ކުޅިވަރު ކްލަބް ޖަމްއިއްޔާތައް ކޮމިޝަނަރ އޮފް ސްޕޯޓްސްގައި ރަޖިސްޓްރީ ކުރުމުގެ މުއްދަތު އިތުރުކޮށްފިއެވެ.

ކުރިން ކްލަބް ޖަމްއިއްޔާތައް ރަޖިސްޓްރީ ކުރުމަށް އަންގާފައި ވަނީ މި ހިނގާ ޖުލައި މަހުގެ 20 ވަނަ ދުވަހުގެ ނިޔަލަށެވެ. ނަމަވެސް މިނިސްޓްރީ އޮފް ޔޫތު އެންޑް ސްޕޯޓްސް އިން ހޮނިހިރު ދުވަހު، މީޑިއާތަކާ ހިއްސާކުރި ބަޔާނެއްގައި ބުނެފައި ވަނީ، ގިނަ ކުޅިވަރު ކްލަބް ޖަމްއިއްޔާތަކެއްގެ އުދުމުގެ މަތިން މި މުއްދަތު އިތުރު ކުރުމަށް ނިންމާފައިވާ ކަމަށެވެ. އެގޮތުން، މި މުއްދަތު އިތުރު ކޮށްފައި ވަނީ އަންނަ އޯގަސްޓް މަހުގެ 20 ވަނަ ދުވަހުގެ ނިޔަލަށެވެ.

ޔޫތު މިނިސްޓްރީން މައުލޫމާތު ދޭ ގޮތުގައި، މި ތާރީހުގެ ފަހުން ފޯމް ހުށަހަޅާ ކްލަބް ޖަމްއިއްޔާތައް ރަޖިސްޓްރީ ކޮށްދޭނީ ޖަމްއިއްޔާތަކުން ޔޫތު މިނިސްޓްރީއަށް ހުށަހަޅާފައިވާ ތާރީހުން ފެށިގެންނެވެ. އެގޮތުން މި ތާރީހުގެ ފަހުން، ކޮމިޝަނާ އޮފް ސްޕޯޓްސްގައި ރަޖިސްޓްރީ ވެގެން މެނުވީ އެއްވެސް ވާދަވެރި ކުޅިވަރު މުބާރާތެއް އިންތިޒާމުކޮށް ހިންގުމާއި، ވާދަކުރުމުގެ ފުރުސަތު ވެސް ނޯންނާނެ ކަމަށް އެ މިނިސްޓްރީން ވަނީ މި ބަޔާނުގައި ބުނެފައެވެ.

ކުޅިވަރު ކްލަބް ޖަމްއިއްޔާތައް ރަޖިސްޓްރީކޮށް ހިންގުމާ ބެހޭ ގަވާއިދު އަދި ރަޖިސްޓްރީވުމަށް ހުށަހަޅަން ޖެހޭ ފޯމް، ޔޫތު މިނިސްޓްރީގެ ވެބްސައިޓުން ލިބެން ހުންނާނެއެވެ.

ކުޅިވަރު ކްލަބް ޖަމްއިއްޔާތައް ކޮމިޝަނަރ އޮފް ސްޕޯޓްސްގައި ރަޖިސްޓްރީކުރަން ނިންމާފައި ވަނީ، ދިވެހި ރާއްޖޭގެ ކުޅިވަރު ގާނޫނުގެ 5 ވަނަ މާއްދާގައި، އެއްވެސް ކުޅިވަރެއް ނުވަތަ ކުޅވަރު ހަރަކާތަކަށް ނިސްބަތްވާ ކްލަބް، ނުވަތަ ޓީމް، ނުވަތަ ޖަމްއިއްޔާއެއް ގާއިމްކޮށް ހިންގޭނީ އެ ގާނޫނުގެ ދަށުން، ކޮމިޝަނާ އޮފް ސްޕޯޓްސްގައި ރަޖިސްޓްރީ ކުރެވިގެން ކަމަށް ކަނޑައެޅުމާ ގުޅިގެންނެވެ.