މިހާރު އޮތް ސްކޮޑަކީ ރާއްޖޭގައި އޮތް އެންމެ ވަރުގަދަ ސްކޮޑް: އިއްބެ

މި އަހަރުގެ ސާފް ޗެމްޕިއަންޝިޕަށް ތައްޔާރުވުމަށް އެކުލަވާލާފައިވާ ގައުމީ ފުޓްބޯޅަ ޓީމުގެ ސްކޮޑަކީ މި ވަގުތު ރާއްޖޭގައި އޮތް އެންމެ ވަރުގަދަ އެއް ސްކޮޑް ކަމަށް ގައުމީ ޓީމުގެ މިޑްފީލްޑަރު އިބްރާހީމް ވަހީދު ހަސަން (އިއްބެ) ބުނެފިއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގަތަރުގައި ގައުމީ ޓީމުން ފަރިތަކުރަމުން އަންނައިރު، ކޭމްޕް ފުރިހަމަކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

ސާފް ޗެމްޕިއަންޝިޕަށް ތައްޔާރުވުމުގެ ގޮތުން މިދިޔަ އޯގަސްޓް މަހުގެ 26 ވަނަ ދުވަހު 34 ކުޅުންތެރިންގެ ޕްރިލިމިނަރީ ސްކޮޑަކާއެކު ގައުމީ ޓީމުން ފަރިތަކުރުންތައް ފެށިއިރު، ގަތަރު ކޭމްޕުގައި ބައިވެރިވަނީ 29 ކުޅުންތެރިންނެވެ. ގަތަރު ކޭމްޕުގައި 30 ކުޅުންތެރިން ބައިވެރިކުރާ ގޮތަށް ހަމަޖެހިފައި އޮތް ނަމަވެސް، އަނިޔާގެ ސަބަބުން މާޒިޔާ ސްޕޯޓްސް އެންޑް ރެކްރިއޭޝަނުގެ ޒުވާން ގޯލްކީޕަރު ހުސެއިން ޝަރީފް (ހުސެން) ކޭމްޕުގައި ބައިވެރިވެފައެއް ނުވެއެވެ.

ގަތަރުގައި ކުރިއަށްދާ ފަރިތަކުރުންތަކުގެ ތެރެއިން ދިން އިންޓަވިއުއެއްގައި އިއްބެ ބުނީ މިހާރު އޮތް ސްކޮޑަކީ މި ވަގުތު ރާއްޖޭގައި އޮތް އެންމެ ވަރުގަދަ އެއް ސްކޮޑް ކަމަށެވެ. އެގޮތުން 2018 ވަނަ އަހަރު ސާފް ޗެމްޕިއަންޝިޕުގައި ކުޅުނު ގިނަ ކުޅުންތެރިންވެސް ސްކޮޑުގައި އެބަތިބި ކަމަށާއި، އަދި އޭގެ އިތުރުން އެ ސްކޮޑަށް ތަޖުރިބާހުރި، ޒުވާން ކުޅުންތެރިންނަށް ފައިދާ ހިފޭނެވަރުގެ މޮޅެތި ކުޅުންތެރިންތަކެއްވެސް އިތުރުވެފައިވާ ކަމަށް ބުންޏެވެ.

އެހެންކަމުން އަމިއްލަ ފަސްގަނޑުގައި ސާފް ޗެމްޕިއަންޝިޕް ކުޅޭއިރު، އެއީ މުބާރާތް ކާމިޔާބުކުރަން ލިބޭ ވަރަށް ބޮޑު ހިތްވަރެއް ކަމަށާއި، އަދި އެރ ކުޅުންތެރިންތަކާއެކު ފަރިތަކޮށް، މި ކޭމްޕް ނިމޭއިރު ޓީމު އޮންނާނީ ތަށި ނެގޭ ވަރަށް ފިޓުވެފައި ކަމަށްވެސް އިއްބެ ވަނީ ބުނެފައެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން އެކުލަވާލި ސްކޮޑުގައި އިއްބެ ހިމުނުނުއިރު، މިދިޔަ ޖޫން މަހު އޮތް ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނަށް ނެގި ސްކޮޑުގައި އިއްބެ އެ ފަހަރު ހިމެނިއެވެ. އެކަމަކު އަމިއްލަ ސަބަބަކާ ހުރެ އިއްބެ ވަނީ އެ ފަހަރު ގައުމީ ސްކޮޑުން ވަކިވެފައެވެ.

އަދި ދާދި ފަހުން މާޒިޔާއާއެކު އޭއެފްސީ ކަޕުގެ ދެކުނު އޭޝިއާގެ ގްރޫޕުގެ މެޗުތައް ކުޅެން ސައުދީ އަރަބިއްޔާއަށް ތަމްރީނު ކޭމްޕަކަށް ގޮސް އިއްބެ ވަނީ މިދިޔަ މަހު އޭއެފްސީ ކަޕުގެ މެޗުތަކުގައި ވާދަކުރި މާޒިޔާ ޓީމުގައިވެސް ހިމެނިފައެވެ. އިއްބެ ބުނީ މާޒިޔާގައާއެކުބެސް ވަރަށް ގިނަ ދުވަސްތަކެއް ވަންދެން ކޭމްޕުކުރުމަށްފަހު އައިރު، އެ ކޭމްޕުގައިވެސް ޓީމު ވޯކް ވަރަށް ރަނގަޅަށް ފެނިފައިވާ ކަމަށާއި، އަދި މިހާރު ގައުމީ ޓީމުންގަތަރުގައި ފުރިހަމަ ކުރަމުން އަންނަ ކޭމްޕުންވެސް ވަރަށް ރަނގަޅު ކަންކަން ފެންނަމުން އަންނަ ކަމަށެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރަމުން އަންނައިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހު ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެރޭ ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ރާއްޖެ ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.