ކުޅުންތެރިން ދެއްކި ކުޅުން ވަރަށް ރަނގަޅު: އިންމަ

ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގަތަރުގައި ކުރިއަށްދާ ކޭމްޕުގައި ކުޅުނު އެކުވެރިކަމުގެ ފުރަތަމަ މެޗުގައި ކުޅުންތެރިން ދެއްކި ކުޅުން ވަރަށް ރަނގަޅު ކަމަށް ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އިސްމާޢީލް މަހްފޫޒް (އިންމަ) ބުނެފިއެވެ.

އަންގާރަ ދުވަހުގެރޭ ކުޅުނު މެޗުން ރާއްޖެ މޮޅުވީ ގަތަރުގެ ދެވަނަ ޑިވިޝަނުގެ ކުލަބު ލުސައިލް އެސްސީ އަތުން 4-3 ގެ ނަތީޖާއަކުންނެވެ.

ކޮވިޑް-19 އަށް ޕޮޒިޓިވްވުމުން ޓީމާއެކު އެންމެ ފުރަތަމަ ގަތަރު ކޭމްޕަށް ނާދެވުނު ގައުމީ ޓީމުގެ ކޯޗު އަލީ ސުޒޭން ދާދި ފަހުން ޓީމުގެ ކޭމްޕާ ގުޅެން ގަތަރަށް ދިޔަ ނަމަވެސް، މި މެޗުގައި އޭނާ ބައިވެރިވެފައެއް ނުވެއެވެ. އެކަމަކު ދާދި އަވަހަށް ސުޒޭން ޓީމާ ގުޅޭނެ ކަމަށް މައުލޫމާތުލިބެއެވެ.

އަންގާރަ ދުވަހުގެރޭ ކުޅުނު މެޗަށްފަހު ދިން އިންޓަވިއުއެއްގައި އިންމަ ބުނީ ގިނަ ދުވަސްތަކެއް މެެޗެއް ނުކުޅެ ތިބުމަށްފަހު މެޗެއް ކުޅުމުން އޭގެ އުނދަގޫ ކުޅުންތެރިންނަށް ދިމާވާނެ ކަމަށާއި، އެގޮތުން މި މެޗުގެ ފުރަތަމަ 10 މިނެޓުގައި އެކަން ފެނިގެންދިޔަ ކަމަށެވެ. އެކަމަކު އޭގެ ފަހުން ކުޅުންތެރިން ބުރަ މަސައްކަތުން ކުޅުން ރަނގަޅުކުރި ކަމަށްވެސް ބުންޏެވެ.

އިންމަ ބުނީ މި މެޗުގައި ކުޅުންތެރިން ކޮންފިޑެންސާއެކު ކުޅުނު ކަމަށާއި، އެހެންކަމުން މި މެޗުގައި ކުޅުންތެރިން ދެއްކި ކުޅުން ވަރަށް ރަނގަޅު ކަމަށެވެ. އަދި ގޯސް ކަންތައްތައް ތަކަށްވުރެ މި މެޗުގައި ފެނިގެންދިޔަ ރަނގަޅު ކަންތައް މާ ގިނަ ކަމަށާއި، އެހެންކަމުން މި ޕާފޯމަންސް ދަމަހައްޓަން މަސައްކަތްކުރާނެ ކަމަށްވެސް ވަނީ ބުނެފައެވެ.

އިންމަ ބުނީ މި ކޭމްޕުގެ މައިގަނޑު އަމާޒަކީ މި ފަހަރުގެ ސާފް ޗެމްޕިއަންޝިޕް ކަމަށާއި، އެއަށް ފޯކަސް ކޮށްގެން ނަތީޖާ ނެރެން މި މެޗުތަކުގައި މަސައްކަތްކުރާނެ ކަމަށެވެ. އަދި މި މެޗުގައި ފުރުސަތު ނުލިބުނު ކުޅުންތެރިންނަށް ދެން އަންނަ މެޗެއްގައި ފުރުސަތު ލިބިގެންދާނެ ކަމަށް އުއްމީދުކުރާ ކަމަށްވެސް އިންމަ ވަނީ ބުނެފައެވެ.

އަންގާރަ ދުވަހުގެރޭ ކުޅުނު މެޗުން ރާއްޖެ މޮޅުވިއިރު، މި ކޭމްޕުގައި ރާއްޖޭން ކުޅޭ ދެވަނަ މެޗުގައި އަންނަ ހޮނިހިރު ދުވަހު ނުކުންނާނީ ގަތަރުގެ އާމީ ނެޝަނަލް ޓީމާ ދެކޮޅަށެވެ. އަދި ކޭމްޕް ފުރިހަމަކުރުމަށްފަހު ގައުމީ ޓީމު ރާއްޖެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރަމުން އަންނައިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެރޭ ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ރާއްޖެ ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.