ސާފް ޗެމްޕިއަންޝިޕަށް ތައްޔާރުވުމުގެ ގޮތުން މިހާރު ގަތަރުގައި ކުރިއަށްގެންދާ ކޭމްޕުގެ ތެރެއިން ރާއްޖޭގެ ގައުމީ ފުޓްބޯޅަ ޓީމުން ގަތަރުގެ ދެ ކުލަބަކާ ދެކޮޅަށް މެޗުތައް ކުޅޭ ގޮތަށް ހަމަޖެހިއްޖެއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގަތަރުގައި ގައުމީ ޓީމުން ފަރިތަކުރަމުން އަންނައިރު، ކޭމްޕް ފުރިހަމަކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

މީގެ ކުރިން ކޭމްޕަށް ފުރުމުގެ ކުރިން ގައުމީ ޓީމުގެ ކަންކަން ބަލަހައްޓަމުން އަންނަ އެސިސްޓަންޓް ކޯޗު އިސްމާޢީލް މަހްފޫޒް (އިންމަ) ވަނީ މި ކޭމްޕުގައި ތިން މެޗެއް ކުޅުމަށް މަސައްކަތްކުރަމުން އަންނަ ކަމަށް ބުނެފައެވެ. އެގޮތުން ސްރީ ލަންކާގެ ގައުމީ ޓީމާ ދެކޮޅަށް ބައިނަލްއަގުވާމީ އެކުވެރިކަމުގެ މެޗެއް ކުޅުމުގެ އިތުރުން، ގަތަރުގެ ދެ ޓީމަކާ ދެކޮޅަށްވެސް މެޗުތައް ކުޅުމަށް މަސައްކަތްކުރަމުން އަންނަ ކަމަށްވެސް ވަނީ ބުނެފައެވެ.

އެކަމަކު ކޮވިޑް-19 ގެ ސަބަބުން ލަންކާ ޓީމަށް ގަތަރުގެ ވިސާ ހަމަޖެހިފައެއް ނުވެއެވެ. އެއާއެކު ލަންކާއިން މިހާރު ވަނީ އިތުރު ތަމްރީނުތަކަށް ސައުދީ އަރަބިއްޔާއަށް ގޮސްފައެވެ. އެހެންކަމުން ގަތަރުގައި ކުރިއަށްދާ ކޭމްޕުގައި ގައުމީ ޓީމުން ގަތަރުގެ ދެ ކުލަބަކާ ދެކޮޅަށް މެޗުތައް ކުޅެން މިހާރު ވަނީ ތާވަލުކޮށްފައެވެ. އެގޮތުން އަންގާރަ ދުވަހު ކުޅޭ މެޗުގައި ރާއްޖެ ނުކުންނާނީ ގަތަރުގެ ދެވަނަ ޑިވިޝަނުގައި ވާދަކުރަމުން އަންނަ ލުސައިލް އެފްސީއާ ދެކޮޅަށެވެ. އަދި ދެވަނަ މެޗުގައި މި މަހު 25 ވަނަ ދުވަހު ބައްދަލުކުރާނީ ގަތަރުގެ އެހެން ޓީމަކާއެވެ.

ގަތަރުގައި ކުރިއަށްދާ ކޭމްޕުގައި ގައުމީ ޓީމުން ދެ މެޗެއް ކުޅޭއިރު، މީގެ ކުރިން ކޮވިޑަށް ޕޮޒިޓިވްވުމާއެކު ގަތަރު ކޭމްޕަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ފުރާފައެއް ނުވެއެވެ. އެކަމަކު ކޮވިޑުން ރަނގަޅުވެ ވަރަށް އަވަހަށް ސުޒޭން ގައުމީ ޓީމާ ގުޅޭނެ ކަމަށް މައުލޫމާތު ލިބެއެވެ.

ސާފް ޗެމްޕިއަންޝިޕަށް ތައްޔާރުވުމުގެ ގޮތުން މިދިޔަ އޯގަސްޓް މަހުގެ 26 ވަނަ ދުވަހު 34 ކުޅުންތެރިންގެ ޕްރިލިމިނަރީ ސްކޮޑަކާއެކު ގައުމީ ޓީމުން ފަރިތަކުރުންތައް ފެށިއިރު، ގަތަރު ކޭމްޕުގައި ބައިވެރިވަނީ 29 ކުޅުންތެރިންނެވެ. ގަތަރު ކޭމްޕުގައި 30 ކުޅުންތެރިން ބައިވެރިކުރާ ގޮތަށް ހަމަޖެހިފައި އޮތް ނަމަވެސް، އަނިޔާގެ ސަބަބުން މާޒިޔާ ސްޕޯޓްސް އެންޑް ރެކްރިއޭޝަނުގެ ޒުވާން ގޯލްކީޕަރު ހުސެއިން ޝަރީފް (ހުސެން) ކޭމްޕުގައި ބައިވެރިވެފައެއް ނުވެއެވެ.