ފިރިމީހާ މަރާލި މައްސަލައިގައި ނަޒާހާގެ ފަރާތުން ސުޕްރީމް ކޯޓަށް ހުށައެޅި އިސްތިއުނާފު ބަލައިގެންފި

ކުރީގެ ފިރިމީހާ މަރާލި ކަމުގެ ކުށުގައި އުމުރަށް ޖަލަށް ލުމަށް ކްރިމިނަލް ކޯޓުން ކުރި ހުކުމަށް ހައިކޯޓުން ވެސް ތާއީދުކޮށްފައިވާ ހެންވޭރު ބައިކެނޑިގޭ މަރިޔަމް ނަޒާހާގެ ފަރާތުން ސުޕްރީމް ކޯޓުގައި އިސްތިއުނާފު ކުރި މައްސަލަ އެ ކޯޓުން ބަލައިގެންފިއެވެ.

ނަޒާހާގެ ފަރާތުން މި މައްސަލަ ސުޕްރީމް ކޯޓަށް ހުށައެޅުމުން ކޯޓުން ފުރަތަމަ ނިންމީ މައްސަލަ ބަލައިނުގަތުމަށެވެ. ސަބަބަކީ ނަޒާހާގެ ފަރާތުން މި މައްސަލަ އިސްތިއުނާފު ކުރަން ހުށައެޅީ މައްސަލަ ނިންމިތާ 6 އަހަރާއި، 1 މަހާއި 5 ދުވަސް ފަހުން 5 ޖުލައި 2021 ގައި ކަމަށްވާތީއެވެ. ނަމަވެސް ނަޒާހާގެ ފަރާތުން އެ ނިންމުން ސުޕްރީމް ކޯޓުގައި އިސްތިއުނާފު ކުރުމާއެކު، ސެޕްޓެމްބަރު މަހުގެ 22 ވަނަ ދުވަހު ވަނީ މި މައްސަލައިގެ އިޖުރާއީ އަޑުއެހުމެއް ބާއްވާފައެވެ.

އެ ދުވަހުގެ އަޑުއެހުމުގައި ނަޒާހާގެ ވަކީލާ ވިދާޅުވީ، އޭރު މި މައްސަލައާ ގުޅުވައި ނަޒާހާގެ ދަރިފުޅާއި އޭނާގެ އާއިލާއަށް އެކި ކަހަލަ ފުރައްސާރަ ކުރިމަތިވިކަމަށެވެ. އެގޮތުން އެމީހުންނަށް އިތުރު ތަކުލީފެއް ނުދިނުމަށް އޭރު އޭނާ މިކަމުގައި ކުރިއަށް ނުދިޔައީ ކަމަށާއި، ނަމަވެސް މިހާރު ދަރިފުޅު ބޮޑުވެ، ކަންކަން ވިސްނޭވަރު ވެފައިވާތީ ލަހުން ނަމަވެސް، އޭނާގެ އަޑު ޝަރީއަތަށް އިއްވަންޖެހޭކަން ނަޒާހާއަށް ޤަބޫލު ކުރެވޭ ކަމަށް ވަކީލު ވިދާޅުވިއެވެ.

ނަޒާހާގެ ވަކީލު ނިހާޔަތު ވިދާޅުވީ، ނަޒާހާއަކީ ގިނަ އަހަރުތަކެއް ވަންދެން އޭނާގެ ފިރިމީހާގެ ފަރާތުން ގެވެށި އަނިޔާ ލިބެމުންދިޔަ ފަރާތެއް ކަމަށެވެ. އެކަން ސިއްޙީ ރެކޯޑުތަކުން ވެސް ދައްކާކަން ނިހާޔަތު ފާހަގަކުރެއްވިއެވެ. އެހެންނަމަވެސް މިއަދާ ހަމައަށްވެސް އޭނާއަށް ކުރިމަތިވި އަނިޔާތަކާއި ނަފްސާނީ ގެއްލުން ވަޒަން ކުރުމަށް އެއްވެސް ވަރަކަށް އެސެސްމަންޓެއް ހެދިފައިނުވާކަން ފާހަގަކުރައްވައި ނިހާޔަތު ވިދާޅުވީ، އޭނާ މިހާތަނަށް ވެސް ނަފްސާނީ އަނިޔާތައް ތަޙައްމަލު ކުރަމުންދާ ކަމަށެވެ. އަދި އޭރު ނަޒާހާގެ ދަރިއަކު ވެސް ހުރި ކަމަށާއި، ދަރިފުޅުގެ ޙައްޤުގައި ވެސް ވިސްނަންޖެހޭ ކަންކަން ހުރި ކަމަށް ނިހާޔަތު ވިދާޅުވިއެވެ.

