ހުޅުމާލޭ ފިޔަވަތީގައި އުޅޭ ކުދިންތަކަކަށް އަނިޔާކުރި ކަމަށް ބުނާ މައްސަލައެއް ބަލަމުންދާ ކަމަށާއި، މިހާތަނަށް ބެލިބެލުމުން އަނިޔާ ކުރި ކަމަށް ފާހަގަކުރެވިފައިނުވާ ކަމަށް ޖެންޑާ މިނިސްޓްރީން ބުނެފިއެވެ.

ރާއްޖެއެމްވީއަށް ޖެންޑާ މިނިސްޓްރީގެ ޑެޕިއުޓީ މިނިސްޓަަރު ފާތިމަތު ޔުމްނާ ވިދާޅުވީ ފިޔަވަތީގައި ދިރިއުޅޭ ކުދިންނަށް އަނިޔާކުރާކަމަށް ބުނެ އާއްމުންގެ މީހަކު މައްސަލަ ހުށަހަޅާފައިވާ ކަމަށާއި، އެ މައްސަލައާ ގުޅިގެން ކަމާބެހޭ ފަރާތްތަކުން އެކޭސްއަށް އެޓެންޑް ވެފައިވާ ކަމަށެވެ. އެމައްސަލަ ތަހުގީގު ކުރަމުންދާއިރު، މިހާތަނަށް އަނިޔާކުރި ކަމަށް ނުބެލެވޭ ކަމަށް ޔުމްނާ ވިދާޅުވިއެވެ.

ޔުމްނާ ވިދާޅުވީ މުވައްޒަފުންގެ މައްސަލަތައް ބެލުމަށް ވެސް ޚާއްސަ ކޮމެޓީއެއް އޮންނަ ކަމަށާއި، މުވައްޒަފެއްގެ މައްސަލައެއް ފާހަގަކުރެވިއްޖެނަމަ އެކޮމެޓީން މައްސަލަ ބަލާނެ ކަމަށެވެ. އަނިޔާގެ ފަދަ މައްސަލަތަކުގައި އަމަލުކުރަންޖެހޭ ޚާއްސަ އުސޫލެއް އޮންނަ ކަމަށާއި، މިފަދަ ކަމެއް ކުރިކަން ސާބިތުވާ ހިސާބުން އެމުވައްޒަފަކާމެދު ފިޔަވަޅު އަޅާނެ ކަމަށް ޔުމްނާ ވިދާޅުވިއެވެ.

ޔުމްނާ ވިދާޅުވީ ކުދިންގެ ހައްގުތައް ކަށަވަރުކޮށްދިނުމާއި، އެކުދިންނަށް އަމާން ރައްކާތެރި މާހައުލެއް ގާއިމްކޮށް ދިނުމަށް ޚާއްސަ އިސްކަމެއް ދީގެން ޖެންޑާ މިނިސްޓްރީން މަސައްކަތް ކުރަމުންދާ ކަމަށެވެ. އަދި ކުއްޖަކަށް އަނިޔާއެއް ލިބިއްޖެކަމުގައިވާނަމަ އެކުދިންނާ ވާހަކަ ދެކެވި، އެކުދިންނަށް ދޭންޖެހޭ ފަރުވާތައް ދޭނެ ކަމަށް ޔުމްނާ ވިދާޅުވިއެވެ.

މި މައްސަލައާ ގުޅިގެން ޖެންޑާ މިނިސްޓްރީން ނެރުނު ނޫސްބަޔާނުގައި ބުނީ ދައުލަތުގެ ބެލުމުގެ ދަށުގައިވާ ކުދިންނަކީ އެކި ބާވަތްތަކުގެ އަނިޔާ ލިބި، އެ ކަންކަމުގެ އަސަރު މުޅި ދިރިއުޅުމަށް ދެމިގެންދާ ފަދަ ކަންކަން ތަހައްމަލްކުރާ ކުދިން ކަމަށެވެ. އަދި އެ ކަންކަމަކީ ކުއްޖާގެ ނަފްސާނީ ސިއްހަތާ ގުޅިފައިވާ ކަންކަމަށްވާތީ އެ އިހުސާސްތައް އެކި ގޮތްގޮތަށް ބުނެދިނުމަށް މަސައްކަތް ކުރާ ކަމަށް އެ ބަޔާނުގައި ބުނެފައިވެއެވެ.

މިމަހުގެ 7 ވީ އަންގާރަ ދުވަހުގެ ރޭ ސޯޝަލް މީޑިއާގައި އާންމުވި ވީޑިއޯއެއްގައި، ފިޔަވަތީ ތެރޭގައި ހުރި ކުއްޖަކު "އަނިޔާކުރަނީ" އޭ ބުނާ އަޑު ވެސް އިވެއެވެ. އޭރު އެ ސަރަހައްދަށް ބަޔަކު އެއްވެ ތިއްބެވެ.