ގަވާއިދާއި ޚިލާފަށް އެތެރެކޮށްފައި ވަނިކޮށް އަތުލައިގަތް ދުންފަތު ގެ ބާވަތްތަކު ގެ މަގުމަތީ އަގު ހަތް މިލިއަން ރުފިޔާ އަށް ވުރެ ބޮޑު!

ޤަވާއިދާއި ޚިލާފަށް ރާއްޖެ އަށް އެތެރެކޮށްފައި ވަނިކޮށް ފުލުހުން ގެ ބެލުމުގެ ދަށަށް ގެންދިޔަ ދުންފަތުގެ ބާވަތްތަކުގެ މަގުމަތީ އަގު 7،341،961 ރުފިޔާ އަށް އަރާ ކަމަށް ފުލުހުން ބުނެފި އެވެ.

އެކަން ހާމަ ކުރެއްވީ އަންގާރަ ދުވަހު ބޭއްވި ނޫސްވެރިންގެ ބައްދަލުވުމެއްގައި މާލޭ ފްރޮންޓްލައިންގެ ހެޑް، ސުޕްރިންޓެންޑެންޓް އޮފް ޕޮލިސް އަބްދުﷲ ރަޝީދު އެވެ.

އޭނާ ވިދާޅުވި ގޮތުގައި މި އަހަރު ދުންފަތާއި ދެކޮޅަށް 8 އޮޕަރޭޝަން ހިންގާފައި ވެ އެވެ. އެ ފަދަ މައްސަލަތަކުގައި 15 މީހަކަށް ފިޔަވަޅު އަޅާފައިވާ އިރު ހިފަހައްޓާފައިވާ ތަކެތީގެ އަދަދު 50،616ރ. އަށް އަރަ އެވެ. އޭގެ ތެެރޭގައި 44،000 އަށް ވުރެ ގިނަ ސިނގިރެޓްގެ ކާޓަން އަދި 4،000 އަށް ވުރެ ގިނަ ވޭޕް އަދި މި ނޫނަސް ދުންފަތުގެ އެހެނިހެން ބާވަތްތައް ހިމެނެ އެވެ. މި އޮަޕަރޭޝަންތަކުގައި ނަގުދު ފައިސާގެ ގޮތުގައި 294،240ރ. ފުލުހުންގެ ބެލުމުގެ ދަށަށް ގެންގޮސްފައި ވެ އެވެ.

އޭނާ ވަނީ އިތުރު ބައެއް ކުށްތަކުގެ ތަފާސް ހިސާބުތަކަށް އަލިއަޅުވާލާފަ އެވެ.

119 އަށް ދުވާލަކު އެވްރެޖްކޮށް 1500 ކޯލް އައިސްފައިވާ ކަމަށް އަބްދުﷲ ރަޝީދު ވަނީ ވިދާޅުވެފަ އެވެ. 18،827 ކޯލް އަކަށް ފުލުހުން ޑިސްޕެޗްކޮށްފައި ވާ އިރު 280،142 ފަހަރު ކުށްކުރާ ތަންތަން ބަލާ ފާސްކޮށްފައިވާ ކަމަށާއި 766 މީހުން އެކި ކުށްކުށުގައި ޖޫރިމަނާ ކޮށްފައިވާ ކަމަށް އޭނާ ވިދާޅުވި އެވެ. އަދި 58،544 މީހުން ހުއްޓުވާ ސުވާލުކޮށްފައިވާ އިރު 10.627 ގަޑި އިރު ޕެޓްރޯލްކޮށްފައިވެ އެވެ. ހަމައެހެންމެ 123 މީހުން ހައްޔަރު ކޮށްފައިވާ އިރު، ހުއްޓުވައިގެން 13،445 އުޅަނދު ބަލާ ފާސްކޮށްފައި ވެ އެވެ. އަދި 2721 މީހުން ހުއްޓުވައިގެން ފާސްކޮށްފައި ވާއިރު އިމިގްރޭޝަނާއި 56 މީހަކު ހަވާލުކޮށްފައިވެ އެވެ.