ބުރާސްފަތި ދުވަހުން ފެށިގެން މާފަންނު ޒުވާނުންގެ މަރުކަޒުގައި ގާއިމުކޮށްފައިވާ އިންޑޯ ކޯޓު ބޭނުންކުރުމުގެ ފުރުސަތު ކުޅިވަރު އެސޯސިއޭޝަންތަކަށް ދިނުމަށް ނިންމައިފިއެވެ.
ވޮލީބޯޅަ، ބާސްކެޓްބޯޅަ އަދި ނެޓްބޯޅަ މުބާރާތްތައް ބޭއްވުމަށް އިންޑޯ ކޯޓު ބޭނުންކުރާއިރު، އެ ކުޅިވަރުތައް ކުޅުމަށް ރާއްޖޭގައި ރަނގަޅު ފެންވަރަކަށް ހަދާފައި އޮތް ހަމައެކަނި ކޯޓަކީ ޒުވާނުންގެ މަރުކަޒުގެ އިންޑޯ ކޯޓެވެ. އެކަމަކު މި އަހަރުގެ ފެބްރުއަރީ މަހުން ފެށިގެން އެ ކޯޓު ބޭނުންކުރަމުން އައީ ކޮވިޑް-19 ގެ ވެކްސިން ސެންޓަރެއްގެ ގޮތުގައެވެ.
އެއާއެކު ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)، މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އަދި ނެޓްބޯލް އެސޯސިއޭޝަން އޮފް މޯލްޑިވްސް (އެންއޭއެމް) އިސްވެ، އެ އެސޯސިއޭޝަންތަކުގެ ހަރަކާތްތަކާއި ގައުމީ ޓީމުތަކުގެ ފަރިތަކުރުންތައް ކުރިއަށް ގެންދެވޭނެ ގޮތެއް ހޯދަން މި މަހުގެ ކުރީކޮޅު ވަނީ ކުޅިވަރާ ބެހޭ ވުޒާރާއާ ބައްދަލުކޮށްފައެވެ.
އެ ފަހަރު އިންޑޯ ކޯޓު ހުސްކޮށްދިނުމަށް އެދި ކުޅިވަރާ ބެހޭ ވުޒާރާއިން ފޮނުވި ސިޓީއަކަށް ޖަވާބުދީ ސިއްހަތާ ބެހޭ ވުޒާރާއިން ފޮނުވި ސިޓީގައި ބުނެފައިވަނީ މި ދަނޑިވަޅުގައި ވެކްސިން ޖެހުމުގެ ގައުމީ ހަރަކާތް އިންޑޯ ކޯޓުގައި ކުރިއަށްދާތީ މި ވަގުތުން އެ ތަން ހުސްކުރެވެން ނެތް ކަމަށާއި، އެކަމަކު އަންނަ އޮކްޓޯބަރު މަހުގެ ނިޔަލަށް އެ ކޯޓު ހުސްކުރެވޭތޯ ބަލާނެ ކަމަށެވެ.
އެެހެންކަމުން މި މަހުގެ 13 ވަނަ ދުވަހު ކުޅިވަރު އެސޯސިއޭޝަންތަކުން ވަނީ އެ އެސޯސިއޭޝަންތަކުގެ ކަންބޮޑުވުންތައް ފާހަގަކޮށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙަށް ސިޓީއެއްވެސް ފޮނުވާފައެވެ.
މައުލޫމާތު ލިބިފައިވާ ގޮތުން ހޯމަ ދުވަހުގެ ވަގުތެއްގައި ކުޅިވަރާ ބެހޭ ވުޒާރާއިން ވަނީ އިންޑޯ ކޯޓު ހުސްކުރުމާ ގުޅޭ ގޮތުން ކުޅިވަރު އެސޯސިއޭޝަންތަކާ ބައްދަލުކޮށްފައެވެ. އަދި މި ބައްދަލުވުމުގައި އަންނަ ބުރާސްފަތި ދުވަހަށް އެ ކޯޓު ހުސްކޮށްދޭނެ ކަމަށް ކުޅިވަރާ ބެހޭ ވުޒާރާއިން ބުނެފައިވާ ކަމަށްވެސް ވަނީ މައުލޫމާތުލިބިފައެވެ.
ގިނަ ދުވަސްތަކަކަށްފަހު އިންޑޯ ކޯޓު ބޭނުންކުރުމުގެ ފުރުސަތު ކުޅިވަރު އެސޯސިއޭޝަންތަކަށް ލިބިގެންދާއިރު، މީގެ ކުރިން އެ ކޯޓި ނުލިބި ކުޅިވަރު އެސޯސިއޭޝަންތަކަށް ވަނީ ބޮޑެތި ގޮންޖެހުންތަކެއް ކުރިމަތިވެފައެވެ. އެގޮތުން ގައުމީ ބާސްކެޓްބޯޅަ ޓީމުން އަންނަ އޮކްޓޯބަރު ބާއްވާ ސާބާ ޗެމްޕިއަންޝިޕަށް ތައްޔާރުވަމުން އަންނައިރު، އެކަމަކު އިންޑޯގައި ކުޅެން ޖެހޭ އެ މުބާރާތަށް ތައްޔާރުވުމަށް ގައުމީ ޓީމުން ފަރިތަކުރަމުން އައީ އައުޓްޑޯ ކޯޓުގައެވެ.
އަދި މި އަހަރުގެ ޑިސެމްބަރު މަހު ތެރޭ އޭވީސީ ސެންޓްރަލް ޒޯނުގެ އަންހެން މުބާރާތް ރާއްޖޭގައި ބާއްވާއިރު، އެ މުބާރާތުން އެންމެ ފަހުން ރިހި މެޑަލް ހޯދި އަންހެން ޓީމަށް އަދި ފަރިތަކުރުންތައް ފެށިފައެއް ނުވެއެވެ. އަދި އަންނަ އަހަރުގެ މާޗު މަހު ތައިލެންޑުގައި ބާއްވާ އޭޝިއާގެ އިންޑޯ މުބާރާތުގައި ގައުމީ ނެޓްބޯޅަ ޓީމު ވާދަކުރާއިރު، އެ މުބާރާތަށް ތައްޔާރުވުމަށް ނެޓްބޯޅަ ޓީމަށްވެސް ވަނީ ދަތިތަކަކާ ކުރިމަތިލާން ޖެހިފައެވެ.
ގިނަ ކުޅިވަރުތަކެއް ކުޅުމަށް އޮތް ހަމައެކަނި ތަނެއްގެ ގޮތުގައި އިންޑޯ ކޯޓު އޮތްއިރު، އަލުން އިންޑޯ ކޯޓު ލިބުމާއެކު އެންމެ ފުރަތަމަ އެ ކޯޓު ބޭނުންކުރާނީ ނެޓްބޯޅަ އެސޯސިއޭޝަނުންނެވެ. އެއަށްފަހު މި އަހަރުގެ ޑިސެމްބަރު މަހު ވޮލީބޯޅަ އެސޯސިއޭޝަނުން އެ ކޯޓު ބޭނުންކުރަން އެއްބަސްވެފައިވާއިރު، ބާސްކެޓްބޯޅަ އެސޯސިއޭޝަނުން އިންޑޯ ބޭނުންކުރާނީ އަންނަ އަހަރުގެ ފެބްރުއަރީ މަހުގައެވެ.
