ފައިދާ ނެގޭނީ ސަޕޯޓަރުން ދަނޑަށް ވަދެގެން: ކުރޯ

މި ފަހަރުގެ ސާފް ޗެމްޕިއަންޝިޕް ރާއްޖޭގައި ކުޅޭއިރު، ހޯމް އެޑްވާންޓޭޖް ނެގޭނީ ސަޕޯޓަރުން ދަނޑަށް ވަދެގެން ކަމަށް ގައުމީ ޓީމުގެ ޑިފެންޑަރު ހުސެއިން ޝިފާއު ޔޫސުފް (ކުރޯ) ބުނެފިއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގަތަރުގައި ގައުމީ ޓީމުން ފަރިތަކުރަމުން އަންނައިރު، ކޭމްޕް ފުރިހަމަކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

ސާފް ޗެމްޕިއަންޝިޕް ރާއްޖޭގައި ބާއްވަން ތައްޔާރުވަމުން އަންނައިރު، އެ މުބާރާތުގެ މެޗުތައް ބަލަން ގައުމީ ފުޓްބޯޅަ ދަނޑަށް ސަޕޯޓަރުން ވެއްދުމުގެ ހުއްދަ މިހާރު ވަނީ ލިބިފައެވެ. އެއާއެކު ކުޅިވަރާ ބެހޭ ވުޒާރާއިން އަންނަނީ މީގެ ކުރިން މީހުން ވެއްދުން މަނާކޮށްފައިވާ ދެކުނު ފަރާތް (ސަހާރާ ފަޅި) ގެ ސިޑިބަރިތައް މަރާމާތުކޮށް، އެ ސިޑިބަރީގެ ތިރީ ބަޔަށް ސަޕޯޓަރުން ވައްދަން މަސައްކަތްކުރަމުންނެވެ. އެކަމަކު ސާފް ޗެމްޕިއަންޝިޕުގެ މެޗުތައް ބަލަން ދަނޑަށް ވަދެވޭނީ ކޮވިޑް-19 ގެ ވެކްސިން ދެ ޑޯޒް ފުރިހަމަކޮށްފައިވާ މީހުންނަށް ކަމަށް ވަނީ ކަނޑައަޅާފައެވެ.

ގަތަރުގައި ކުރިއަށްދާ ފަރިތަކުރުންތަކުގެ ތެރެއިން ދިން އިންޓަވިއުއެއްގައި ކުރޯ ބުނީ ގައުމީ ޓީމަށް ސަޕޯޓަރުންނަނީ ވަރަށް މުހިންމު ބައެއް ކަމަށާއި، އެގޮތުން މުބާރާތް އަމިއްލަ ފަސްގަނޑުގައި ކުޅޭއިރު، ހޯމް އެޑްވާންޓޭޖް ނެގެން އަންނަނީ ސަޕޯޓަރުން ދަނޑަށް ވަދެގެން ކަމަށެވެ. އެހެންކަމުން ވީހާވެސް ގިނަ ސަޕޯޓަރުން ދަނޑަށް ވަދެ، ޓީމަށް ސަޕޯޓުކޮށްދިނުމަކީ ވަރަށް ބޮޑަށް ފައިދާވާނެ ކަމެއް ކަމަށްވެސް ބުންޏެވެ.

ރާއްޖޭގައި ސާފް ޗެމްޕިއަންޝިޕް ބާއްވާއިރު، މިދިޔަ އޯގަސްޓް މަހު މާލޭގައި ވަނީ އޭއެފްސީ ކަޕުގެ ދެކުނު އޭޝިއާގެ ގްރޫޕުގެ މެޗުތައް ބާއްވާފައެވެ. އެ މުބާރާތުގައި ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާއި ކުލަބު އީގަލްސް ވާދަކުރިއިރު، މެޗުތައް ކުޅެފައިވަނީ ދަނޑަށް ސަޕޯޓަރުން ނުވައްދައެވެ. ކުރޯ ބުނީ ކޮވިޑުގެ ހާލަތާ ގުޅިގެން އޭއެފްސީ ކަޕުގެ މެޗުތައް ސަޕޯޓަރުން ނުވައްދައި ކުޅުނު ނަމަވެސް، ސާފް ޗެމްޕިއަންޝިޕުގައި ސަޕޯޓަރުން ތިބެގެން މެޗުތައް ކުޅެން ލިބުމުން އެއީ ޓީމަށް ލިބޭނެ ވަރަށް ބޮޑު ހިތްވަރެއް ކަމަށެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރަމުން އަންނައިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހު ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެރޭ ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ރާއްޖެ ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.