މާފަންނު ޒުވާނުންގެ މަރުކަޒުގައި ގާއިމުކޮށްފައިވާ އިންޑޯ ކޯޓު ބޭނުންކުރުމުގެ ފުރުސަތު ލިބިފައިނުވާތީ، ކުޅިވަރު އެސޯސިއޭޝަންތަކުގެ ކަންބޮޑުވުންތައް ރައީސުލްޖުމްހޫރިއްޔާ އިބްރާޙީމް މުޙައްމަދު ޞާލިޙާ ހިއްސާކޮށްފިއެވެ.
ވޮލީބޯޅަ، ބާސްކެޓްބޯޅަ އަދި ނެޓްބޯޅަ މުބާރާތްތައް ބޭއްވުމަށް އިންޑޯ ކޯޓބޭނުންކުރާއިރު، އެ ކުޅިވަރުތައް ކުޅުމަށް ރާއްޖޭގައި ރަނގަޅު ފެންވަރަކަށް ހަދާފައި އޮތް ހަމައެކަނި ކޯޓަކީ ޒުވާނުންގެ މަރުކަޒުގެ އިންޑޯ ކޯޓެވެ. އެކަމަކު މި އަހަރުގެ ފެބްރުއަރީ މަހުން ފެށިގެން ކޮވިޑް-19 ގެ ވެކްސިން ސެންޓަރެއްގެ ގޮތުގައި އެ ކޯޓު ބޭނުންކުރާއިރު، މި ވަގުތު އެ ކޯޓު ބޭނުންކުރުމުގެ ފުރުސަތު ކުޅިވަރު އެސޯސިއޭޝަންތަކަށް ލިބިފައެއް ނުވެއެވެ.
އެއާއެކު މީގެ ކުރިން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)، މޯލްޑިވްސް ބާސްކެޓްބޯލް އެސޯސިއޭޝަން (އެމްބީއޭ) އަދި ނެޓްބޯލް އެސޯސިއޭޝަން އޮފް މޯލްޑިވްސް (އެންއޭއެމް) އިސްވެ، އެ އެސޯސިއޭޝަންތަކުގެ ހަރަކާތްތަކާއި ގައުމީ ޓީމުތަކުގެ ފަރިތަކުރުންތައް ކުރިއަށް ގެންދެވޭނެ ގޮތެއް ހޯދަން ކުޅިވަރާ ބެހޭ ވުޒާރާއާ ވަނީ ބައްދަލުކޮށްފައެވެ. އަދި އެ ފަހަރު އިންޑޯ ކޯޓު ހުސްކޮށްދިނުމަށް އެދި ކުޅިވަރު އެސޯސިއޭޝަންތަކުން ފޮނުވި ސިޓީއަށް ޖަވާބުދީ ކުޅިވަރާ ބެހޭ ވުޒާރާއިން ފޮނުވި ސިޓީގައި ބުނެފައިވަނީ ޒުވާނުންގެ މަރުކަޒުގެ އިންޑޯ ކޯޓުގައި ކުޅެވޭނެ އިންތިޒާމު ހަމަޖައްސައިދިނުމަށް ގައުމީ ކުޅިވަރު އެސޯސިއޭޝަންތަކުން އެދެމުންދާތީ، އިންޑޯ ކޯޓު ހުސްކޮށްދިނުމަށް އެދި ސިއްހަތާ ބެހޭ ވުޒާރާގައި އެދިފައިވާނެ ކަމަށެވެ.
އިންޑޯ ކޯޓު ހުސްކޮށްދިނުމަށް އެދި ކުޅިވަރާ ބެހޭ ވުޒާރާއިން ސިއްހަތާ ބެހޭ ވުޒާރާއަށް ސިޓީ ފޮނުވާފައިވަނީ މިދިޔަ އޯގަސްޓް މަހުގެ 18 ވަނަ ދުވަހެވެ. އެކަމަކު އެ ސިޓީއަށް ސިއްހަތާ ބެހޭ ވުޒާރާއިން ޖަވާބުދީފައިވަނީ މި މަހުގެ އަށްވަނަ ދުވަހެވެ. އެ ސިޓީގައި އެ ވުޒާރާއިން ބުނެފައިވަނީ މި ދަނޑިވަޅުގައި ވެކްސިން ޖެހުމުގެ ގައުމީ ހަރަކާތް އިންޑޯ ކޯޓުގައި ކުރިއަށްދާތީ މި ވަގުތުން އެ ތަން ހުސްކުރެވެން ނެތް ކަމަށާއި، އެކަމަކު އަންނަ އޮކްޓޯބަރު މަހުގެ ނިޔަލަށް އެ ކޯޓު ހުސްކުރެވޭތޯ ބަލާނެ ކަމަށެވެ.
