ދިވެހި ކޯޗުންނަށް އިތުބާރު ހޯދުމަށް ސާފް ޗެމްޕިއަންޝިޕް މުހިންމު: ސުޒޭން

ދިވެހި ކޯޗުންނަށް އިތުބާރު ހޯދުމަށް މި ފަހަރުގެ "އުރީދޫ ސާފް ޗެމްޕިއަންޝިޕް 2021" މުހިންމު ކަމަށް ގައުމީ ފުޓުބޯޅަ ޓީމުގެ ކޯޗު އަލީ ސުޒޭން ބުނެފިއެވެ.

އަންނަ ހުކުރު ދުވަހުން ފެށިގެން އޮކްޓޯބަރު މަހުގެ 16 ވަނަ ދުވަހުގެ ނިޔަލަށް ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެކުލަވާލާފައިވަނީ މުޅިން ދިވެހި ކޯޗުންގެ ޓީމެކެވެ. އެގޮތުން ސާފް ޗެމްޕިއަންޝިޕުގައި ރާއްޖޭގެ ގައުމީ ޓީމުގެ ކޯޗެއްގެ ގޮތުގައި ސުޒޭން ހަރަކާތްތެރިވާއިރު، އެސިސްޓަންޓް ކޯޗުންގެ ގޮތުގައި މަސައްކަތް ކުރާނީ އިސްމާޢީލް މަހްފޫޒް (އިންމަ) އާއި، ގައުމީ ޓީމުގެ ކުރީގެ ގޯލްކީޕަރު އިމްރާން މުޙައްމަދެވެ. މީގެ އިތުރުން ގޯލްކީޕަރު ޓްރެއިނަރެއްގެ ގޮތުގައި ހަރަކާތްތެރިވާނީ އަސްލަމް އަބްދުލް ރަހީމެވެ.

އެއާއެކު ސައްތައިން ސައްތަ އެ ގައުމަކަށް ނިސްބަތްވާ ކޯޗުންގެ ޓީމަކާއެކު މުބާރާތަށް ނުކުންނާނީ ރާއްޖޭން އެކަންޏެވެ.

މުބާރާތުގެ ފުރަތަމަ މެޗުގައި ހުކުރު ދުވަހުގެރޭ ނޭޕާލާ ދެކޮޅަށް ނުކުތުމުގެ ކުރިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒޭން ބުނީ ދިވެހި ކޯޗުންނަށް އިތުބާރުކުރުމުގެ ބައި ރާއްޖޭގައި އޮތީ ކޮންމެވެސް ވަރަކަށް ކުޑަކޮށް ކަމަށާއި، އެހެންކަމުން މި ފަހަރުގެ ސާފް ޗެމްޕިއަންޝިޕް ކާމިޔާބުކުރެވިއްޖެނަމަ، ގައުމީ ޓީމުގައި މިތިބަ ދިވެހި ކޯޗުންގެ އިތުރުން ޓީމުން ބޭރުގައި ތިބި ދިވެހި ކޯޗުންނަށްވެސް އޭގެ ފައިދާކުރާނެ ކަމަށެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރިއިރު، މީގެ ކުރިން ކޮވިޑް-19 އަށް ޕޮޒިޓިވްވުމުން ސުޒޭނަށް ވަނީ ކޭމްޕުގެ ބޮޑުބައި ގެއްލިފައެވެ. އެއާއެކު ގަތަރުގައި ގައުމީ ޓީމުގެ ކަންކަން ބަލަހައްޓާފައިވަނީ އިންމައެވެ. މި ކޭމްޕުގައި ރާއްޖޭން ވަނީ އެކުވެރިކަމުގެ ދެ މެޗެއް ކުޅެފައެވެ. އެގޮތުން ފުރަތަމަ މެޗުގައި މިދިޔަ ހަފުތާގެ އަންގާރަ ދުވަހުގެރޭ ގަތަރުގެ ދެވަނަ ޑިވިޝަނުގެ ލުސައިލް އެސްސީ އަތުން ރާއްޖެ މޮޅުވީ 4-3 ގެ ނަތީޖާއަކުންނެވެ. އަދި ހޮނިހިރު ދުވަހުގެރޭ ކުޅުނު ދެވަނަ މެޗުން ވަނީ ގަތަރުގެ އާމީ ނެޝަނަލް ޓީމާ ވާދަކޮށް 1-1 ގެ ނަތީޖާއަކުން އެއްވަރުވެފައެވެ.

މި ކޭމްޕްގައި އެންމެ ފުރަތަމަ ރާއްޖޭން ތިން މެޗެއް ކުޅެން ހަމަޖެހުނު ނަމަވެސް، ސްރީ ލަންކާއާ ދެކޮޅަށް ކުޅެން ރޭވި ބައިނަލްއަގުވާމީ އެކުވެރިކަމުގެ މެޗު ކެންސަލްވީ ގަތަރުގެ ވިސާ ނުލިބިގެން ލަންކާއަށް ނާދެވުމުންނެވެ.

ސުޒޭން ބުނީ ގައުމީ ޓީމުގެ ތައްޔާރީތައް ދިޔައީ ވަރަށް ފުރިހަމަކޮށް ކަމަށެވެ. އެގޮތުން ކޭމްޕުގައި ކުރަން ބޭނުންވި ހުރިހާ ކަމެއް ހާސިލުވި ކަމަށާއި، އަދި ލަންކާއާ ދެކޮޅަށް ކުޅެން އުޅުނު މެޗު ނުކުޅެވުމަކުން މާ ބޮޑު މައްސަލަތަކެއް ދިމާވެދާނެ ކަމަށް އުއްމީދު ނުކުރާ ކަމަށްވެސް ބުންޏެވެ.

މި ފަހަރުގެ ސާފް ޗެމްޕިއަންޝިޕުގައި ނޭޕާލާ ދެކޮޅަށް ރާއްޖެ ނުކުންނައިރު، ރާއްޖޭން 2018 ވަނަ އަހަރު ބަންގްލަދޭޝްގެ ވެރިރަށް ޑާކާގައި ބޭއްވި ސާފް ޗެމްޕިއަންޝިޕުގެ ސެމީ ފައިނަލުގައި ވަނީ 3-0 ގެ ނަތީޖާއަކުން ނޭޕާލް ބަލިކޮށްފައެވެ. އަދި ސާފް ޗެމްޕިއަންޝިޕުގައި މިހާތަނަށް ރާއްޖޭން ވަނީ ނޭޕާލާ ދެކޮޅަށް ހަތް މެޗެއް ކުޅެފައެވެ. އޭގެ ތެރެއިން ދެ މެޗު އެއްވަރުވެގެން ނިމުނުއިރު، އަނެއް ފަސް މެޗުން ރާއްޖެ ވަނީ މޮޅުވެފައެވެ.

ސާފް ޗެމްޕިއަންޝިޕް ހުޅުވުމުގެ ރަސްމިއްޔާތު ހުކުރު ދުވަހުގެރޭ ބާއްވާއިރު، އެ ރަސްމިއްޔާތަށްފަހު ނޭޕާލާއި ރާއްޖެ ބައްދަލުކުރާ މެޗު ފަށާނީ 21:00 ގައެވެ.