ކުޅިވަރު ޖަމިއްޔާތައް ރިޖިސްޓްރީކޮށް ހިންގުމާބެހޭ ގަވައިދުގައިވާ ގޮތުގެ މަތިން އެސޯސިއޭޝަންތަކާއި، އެސޯސިއޭޝަންތަކުގެ ދަށުން ރަޖިސްޓްރީ ކުރެވިފައިވާ ކުޅިވަރު ކްލަބްތައް ކޮމިޝަނާ އޮފް ސްޕޯޓްސްގައި ރަޖިސްޓްރީކުރުމުގެ މުއްދަތު އިތުރުކޮށްފި އެވެ.
ހޯމަ ދުވަހު ޔޫތް މިނިސްޓްރު އިރުތިޝާމް އާދަމް އަށް އެޑްރެސްކޮށް ކޮމިޝަނާއޮފް ސްޕޯޓްސް އަހުމަދު ނަޝީދު ނެރުއްވި ސާކިއުލާއެއްގައި ވަނީ ކުޅިވަރު ޖަމިއްޔާތައް ރަޖިސްޓްރީ ކުރުމުގެ މުއްދަތު ވަނީ އަންނަ ޖުލައި މަހުގެ 20 ވަނަ ދުވަހަށް އިތުރުކޮށްފައިވާކަން އިއުލާންކޮށްފައެވެ. އެހެންނަމަވެސް ކުރިން މި މުއްދަތު އޮތީ އަންނަ ބުރާސްފަތ ދުވަހުގެ ނިޔަލކަށެވެ.
އަހުމަދު ނަޝީދު ވިދާޅުވީ، އަންނަ ޖުލައި މަހުގެ 20 ވަނަ ދުވަހަށްފަހު، ކޮމިޝަނާ އޮފް ސްޕޯޓްސްގައި ރަޖިސްޓްރީކޮށްގެން ނޫނީ އެއްވެސް ކުޅިވަރު މުބާރާތެއް އިންތިޒާމުކޮށް ހިންގުމަކީ މަނާ ކަމެއް ކަމަށާއި، އަދި އެފަދަ ފުރުސަތެއް ނުދެވޭނެ ކަމަށެވެ.
މީގެއިތުރުން އޭނާ ވިދާޅުވީ، މި ގަވައިދުގެ ދަށުން ރަޖިސްޓްރީކުރުމަށް ހުށަހަޅާފައިނުވާނަމަ، އެ ގަވައިދުގެ ދަށުން ކޮމިޝަނާ އޮފް ސްޕޯޓްސްގައި ރަޖިސްޓްރީކުރުމަށްޓަކައި، 20 ޖުލައި ގައި އޮފީސް ބަންދުވުމުގެ ކުރިން މިނިސްޓްރީ އޮފް ޔޫތް އެންޑް ސްޕޯޓްސް އަށް ހުށަހެޅުމަށް އިލްތިމާސްކުރައްވާ ކަމަށެވެ.
