި ބަންގްލަދޭޝް ޓީމަށް އިރުޝާދުދެމުން އަންނަނީ އެ ގައުމުގެ ބަންޝުންދަރާ ކިންގްސްއަށް އިރުޝާދުދެމުން އައި ސްޕެއިނުގެ ކޯޗު އޮސްކާ ބްރުޒޮންއެވެ. ބަންގްލަދޭޝް ފުޓްބޯޅަ ފެޑެރޭޝަނުން ވަނީ މި މުބާރާތަށް އެ ޓީމުގެ ކޯޗަކަށް އޮސްކާ ހަމަޖައްސައި، މީގެ ކުރިން ކޯޗުގެ މަގާމުގައި ހުރި އިނގިރޭސި ކޯޗު ޖެމީ ޑޭ ވަގުތީ ގޮތުން މަގާމުން ދުރުކޮށްފައެވެ.

އޮސްކާ އިރުޝާދުދިން ފުރަތަމަ މެޗުން ބަންގްލަދޭޝް މޮޅުވިއިރު، އެ ޓީމުން މި ފަހަރުގެ ސާފް ޗެމްޕިއަންޝިޕުގައި ދެން މެޗެއް ކުޅޭނީ އަންނަ ހޯމަ ދުވަހުއެވެ. އެ ދުވަހުގެ ހަވީރު ބަންގްލަދޭޝް ނުކުންނާނީ އިންޑިއާއާ ދެކޮޅަށެވެ.