ކުރިއަށް އޮތް ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގަތަރުގައި ކުރިއަށްގެންދާ ކޭމްޕަކީ ޓީމު ބިނާކުރަން ލިބިފައި އޮތް ރަނުގެ ފުރުސަތެއް ކަމަށް ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އިސްމާޢީލް މަހްފޫޒް (އިންމަ) ބުނެފިއެވެ.

މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގައުމީ ޓީމުން ގަތަރުގައި ކޭމްޕުކުރާއިރު، ގަތަރު ކޭމްޕަށް ގައުމީ ޓީމު ފުރާފައިވަނީ ހުކުރު ދުވަހުގެ ހެނދުނުގެ ވަގުތެއްގައެވެ. މި ކޭމްޕް ފުރިހަމަކުރުމަށްފަހު ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ މި މަހުގެ 28 ވަނަ ދުވަހެވެ.

ގައުމީ ޓީމުން ގަތަރުގައި ފަރިތަކުރުންތައް ފެށި ނަމަވެސް، ދާދި ފަހުން ކޮވިޑް-19 އަށް ޕޮޒިޓިވްވުމާއެކު ގަތަރު ކޭމްޕަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ފުރާފައެއް ނުވެއެވެ. މީގެ ކުރިން "ރާއްޖެ.އެމްވީ" އަށް ދިން އިންޓަވިއުއެއްގައި ސުޒޭން ބުނީ ކޮވިޑަށް ޕޮޒިޓިވްވުމުން އޭނާ ދެން ގަތަރު ކޭމްޕަށް ފުރާނީ 14 ދުވަސް ހަމަކުރުމަށްފަހު، ވައިރަހުން ރަނގަޅުވުމުން ކަމަށެވެ. އެއާއެކު ގަތަރު ކޭމްޕުގައި ގައުމީ ޓީމުގެ ކަންކަން ބަލަހައްޓާނީ އެސިސްޓަންޓް ކޯޗު އިންމައެވެ.

އާދީއްތަ ދުވަހުގެރޭ ގަތަރުގައި ކުރިއަށްގެންދިޔަ ފަރިތަކުރުންތަކަށްފަހު ދިން އިންޓަވިއުއެއްގައި އިންމަ ބުނީ ގަތަރުގައި ކޭމްޕުކުރަން ލިބުނު ފުރުސަތަކީ ޓީމު ބިނާކުރުމަށް ލިބުނު ވަރަށް މުހިއްމު ފުރުސަތެއް ކަމަށެވެ. އެގޮތުން ޓީމުގެ ހުރިހާ ކުޅުންތެރިން އެއް ތަނެއްގައި އުޅޭއިރު، ހުރިހާ ކުޅުންތެރިން ވީހާވެސް ބޮޑަށް ދަނެ، ފުޓްބޯޅައިގެ މައިދާނުގައި ކަންކަން ދަސްކުރުމުގެ އިތުރުން އެ ކުޅުންތެރިން އެކަކު އަނެކަކަށް ދަސްވުމުގެ ފުރުސަތުވެސް އޮންނާނެ ކަމަށްވެސް ބުންޏެވެ. އެހެންކަމުން މީގެ ބޭނުން ވީހާވެސް އެންމެ ރަނގަޅަށް ބޭނުން ކުރާނެ ކަމަށް އިންމަ ވަނީ ބުނެފައެވެ.

ގަތަރުގައި ކުރިއަށްދާ ކޭމްޕުގައި ގައުމީ ޓީމުން އެކުވެރިކަމުގެ ތިން މެޗެއް ކުޅުމަށް އަންނަނީ މަސައްކަތްކުރަމުންނެވެ. އޭގެ ތެރެއިން އެއް މެޗުގައި ސްރީ ލަންކާއާ ދެކޮޅަށް ބައިނަލްއަގުވާމީ އެކުވެރިކަމުގެ މެޗެއް ކުޅުމަށްވެސް ގައުމީ ޓީމުން އަންނަނީ މަސައްކަތްކުރަމުންނެވެ. އިންމަ ބުނީ އެ މެޗުތަކުގެ ފޯކަސްވެސް ހުރީ މި ފަހަރުގެ ސާފް ޗެމްޕިއަންޝިޕާއި އެ މުބާރާތުގެ ނަތީޖާއަށް ކަމަށެވެ. އެހެންކަމުން ކުޅުންތެރިންގެ ރިކަވަރީއަށް ވިސްނައިގެން ގިނަ ކުޅުންތެރިންނަށް ފުރުސަތު ދެވޭތޯ ބަލާނެ ކަމަށްވެސް ވަނީ ބުނެފައެވެ.

މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރާއިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.

ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެ ހަވީރު ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.