ހަކީމީގެ ލަނޑުން ފަހު ވަގުތު ޕީއެސްޖީއަށް މޮޅެއް

ފްރެންޗް ލީގުގައި ބުދަ ދުވަހުގެރޭ މޮރޮކޯގެ ޑިފެންޑަރު އަޝްރަފް ހަކީމީ ފަހު ވަގުތު ޖަހައިދިން ލަނޑުން މެޓްޒް އަތުން ޕީއެސްޖީ މޮޅުވެއްޖެއެވެ.

ރަށުން ބޭރުގައި ކުޅުނު މެޗުން ޕީއެސްޖީ މޮޅުވީ 2-1 ގެ ނަތީޖާއަކުންނެވެ.

ވާތު ކަކުލަށް ދާދި ފަހުން ލިބުނު އަނިޔާއަކާ ގުޅިގެން މި މެޗުގައި އާޖެންޓީނާގެ ތަރި ލިއޮނެލް މެސީ ކުޅެފައެއް ނުވެއެވެ. އަދި ޔުއެފާ ޗެމްޕިއަންސް ލީގުގައި އަންނަ ހަފުތާގައި މެންޗެސްޓާ ސިޓީއާ ދެކޮޅަށް ޕީއެސްޖީން ކުޅޭ މެޗަށްވެސް މެސީ ފިޓުވާނެކަމާމެދު ވަނީ ސުވާލު އުފެދިފައެވެ.

ބުދަ ދުވަހުގެރޭ ކުޅުނު މެޗު ފަށައިގެން ޕީއެސްޖީން ރަނގަޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެ ޓީމުން ވަނީ ލީޑު ނަގާފައެވެ. މެޗު ފަށައިގެން ފަސްވަނަ މިނެޓުގައި އޭރިއާ ތެރެއިން ލިބުނު ފުރުސަތަކުން މި ލަނޑު އެ ޓީމަށް ކާމިޔާބުކޮށްދިނީ ހަކީމީއެވެ. އެކަމަކު ފުރަތަމަ ހާފު ނިމުމުގެ ކުރިން މެޓްޒްއިން ވަނީ ނަތީޖާ އެއްވަރުކޮށްފައެވެ. ކޯނަރަކުން މެޗުގެ 39 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ކިކީ ކޮޔާޓޭއެވެ.

މެޗުގެ ދެވަނަ ހާފުގައި ޕީއެސްޖީގެ ފަރާތުން އާދައިގެ ކުޅުމެއް ފެނިގެންދިޔަ ނަމަވެސް، މެޗު ނިމެން ގާތް ވެފައި ވަނިކޮށް މެޓްޒްއަށް މައްސަލަތަކެއް ކުރިމަތިވީ އިތުރު ވަގުތުގެ ފުރަތަމަ މިނެޓުގައި އެ ޓީމުގެ ކެޕްޓަން ޑިލަން ބްރޮންއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ. އަދި ރެފުރީގެ ނިންމުންތަކާ ދެކޮޅު ހަދާ ވާހަކަ ދެއްކުމުން މެޓްޒްގެ ކޯޗު ފްރެޑެރިކް އެންޓޮނެޓީއަށް ވަނީ ސީދާ ރަތް ކާޑެއް ދައްކާފައެވެ.

އެއާއެކު މެޗުގެ އިތުރު ވަގުތުގެ ފަސްވަނަ މިނެޓުގައި ޕީއެސްޖީން ވަނީ މި މެޗުގައި ލީޑު ނަގާފައެވެ. ނޭމާ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ހަކީމީއެވެ.

މި މޮޅާއެކު ޕީއެސްޖީ ވަނީ ލީގުގައި މިހާތަނަށް ކުޅުނު ހަތް މެޗުންވެސް މޮޅުވެފައެވެ. ކުޅުނު ހަތް މެޗުން ލިބުނު 21 ޕޮއިންޓާއެކު ޕީއެސްޖީ އެއްވަނައިގައި އޮތްއިރު، ދެވަނައިގައި އޮތީ ހަ މެޗުން 14 ޕޮއިންޓް ލިބިފައިވާ މާސޭއެވެ. އަދި ޕީއެސްޖީ އަތުން ބަލިވި މެޓްޒް އޮތީ ތާވަލުގެ ފުލުގައި ހަތް މެޗުން ތިން ޕޮއިންޓާއެކުއެވެ.