ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގަތަރުގައި ކުރިއަށްދާ ކޭމްޕުގައި ކުޅުނު އެކުވެރިކަމުގެ ފުރަތަމަ މެޗުން ގަތަރުގެ ދެވަނަ ޑިވިޝަނުގެ ކުލަބު ލުސައިލް އެސްސީ އަތުން ރާއްޖޭގެ ގައުމީ ފުޓްބޯޅަ ޓީމު މޮޅުވެއްޖެއެވެ.

އަންގާރަ ދުވަހުގެރޭ ކުޅުނު މެޗުން ރާއްޖެ މޮޅުވީ 4-3 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ލުސައިލުންނެވެ. އެކަމަކު މެޗުގެ 28 ވަނަ މިނެޓުގައި އަލީ އަޝްފާގު (ދަގަނޑޭ) ވަނީ ރާއްޖެއަށް ނަތީޖާ އެއްވަރުކޮށްދީފައެވެ. އަދި ފުރަތަމަ ހާފު ނިމުމުގެ ކުރިން އަލީ ހައިޝަމް (ޗުމްޕު) ޖެހި ލަނޑުން ރާއްޖޭން ވަނީ ލީޑު ނަގާފައެވެ.

މި މެޗުގައި ރާއްޖޭން ލީޑު ފުޅާކޮށްފައިވަނީ މެޗުގެ 58 ވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ އަލީ ފާސިރު (ސެންޓޭ) އެވެ. އަދި މެޗުގެ 64 ވަނަ މިނިޓުގައި ޗުމްޕު ވަނީ ރާއްޖޭގެ ހަތަރުވަނަ ލަނޑު ޖަހާފައެވެ. އެކަމަކު އޭގެ ފަހުން ލުސައިލުން ވަނީ ކުޅުން ރަނގަޅުކޮށް، އިތުރު ދެ ލަނޑެއް ޖަހައި، ފަރަގު ކުޑަކޮށްފައެވެ.

ގަތަރުގައި ކުރިއަށްދާ ކޭމްޕުގައި ރާއްޖޭން އެކުވެރިކަމުގެ ދެ މެޗެއް ކުޅޭއިރު، ދެވަނަ މެޗުގައި އަންނަ ހޮނިހިރު ދުވަހު ރާއްޖެ ނުކުންނާނީ ގަތަރުގެ އާމީ ނެޝަނަލް ޓީމާ ދެކޮޅަށެވެ. އަދި ކޭމްޕް ފުރިހަމަކުރުމަށްފަހު ގައުމީ ޓީމު ރާއްޖެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

މި ކޭމްޕުގައި ސްރީ ލަންކާގެ ގައުމީ ޓީމާ ދެކޮޅަށް ބައިނަލްއަގުވާމީ އެކުވެރިކަމުގެ މެޗެއް ކުޅުމަށް ގައުމީ ޓީމުން މަސައްކަތްކުރި ނަމަވެސް، ކޮވިޑް-19 ގެ ސަބަބުން ލަންކާ ޓީމަށް ގަތަރުގެ ވިސާ ހަމަޖެހިފައެއް ނުވެއެވެ. އެއާއެކު ލަންކާއިން މިހާރު ވަނީ އިތުރު ތަމްރީނުތަކަށް ސައުދީ އަރަބިއްޔާއަށް ގޮސްފައެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރަމުން އަންނައިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެރޭ ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ރާއްޖެ ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.