ދިވެހި ރައްޔިތުންނާއެކު މަސައްކަތްކޮށްގެން މި ތަށިވެސް ކާމިޔާބުކުރާނަން: އަކޫ

ދިވެހި ރައްޔިތުންނާއެކު މަސައްކަތްކޮށްގެން މި ފަހަރުގެ ސާފް ޗެމްޕިއަންޝިޕުވެސް ކާމިޔާބުކުރަން މަސައްކަތްކުރާނެ ކަމަށް ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) ބުނެފިއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގަތަރުގައި ގައުމީ ޓީމުން ފަރިތަކުރަމުން އަންނައިރު، ކޭމްޕް ފުރިހަމަކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

މި ފަހަރުގެ މުބާރާތާ ކުރިމަތިލާއިރު، ރާއްޖޭން ވަނީ 2018 ވަނަ އަހަރު ބަންގްލަދޭޝްގެ ވެރިރަށް ޑާކާގައި ބޭއްވި މުބާރާތުގެ ޗެމްޕިއަންކަން ހޯދާފައެވެ. އެ ފަހަރު ރާއްޖޭން ސާފް ޗެމްޕިއަންޝިޕް ކާމިޔާބުކުރީ އަކޫގެ ލީޑާޝިޕުގެ ދަށުންނެވެ. އޭގެ ކުރިން އެންމެ ފުރަތަމަ 2008 ވަނަ އަހަރު ރާއްޖޭން ސާފް ޗެމްޕިއަންޝިޕް ކާމިޔާބުކުރިއިރު، އޭރު ގައުމީ ޓީމުގެ ކެޕްޓަނަކީ އަކޫގެ ބޭބެ އައްސަދު އަބްދުލް ޣަނީއެވެ.

އަންގާރަ ދުވަހުގެރޭ ގަތަރުގައި ކުރިއަށްގެންދިޔަ ފަރިތަކުރުންތަކަށްފަހު ދިން އިންޓަވިއުއެއްގައި އަކޫ ބުނީ 2018 ވަނަ އަހަރުގެ މުބާރާތަށްފަހު ވަރަށް އުނދަގޫ ހާލަތެއް ކުރިމަތިވި ކަމަށާއި، އަދި އެ ހާލަތަށް ބަލާއިރު ނިމިދިޔަ ފީފާ ވޯލްޑް ކަޕުގެ ކޮލިފައިން މެޗުތައްވެސް ދިޔައީ އެންމެ ހީކުރި ގޮތަށް ނޫން ކަމަށެވެ. އެކަމަކު ފަހުން ޓީމު އެކުލަވާލައި މާލޭގައި ފަރިތަކުރުމަށްފަހު، ގަތަރުގައި މިހާރު ތަމްރީނުތައް ކުރިއަށްގެންދާއިރު ޓީމު ވަރަށް ބޮޑުތަކުން ރަނގަޅުވެފައިވާ ކަމަށްވެސް ބުންޏެވެ. އެގޮތުން ދުވަހަކަށްވުރެ ދުވަހެއް ކުޅުންތެރިންގެ މޯޓިވޭޝަން ރަނގަޅުވަމުން އަންނަ ކަމަށާއި، ޓީމުގެ މިސްރާބު މިހާރު އޮތީ ރަނގަޅަށް ކަމަށްވެސް އަކޫ ބުންޏެވެ.

އަކޫ ބުނީ ކުރިއާ އަޅާ ބަލާއިރު ޓީމުގެ ރޫހު ވަރަށް ބޮޑަށް ތަފާތު ކަމަށާއި، މިހާރު މަސައްކަތްކުރަމުން ދަނީ އެއްބައިވަންތަކަމާއެކުގައި ކަމަށެވެ. އެކަމަކު މުބާރާތަށް ދާ ސްކޮޑުގައި ހިމެނެން ކޮންމެ ކުޅުންތެރިއަކުވެސް ބޭނުންވާނެ ކަމަށާއި، އެގޮތުން ގައުމު ތަމްސީލްކުރަން އައިސް ތިބި 29 ކުޅުންތެރިންގެ ތެރެއިން ވަކި އަދަދެއްގެ ބަޔަކަށް މުބާރާތަށް ދެވޭއިރު، އެ ޖާގައަށް ހުރިހާ ކުދިންވެސް މަސައްކަތްކުރަމުން އަންނަ ކަމަށްވެސް ބުންޏެވެ.

އަދި ހުރިހާ ކުޅުންތެރިންގެ ފަރާތުންވެސް މޯޓިވޭޝަން އާއި މަސައްކަތް ވަރަށް ރަނގަޅަށް ފެންނަ ކަމަށާއި، އެހެންކަމުން ދިވެހި ރައްޔިތުންނާއެކު މަސައްކަތްކޮށްގެން މި ފަހަރުގެ ތަށިވެސް ކާމިޔާބުކުރަން މަސައްކަތްކުރާނެ ކަމަށް އަކޫ ވަނީ ބުނެފައެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރަމުން އަންނައިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެ ހަވީރު ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.