އެ ދުވަހުގެ އަޑުއެހުމުގައި ނަޒާހާ ވެސް ވާހަކަ ދައްކާފައިވެއެވެ. އެގޮތުން މި މައްސަލައިގެ ސަބަބުން ދަރިފުޅަށް ސުކޫލުންނާއި އެހެން ދަރިވަރުންގެ ފަރާތުން ކުރިމަތިވި ކަންކަމާއި، އާއިލާ މީހުންނަށް ވަޒީފާގެ މާހައުލުގައި ކުރިމަތިވި ކަންކަން ނަޒާހާ ވަނީ ހިއްސާކޮށްފައެވެ. އަދި ދަރިފުޅަށް އެއްވެސް ކަހަލަ ނަފްސާނީ މައްސަލައެއް ކުރިމަތިވާން ނޭދޭތީއާއި، ދަރިފުޅު ބޮޑުވުމުން ވިސްނައިދިނުމަށްފަހު އެކަމުގައި ކުރިއަށްދާން މަޑުކުރީކަން ނަޒާހާ ފާހަގަ ކުރިއެވެ.

އިޖުރާއީ އަޑުއެހުމުގައި ދައުލަތުގެ ވަކީލާ ވިދާޅުވީ، މި މައްސަލަ ހައިކޯޓުން ނިންމިއިރު އިސްތިއުނާފު ކުރުމަށް 60 ދުވަހުގެ މުއްދަތެއް ދީފައިވާ ކަމަށެވެ. އަދި އެ މުއްދަތަށް އިސްތިސްނާއެއް އަންނަނީ އަމިއްލަ ބާރު ނުފޯރާ ކަމެއް މެދުވެރިވެގެން އެ މުއްދަތުގައި ހުށަނޭޅޭ މައްސަލަތައް އެކަނި ކަމަށެވެ. ނަޒާހާގެ ފަރާތުން މި މައްސަލަ އިސްތިއުނާފު ކުރަން ހުށައެޅިއިރު އޭނާ ހުށައަޅާފައިވާ ސަބަބުތަކަކީ އެކަށީގެންވާ އަދި އަމިއްލަ ބާރު ނުފޯރުވޭފަދަ މަޤްބޫލު ސަބަބެއްކަމަށް ދައުލަތަށް ނުފެންނަކަން ވަކީލާ ފާހަގަ ކުރެއްވިއެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ފަނޑިޔާރުންގެ މެދުގައި ބަހުސް ކުރެއްވުމަށްފަހު، ނިންމަވާ ގޮތެއް ލިއުމުން އަންގަވާނެކަމަށް ޝަރީއަތުން އޭރު ފާހަގަކުރިއެވެ. އެގޮތުން ނަޒާހާގެ ފަރާތުން ހުށައަޅާފައިވާ މި މައްސަލަ ބަލައިގަތުމަށް މައްސަލަ ބައްލަވާ ފަނޑިޔާރުންގެ ބެންޗުން މިހާރު ނިންމާފައިވާކަން ރާއްޖެއެމްވީއަށް ވަނީ މައުލޫމާތު ލިބިފައެވެ. އެކަން ނަޒާހާގެ ވަކީލުވެސް ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.

ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު އަލީ ރަޝީދު ހުސައިން، ޑރ އަޒްމިރަލްދާ ޒާހިރު އަދި މުޙައްމަދު އިބްރާހިމްއެވެ.