އަންނަ ހުކުރު ދުވަހު މާލޭގައި ފެށުމަށް ހަމަޖެހިފައިވާ "އުރީދޫ ސާފް ޗެމްޕިއަންޝިޕް 2021" ގެ ޓިކެޓް ބުދަ ދުވަހު ވިއްކަން ފަށާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނެފިއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ ހުކުރު ދުވަހުން ފެށިގެން އޮކްޓޯބަރު މަހުގެ 16 ވަނަ ދުވަހުގެ ނިޔަލަށެވެ. 

އެފްއޭއެމުން މައުލޫމާތުދޭ ގޮތުން ބުދަ ދުވަހު ހެނދުނު 10:00 އިން ފެށިގެން ވިއްކާނީ ސާފް ޗެމްޕިއަންޝިޕުގެ ފުރަތަމަ ދުވަހު ކުޅޭ ދެ މެޗުގެ ޓިކެޓުތަކެވެ. އަދި ކޮންމެ މެޗެއްގެ ޓިކެޓުތައްވެސް ވިއްކާނީ އެ މެޗު ކުޅޭ ދުވަހެއްގެ ކުރިން ކަމަށްވެސް އެފްއޭއެމުން މައުލޫމާތުދެއެވެ.

ސާފް ޗެމްޕިއަންޝިޕުގެ ޓިކެޓުތައް ގައުމީ ފުޓްބޯޅަ ދަނޑުން ވިއްކާއިރު، ރާއްޖޭގެ މެޗުގެ ޓިކެޓުތައް ވިއްކާނީ އޮލިމްޕަސް ކުރިމައްޗަށް އިންނަ ޓިކެޓް ކައުންޓަރުންނެވެ. ސާފް ޗެމްޕިއަންޝިޕަށް ގޮނޑިބަރީގެ ޓިކެޓެއް ވިއްކާނީ 100 ރުފިޔާއަށެވެ. އަދި ސިޑިބަރީގެ ޓިކެޓުގެ އަގަކީ 75 ރުފިޔާއެވެ.

ސާފް ޗެމްޕިއަންޝިޕުގެ މެޗުތައް ބަލަން ދަނޑަށް ސަޕޯޓަރުން ވެއްދުމުގެ ހުއްދަ ލިބިފައިވާއިރު، މީގެ ކުރިން މީހުން ވެއްދުން މަނާކޮށްފައިވާ ދެކުނު ފަރާތް (ސަހާރާ ފަޅި) ގެ ސިޑިބަރިތައް މަރާމާތުކޮށް، އެ ސިޑިބަރީގެ ތިރީ ބަޔަށް ސަޕޯޓަރުން ވައްދަން މިހާރު ވަނީ ހަމަޖެހިފައެވެ.

އެފްއޭއެމުން މައުލޫމާތުދޭ ގޮތުން ސާފް ޗެމްޕިއަންޝިޕުގެ ޓިކެޓް ވިއްކާނީ ކޮވިޑް-19 ވެކްސިންގެ ދެ ޑޯޒް ފުރިހަމަކޮށްފައިވާ މީހުންނަށެވެ. އެެހެންކަމުން ޓިކެޓް ވިއްކާނީ ވެކްސިން ކާޑު އޮތް މީހުންނަށް ކަމަށާއި، އަދި މެޗަށް ވަންނައިރުވެސް ވެކްސިން ކާޑު ބޭނުންވާނެ ކަމަށް އެފްއޭއެމުން މައުލޫމާތުދެއެވެ.

މި ފަހަރުގެ ސާފް ޗެމްޕިއަންޝިޕް ހުޅުވާ ރަސްމިއްޔާތު އަންނަ ހުކުރު ދުވަހުގެރޭ ބާއްވާއިރު، އެ ރޭ ބައްދަލުކުރާނީ ރާއްޖެ އާއި ނޭޕާލެވެ. އޭގެ ކުރިން އެ ދުވަހުގެ ހަވީރު ސްރީ ލަންކާ އާއި ބަންގްލަދޭޝް ބައްދަލުކުރާނެއެވެ.

ސާފް ޗެމްޕިއަންޝިޕުގައި ރާއްޖޭން ކުޅޭ ފުރަތަމަ މެޗުގައި ނޭޕާލާ ދެކޮޅަށް ނުކުންނައިރު، ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ރާއްޖެ ނުކުންނާނީ ބަންގްލަދޭޝްއާ ދެކޮޅަށެވެ. އަދި ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ލަންކާއާ ދެކޮޅަށް ރާއްޖެ ނުކުންނައިރު، ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.

މި ފަހަރުގެ ސާފް ޗެމްޕިއަންޝިޕް ރާއްޖޭގައި ބާއްވާއިރު، މިއީ ރާއްޖޭގައި މި މުބާރާތް ބާއްވާ ދެވަނަ ފަހަރެވެ. އެގޮތުން 2008 ވަނަ އަހަރުގެ މުބާރާތް ރާއްޖެ އާއި ސްރީ ލަންކާގައި ބޭއްވިއިރު، ރާއްޖެއިން ވަނީ އެ ފަހަރުގެ މުބާރާތް ކާމިޔާބުކޮށްފައެވެ. އެއީ ރާއްޖެއިން ސާފް ޗެމްޕިއަންޝިޕް ކާމިޔާބުކުރި ފުރަތަމަ ފަހަރެވެ. އަދި މި މުބާރާތް އެންމެ ފަހުން ބަންގްލަދޭޝްގައި ބޭއްވިއިރު، ރާއްޖެއިން ވަނީ ޑާކާގައި 2018 ވަނަ އަހަރު ބޭއްވި މުބާރާތުގެ ފައިނަލުގައި އިންޑިއާ ބަލިކޮށް ޗެމްޕިއަންކަން ހޯދާފައެވެ.