އދ. އޮމަދޫގައި 11 މަހުގެ ކުއްޖަކު މަސްފެންގަނޑަކަށް ވެއްޓި ނިޔާވެއްޖެއެވެ.

އެކަމާ ގުޅޭގޮތުން ފުލުހުން ބުނީ އދ. އޮމަދޫގެ ގެއެއްގެ ގޯތި ތެރޭގައި ހުރި މަސްފެންގަނޑަކަށް 11 މަހުގެ ފިރިހެން ކުއްޖަކު ވެއްޓިފައިވާ ކަމުގެ މައުލޫމާތު ހޮނިހިރު ދުވަހުގެ 18:30ގައި ލިބުނު ކަމަށެވެ. އަދި އެ ރަށު ސިއްޙީ މަރުކަޒަށް ކުއްޖާ ގެންދިޔައިރުވެސް ނިޔާވެފައިވާކަމަށް ސިއްޙީ މަރުކަޒުން ފުލުހުންނަށް މައުލޫމާތު ދީފައިވާކަމަށް ވަނީ ބުނެފައެވެ.

މި ޙާދިސާއާގުޅިގެން ބަލަންޖެހޭ ކަންކަން ބަލައި ތަހުގީގު ކުރަމުންދާކަމަށްވެސް ފުލުހުން ވަނީ ބުނެފައެވެ.

އެކަމާ ގުޅޭގޮތުން ޖެންޑަރ މިނިސްޓްރީންވެސް ވަނީ މި ހާދިސާ އެއަތޮޅުގެ އެފް.ސީ.އެސް.ސީގެ ސަމާލުކަމަށް އައިސްފައިވާކަން ފާހަގަކޮށް، މި ހާދިސާއާގުޅިގެން ކަމާގުޅުންހުރި ފަރާތްތަކުގެ ހާލަތު ދެނެގަނެ އެފަރާތްތަކަށް ދޭންޖެހޭ އިޖުތިމާޢީ އަޅާލުން ފޯރުކޮށްދިނުމަށް ކުރަންޖެހޭ ކަންކަން، އަތޮޅު އެފް.ސީ.އެސް.ސީ އާއި, ރަށު ކައުންސިލްއާއި, ޗައިލްޑް އެންޑް ފެމިލީ ޕްރޮޓެކްޝަން ސަރވިސަސް ގުޅިގެން މިހާރު ފަށާފައިވާކަމަށް ބުނެފައެވެ.

އާއިލާއަށް ކުރިމަތިވެފައިވާ ހިތާމަވެރި މި ވަގުތުގައި، އެންމެހާ ފަރާތްތަކުން ވެސް އާއިލާގެ ކަރާމާތަށް އިޙްތިރާމް ކުރެއްވުމަށް މިނިސްޓްރީން ވަނީ އެދިފައެވެ.