އަންނަ ހުކުރު ދުވަހު މާލޭގައި ފެށުމަށް ހަމަޖެހިފައިވާ "އުރީދޫ ސާފް ޗެމްޕިއަންޝިޕް 2021" ގެ ވާދަކުރާ ހުރިހާ ޓީމެއް ރާއްޖެ އަތުވެއްޖެއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ ހުކުރު ދުވަހުން ފެށިގެން އޮކްޓޯބަރު މަހުގެ 16 ވަނަ ދުވަހުގެ ނިޔަލަށެވެ.

ސާފް ސަރަހައްދުގައި ހަތް ގައުމެއް ހިމެނޭއިރު، މި މުބާރާތުގައި ވާދަކުރަނީ ރާއްޖޭގެ އިތުރުން އިންޑިއާ އާއި، ނޭޕާލާއި، ސްރީ ލަންކާ އަދި ބަންގްލަދޭޝެވެ. ކޮވިޑް-19 އާ ގުޅިގެން ބޫޓާނުން މި ފަހަރުގެ މުބާރާތުގައި ވާދަނުކުރާއިރު، ފީފާގެ ސަސްޕެންޝަނެއްގައި އޮތުމުން ޕާކިސްތާނަށް މި މުބާރާތުގައި ވާދައެއް ނުކުރެވެއެވެ. އެހެންކަމުން މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

މި މުބާރާތުގައި ވާދަކުރުމަށް ހޯމަ ދުވަހުގެ ވަގުތެއްގައި ނޭޕާލް ޓީމު ވަނީ ރާއްޖެ އައިސްފައެވެ. ދެން އޮތް އަނެއް ތިން ޓީމު ކަމަށްވާ ލަންކާ އާއި، އިންޑިއާ އަދި ބަންގްލަދޭޝް ޓީމު ރާއްޖެ އައީ އަންގާރަ ދުވަހުގެ ވަގުތެއްގައެވެ.

އަންނަ ހުކުރު ދުވަހު ސާފް ޗެމްޕިއަންޝިޕުގެ ކުޅުން ފަށާއިރު، މުބާރާތުގައި ކުޅޭ ފުރަތަމަ މެޗުގައި ހުކުރު ދުވަހުގެ ހަވީރު ބައްދަލުކުރާނީ ސްރީ ލަންކާ އާއި ބަންގްލަދޭޝްއެވެ. މުބާރާތް ހުޅުވުމުގެ ރަސްމިއްޔާތު ހުކުރު ދުވަހުގެރޭ ބާއްވާއިރު، އެ ރަސްމިއްޔާތަށްފަހު އެރޭ ކުޅޭ މެޗުގައި ބައްދަލުކުރާނީ ރާއްޖެ އާއި ނޭޕާލެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވުމުގެ ގޮތުން ރާއްޖޭގެގައުމީ ޓީމުން ވަނީ މި މަހުގެ 10 ވަނަ ދުވަހު ގަތަރުގައި ކޭމްޕުކޮށްފައެވެ. އެ ކޭމްޕް ފުރިހަމަކުރުމަށްފަހު ހޯމަ ދުވަހުގެ ހެނދުނު ގައުމީ ޓީމު އެނބުރި މާލެ އައިރު، މާލޭގައި ގައުމީ ޓީމު ކޭމްޕުކޮށްފައިވަނީ ހޮޓެލް ޖެންގައެވެ.

ގަތަރުގައި ކުރިއަށްގެންދިޔަ ކޭމްޕުގައި ރާއްޖޭން ވަނީ އެކުވެރިކަމުގެ ދެ މެޗެއް ކުޅެފައެވެ. އެގޮތުން ފުރަތަމަ މެޗުގައި މިދިޔަ ހަފުތާގެ އަންގާރަ ދުވަހުގެރޭ ގަތަރުގެ ދެވަނަ ޑިވިޝަނުގެ ލުސައިލް އެސްސީ އަތުން ރާއްޖެ މޮޅުވީ 4-3 ގެ ނަތީޖާއަކުންނެވެ. އަދި ހޮނިހިރު ދުވަހުގެރޭ ކުޅުނު ދެވަނަ މެޗުން ވަނީ ގަތަރުގެ އާމީ ނެޝަނަލް ޓީމާ ވާދަކޮށް 1-1 ގެ ނަތީޖާއަކުން އެއްވަރުވެފައެވެ.

މި ކޭމްޕުގައި އެންމެ ފުރަތަމަ ރާއްޖޭން ތިން މެޗެއް ކުޅެން ހަމަޖެހުނު ނަމަވެސް، ސްރީ ލަންކާއާ ދެކޮޅަށް ކުޅެން ރޭވި ބައިނަލްއަގުވާމީ އެކުވެރިކަމުގެ މެޗު ކެންސަލްވީ ގަތަރުގެ ވިސާ ނުލިބިގެން ލަންކާއަށް ނާދެވުމުންނެވެ.

ކޭމްޕަށްފަހު ގައުމީ ޓީމު މާލެ އައިސްފައިވާއިރު، މިދިޔަ އާދީއްތަ ދުވަހުގެރޭ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ސާފް ޗެމްޕިއަންޝިޕަށް އެކުލަވާލި 24 ކުޅުންތެރިންގެ ފައިނަލް ސްކޮޑް އިއުލާންކޮށްފައެވެ. އެ ސްކޮޑުން ބާކީކުރި ފަސް ކުޅުންތެރިންނަކީ ތިން ޑިފެންޑަރުން ކަމަށްވާ އަލީ ޝާމިސް (ތޮއްޕޭ) އާއި، އަޙްމަދު އަބްދުﷲ (ލިލީ) އާއި، މޫސާ ޔާމީން (ޔާމްބެ) އާއި، މިޑްފީލްޑަރު ޔަސްފާދު ހަބީބު (މުލަކޭ) އަދި ޒުވާން ފޯވާޑް ހަސަން ނަޒީމް (ޗޯޓު) އެވެ.