ސާފް ޗެމްޕިއަންޝިޕެއް ކާމިޔާބުކުރަން ބޭނުންވާނަމަ ކޮންމެވެސް ހިސާބަކުން އިންޑިއާ ބަލިކުރަން ޖެހޭނެ ކަމަށް 2008 ވަނަ އަހަރު ރާއްޖޭން ފުރަތަމަ ފަހަރަށް އެ މުބާރާތް ކާމިޔާބުކުރި ޓީމުގެ ގޯލު ބެލެހެއްޓި އިމްރާން މުޙައްމަދު ބުނެފިއެވެ.
މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގަތަރުގައި ގައުމީ ޓީމުން ފަރިތަކުރަމުން އަންނައިރު، ކޭމްޕް ފުރިހަމަކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.
ރާއްޖޭން އެންމެ ފުރަތަމަ ސާފް ޗެމްޕިއަންޝިޕް ކާމިޔާބުކުރީ 2008 ވަނަ އަހަރު ރާއްޖެ އާއި ސްރީ ލަންކާ ގުޅިގެން މުބާރާތް ހޯސްޓް ކުރި ފަހަރު، ފައިނަލުގައި އިންޑިއާ ބަލިކުރުމަށްފަހުއެވެ. އަދި އެންމެ ފަހުން 2018 ވަނަ އަހަރު ބަންގްލަދޭޝްގައި ބޭއްވި މުބާރާތުގެ ޗެމްޕިއަންކަންވެސް ރާއްޖޭން ހޯދީ ފައިނަލުގައި އިންޑިއާ ބަލިކުރުމަށްފަހުއެވެ. ސާފް ޗެމްޕިއަންޝިޕުގެ ތާރީޚުގައި ތަށި ދިފާއުކުރެވުނު ހަމައެކަނި ޓީމަކީ އިންޑިއާއެވެ. އަދި މި މުބާރާތުގެ އެންމެ ކާމިޔާބު ޓީމަކީވެސް އިންޑިއާއެވެ. އެގޮތުން އިންޑިއާއިން މިހާތަނަށް ހަތް ފަހަރު ސާފް ޗެމްޕިއަންޝިޕް ކާމިޔާބުކޮށްފައެވެ.
ބުދަ ދުވަހުގެރޭ ގަތަރުގައި ކުރިއަށްގެންދިޔަ ފަރިތަކުރުންތަކަށްފަހު ދިން އިންޓަވިއުއެއްގައި ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އިމްރާން ބުނީ މި ފަހަރުގެ މުބާރާތުގައި ކޮންމެ ޓީމެއް ކޮންމެ ޓީމަކާ ކުޅޭއިރު، ނޭޕާލާއި، ބަންގްލަދޭޝް އަދި ލަންކާވެސް ފުޓްބޯޅައިގައި މަޑުމަޑުން ކުރިއަރަމުން އަންނަ ކަމަށެވެ، އެހެންކަމުން މި ފަހަރުގެ ސާފް ޗެމްޕިއަންޝިޕް ވަރަށް ވާދަވެރިވާނެ ކަމަށް އިމްރާން ބުންޏެވެ.
އެންމެ ފަހުން 2018 ވަނަ އަހަރު ބޭއްވި މުބާރާތަށް އިންޑިއާއިން ޒުވާން ޓީމެއް ފޮނުވިއިރު، މި ފަހަރުގެ މުބާރާތަށް ސީނިއާ ޓީމު ފޮނުވަން ނިންމާފައިވާކަން އިންޑިއާއިން ވަނީ އިއުލާންކޮށްފައެވެ. އިމްރާން ބުނީ ކޮންމެ ގޮތެއް ވިޔަސް ސާފް ޗެމްޕިއަންޝިޕެއް ކާމިޔާބުކުރާނަމަ އިންޑިއާ ބަލިކުރަން ޖެހޭނެ ކަމަށެވެ. އަދި އިންޑިއާ އިން ސީނިއާ ޓީމު ފޮނުވާނެ ކަމަށް ބުނެފައިވާއިރު، މީގެ ކުރިންވެސް އެ ގައުމުން ފޮނުވަނީ ހަގީގަތުގައި ވަރަށް މޮޅު ޓީމުތައް ކަމަށް އިމްރާން ވަނީ ބުނެފައެވެ.
އެހެންވީމަ އަޅުގަނޑަށް ހީވަނީ އަޅުގަނޑުމެން ކޮންމެ ހެނެއްވެސް ސާފް ޗެމްޕިއަންޝިޕެއް ކާމިޔާބުކުރަން ބޭނުމިއްޔާ އިންޑިއާ ބަލިކުރަންޖެހޭނެ ކޮންމެވެސް ހިސާބަކުން. އެއީ ހަގީގަތަކީ. އެހެންވީމަ އިންޑިއާ އާއި އޭގެ އިތުރުން ހަމަ ނޭޕާލުވެސް، ބަންގްލަދޭޝްވެސް ފުދޭ ވަރަކަށް ހަމަ މިހާރު ކުރިއަަރަމުންދޭ. އެހެންވީމަ އަޅުގަނޑަށް ހީވަނީ މި ފަހަރުގެ މުބާރާތަކީ ވަރަށް ވާދަވެރި، ވަރަށް ވަރުގަދަ މުބާރާތަކަށް ވެގެންދާނެކަން.ގައުމީ ޓީމުގެ އެސިސްޓަންޓް ކޯޗު އިމްރާން މުޙައްމަދު
އިމްރާން ބުނީ މި ފަހަރުގެ މުބާރާތް އަމިއްލަ ފަސްގަނޑުގައި ކުޅޭއިރު، އޭގެ ފައިދާ ނެގޭނީ 12 ވަނަ ކުޅުންތެރިޔާގެ އެހީތެރިކަމާއެކުގައި ކަމަށެވެ. އެގޮތުން ގަލޮޅު ދަނޑުގައި ދިވެހި ޓީމު ޖެހިލުންވާ ޖެހޭ ވަރުގެ ޓީމެއް ނޯންނާނެ ކަމަށާއި، އެހެންކަމުން ގައުމީ ޓީމާ އެއްކޮށް ހުރިހާ ދިވެހި ރައްޔިތުން ތިބުމަށް އެދޭ ކަމަށްވެސް އިމްރާން ބުންޏެވެ.
އަދި ހަމަ އަޅުގަނޑުމެންގެ އެ ހޯމް އެޑްވާންޓޭޖް ނަގަން ބޭނުމިއްޔާ އަޅުގަނޑުމެންގެ 12 ވަނަ ކުޅުންތެރިޔާގެ އެހީތެރިކަމާއެކު، އިރާދަކުރެއްވިއްޔާ ހަމަ އިންޑިއާ އަކަސް އެހެން ބަޔަކަސް އަޅުގަނޑުމެންގެ ގަލޮޅު ދަނޑުގައި ޖެހިލުންވާ ބައެއް އަޅުގަނޑަކަށް ހިއެއް ނުވޭ ދިވެހި ޓީމަށް އަންނާނެހެންނެއް.ގައުމީ ޓީމުގެ އެސިސްޓަންޓް ކޯޗު އިމްރާން މުޙައްމަދު
މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރަމުން އަންނައިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.
ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެރޭ ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.
