ސާފް ޗެމްޕިއަންޝިޕުގައި ބަންގްލަދޭޝަށް ކޯޗުކޮށްދޭނީ އޮސްކާ

އަންނަ އޮކްޓޯބަރު މަހު ރާއްޖޭގައި ބާއްވާ ސާފް ޗެމްޕިއަންޝިޕުގައި ބަންގްލަދޭޝް ގައުމީ ފުޓްބޯޅަ ޓީމަށް ކޯޗުކޮށްދިނުމުގެ ޒިންމާ ސްޕެއިނުގެ އޮސްކާ ބްރުޒޮންއާ ހަވާލުކޮށްފިއެވެ.

ހުކުރު ދުވަހު ބަންގްލަދޭޝް ފުޓްބޯޅަ ފެޑެރޭޝަނުން ބަޔާނެއްގައި ބުނީ އެ ޓީމުގެ ކޯޗުގެ މަގާމުން އިނގިރޭސި ކޯޗު އުމުރުން 42 އަހަރުގެ ޖެމީ ޑޭ ވަގުތީ ގޮތުން ދުރުކޮށް، އެ ގައުމުގެ ޗެމްޕިއަން ބަންޝުންދަރާ ކިންގްސްއަށް އިރުޝާދުދެމުން އަންނަ އުމުރުން 44 އަހަރުގެ އޮސްކާއާ ޓީމު ހަވާލުކޮށްފައިވާ ކަމަށެވެ. އަދި ޑޭގެ އެއްބަސްވުމުގައި ބާކީ އަހަރެއް އޮތްއިރު، އޭނާ ރަސްމީކޮށް ކޯޗުގެ މަގާމުން ވަކިނުކުރާ ކަމަށާއި، އޭގެ ބަދަލުގައި ދެ މަސް ދުވަހަށް ގައުމީ ޓީމުގެ ޒިންމާއިން ޑޭ ވީއްލާފައިވާ ކަމަށްވެސް މި ބަޔާނުގައި ވަނީ ބުނެފައެވެ.

މީގެ ކުރިން އިންގްލެންޑުގެ ޓީމުތަކަށް އިރުޝާދުދިން ޑޭ ބަންގްލަދޭޝްގެ ސީނިއާ ޓީމާއި، އެ ގައުމުގެ 23 އަހަރުން ދަށުގެ ޓީމާ ހަވާލުވީ 2018 ވަނަ އަހަރުގެ މެއި މަހުގެ ތެރޭގައެވެ. އޭނާގެ އިރުޝާދުގެ ދަށުން ބަންގްލަދޭޝްއިން މިހާތަނަށް ނުވަ މެޗެއް ކުޅެފައިވާއިރު، އެ ޓީމު މޮޅުވީ ތިން މެޗުންނެވެ. އަދި ޑޭގެ ކޯޗުކަމުގައި 2018 ވަނަ އަހަރު އަމިއްލަ ގައުމުގައި ބޭއްވި ސާފް ޗެމްޕިއަންޝިޕުގައިވެސް ބަންގްލަދޭޝް ވަނީ ވާދަކޮށްފައެވެ. އެކަމަކު އެ ފަހަރުގެ މުބާރާތުން ބަންގްލަދޭޝް ކެޓީ ގްރޫޕް ސްޓޭޖުންނެވެ.

ޑޭ ވަގުތީ ގޮތުން ދުރުކޮށް، ބަންގްލަދޭޝް ގައުމީ ޓީމުގެ ޒިންމާ އޮސްކާއާ ހަވާލުކުރިއިރު، އޮސްކާއަކީ ދިވެހި ފުޓްބޯޅަ ރަނގަޅަށް ދަންނަ ކޯޗެކެވެ. އެގޮތުން މީގެ ކުރިން ރާއްޖޭގެ ނިއު ރޭޑިއަންޓް ސްޕޯޓްސް ކުލަބުގައި ހޭދަކުރި ކުރު މުއްދަތުގައި އޭނާ ވަނީ ރާއްޖޭގެ ހުރިހާ މުބާރާތެއް އެ ޓީމާއެކު ކާމިޔާބުކޮށްފައެވެ.

ނިއު ރޭޑިއަންޓް ދޫކޮށް 2018 ވަނަ އަހަރު އޮސްކާ ބަޝުންދަރާއަށް ބަދަލުވިއިރު، އޭނާ ވަނީ ބަޝުންދަރާއާއެކު އެ ގައުމުގެ ލީގާއި، ފެޑެރޭޝަން ކަޕުގެ އިތުރުން އިންޑިޕެންޑެންސް ކަޕުވެސް ކާމިޔާބުކޮށްފައެވެ. އަދި މި ފަހަރުގެ އޭއެފްސީ ކަޕުގައި އޮސްކާ އިރުޝާދުދިން ބަޝުންދަރާ ވަނީ 2-0 ގެ ނަތީޖާއަކުން ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށްފައެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބާއްވަން ތާވަލުކޮށްފައިވާއިރު، މުބާރާތް ކުރިއަށްދާނީ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ. ގްރޫޕް ސްޓޭޖުގައި ރާއްޖޭން ބަންގްލަދޭޝްއާ ދެކޮޅަށް ކުޅޭ މެޗު އޮންނާނީ އޮކްޓޯބަރު މަހުގެ ހަތްވަނަ ދުވަހުގެރެއެވެ.