އެއާއެކު ހޯމަ ދުވަހުގެ ވަގުތެއްގައި ކުޅިވަރު އެސޯސިއޭޝަންތަކުން ވަނީ އެ އެ އެސޯސިއޭޝަންތަކުގެ ކަންބޮޑުވުންތައް ފާހަގަކޮށް ރައީސް ޞާލިޙަށް ސިޓީއެއް ފޮނުވާފައެވެ. އެ ސިޓީގައި ބުނެފައިވާ ގޮތުން ކޮވިޑުގެ ބަލިމަޑުކަމާ ގުޅިގެން ދުނިޔޭގެ އެކި ގައުމުތަކުން އަޅާފައިވާ ފިޔަވަޅުތަކުގެ ސަބަބުން ފާއިތުވި ދޮޅު އަހަރެއްހާ ދުވަހު ބައިނަލްއަގުވާމީ ގިނަ މުބާރާތްތަކެއް ބޭއްވިފައިނުވާ ކަމަށާއި، އެކަމަކު މިހާރު ގައުމުތަކުގެ ބޯޑަރުތައް ހުޅުވާލާފައިވުމާ ގުޅިގެން ބައިނަލްއަގުވާމީ ގިނަ މުބާރާތްތަކެއް ބޭއްވުމަށްޓަކައި ތާވާލުކުރެފައިވާ ކަމަށެވެ.
އަދި ޒަމާނުއްސުރެ ގައުމީ ޓީމުތަކުގެ ފަރިތަކުރުންތަކާއި ގައުމީ ފެންވަރުގެ މުބާރާތްތައް ބާއްވަމުން އައީ ޒުވާނުންގެ މަރުކަޒުގެ އިންޑޯ ކޯޓުގައި ކަމަށާއި، އެކަމަކު ކޮވިޑުގެ ހާލަތާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ ފަރާތުން ވެކްސިން ޖެހުމުގެ ޚިދުމަތް ފޯރުކޮށްދިނުމަށް އެ ތަން ބޭނުންކުރެވެމުންދާތީ އެ އެސޯސިއޭޝަންތަކުން ގޮތްހުސްވެ، ފަރިތަކުރުންތައް އެންމެ އެކަށީގެންވާ ގޮތަށް ކުރިއަށްގެންދަން ދަތިވެފައިވާ ކަމަށްވެސް އެ ސިޓީގައި ވަނީ ބުނެފައެވެ. އަދި އެކަމަށް ހައްލެއް ހޯދުމަށް ކުރެވުނު މަސައްކަތްވެސް މިއަދާ ހަމައަށް އައިރުވެސް ކާމިޔާބުވެފައި ނުވާ ކަމަށާއި، އެހެންކަމުން ގައުމީ ޓީމުތަކުގެ ފަރިތަކުރުންތައް ކުރިއަށްގެންދިޔުމަށް ހުރި ދަތިތަކަށް އަވަސް ހައްލެއް ހޯދައިދިނުމަށް އެ އެސޯސިއޭޝަންތަކުން ވަނީ ރައީސްގެ އަރިހުގައި އެދިފައެވެ.
އިންޑޯ ކޯޓު ބޭނުންކުރުމުގެ ފުރުސަތު ނުލިބި ކުޅިވަރު އެސޯސިއޭޝަންތަކަށް ބޮޑެތި ގޮންޖެހުންތަކެއް ކުރިމަތިވެފައިވާއިރު. ގައުމީ ބާސްކެޓްބޯޅަ ޓީމުން އަންނަނީ އަންނަ އޮކްޓޯބަރު ބާއްވާ ސާބާ ޗެމްޕިއަންޝިޕަށް ތައްޔާރުވަމުންނެވެ. އެކަމަކު އިންޑޯގައި ކުޅެން ޖެހޭ އެ މުބާރާތަށް ތައްޔާރުވުމަށް ގައުމީ ޓީމުން ފަރިތަކުރަމުން އަންނަނީ އައުޓްޑޯ ކޯޓުގައެވެ. އަދި މި އަހަރުގެ ޑިސެމްބަރު މަހު ތެރޭ އޭވީސީ ސެންޓްރަލް ޒޯނުގެ އަންހެން މުބާރާތް ރާއްޖޭގައި ބާއްވާއިރު، އެ މުބާރާތުން އެންމެ ފަހުން ރިހި މެޑަލް ހޯދި އަންހެން ޓީމަށް މި ފަހަރުގެ މުބާރާތަށް ފަރިތަކުރުންތައް ފެށުމުގެ ފުރުސަތު އަދި ލިބިފައެއް ނުވެއެވެ.
ދެން އިންޑޯގައި މުބާރާތްތައް ބާއްވަމުން އަންނަ އަނެއް ކުޅިވަރު ކަމަށްވާ ނެޓްބޯޅައަށް ބަލާއިރު، އަންނަ އަހަރުގެ މާޗު މަހު ތައިލެންޑުގައި ބާއްވާ އޭޝިއާގެ އިންޑޯ މުބާރާތުގައި ގައުމީ ނެޓްބޯޅަ ޓީމު ވާދަކުރާނެއެވެ. އެކަމަކު އެ މުބާރާތަށް ތައްޔާރުވުމަށް ނެޓްބޯޅަ ޓީމަށްވެސް ވަނީ ދަތިތަކަކާ ކުރިމަތިލާން ޖެހިފައެވެ.
