ކުށްކުރާ މާހައުލުތަކުން ކުޑަކުދިން ފެންނަ ނިސްބަތް ދަނީ އިތުރުވަމުން، ބެލެނިވެރިން ހާއްސަ ސަމާލު ކަމެއް ދޭން ޖެހޭ: ކޮމިޝަނަރ އޮފް ޕޮލިސް
ކުށްކުރާ ކަމަށް ބެލެވޭ "ހޮޓް ސްޕޮޓް" ތަކުން ކުރިން ފެންނަ މޫނުތައް މަދުވެފައިވާ ކަމަށާއި، މިހާރު ފެންނަނީ އައު މޫނުތަކެއް ކަމަށް. އޭގެެތެރޭގައި ގިނައީ ކުޑަކުދިން ކަމަށާއި، އެހެންކަމުން މިއީ މިހާރު އިންތިހާ ދަރަޖައަށް ކަންބޮޑުވުން އޮތްކަމެއް ކަމަށް ފާހަގަކުރެއްވި.
ކޮމިޝަނަރ އޮފް ޕޮލިސް އިސްމާއީލް ނަވީން: ވިދާޅުވީ ދިވެހި ފުލުހުންގެ ޚިދުމަތް ހަރުދަނާކުރެއްވުމުގެ ގޮތުން އެންމެ ބޮޑު އިސްކަމެއް ދެއްވާނީ ފުލުހުންނާމެދު ރައްޔިތުންގެ އޮތް އިތުބާރު ދެމެހެއްޓުމަށްކަމަށް
ކުށްކުރާ މާހައުލުތަކުން ކުޑަކުދިން ފެންނަ ނިސްބަތް އިތުރުވަމުންދާ ކަމަށާއި ބެލެނިވެރިން އެކަމަށް ހާއްސަަ ސަމާލުކަމެއް ދެއްވުމަށް ކޮމިޝަނަރ އޮފް ޕޮލިސް އިސްމާޢީލް ނަވީން އިލްތިމާސް ކުރައްވައިފި އެވެ.
ދާޚިލީ ސަލާމަތާއި ފަންނިއްޔަތާ ބެހޭ ވުޒާރާގެ ދަށުން މަސައްކަތްކުރާ އިދާރާތަކުގެ މަސައްކަތްތަކާ ގުޅޭގޮތުން މައުލޫމާތު ދެއްވުމަށް ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން ކޮމިޝަނަރ އޮފް ޕޮލިސް އިސްމާޢީލް ނަވީން ވިދާޅުވީ ކުށްކުރާ ކަމަށް ބެލެވޭ "ހޮޓް ސްޕޮޓް" ތަކުން ކުރިން ފެންނަ މޫނުތައް މަދުވެފައިވާ ކަމަށާއި، މިހާރު ފެންނަނީ އައު މޫނުތަކެއް ކަމަށެވެ. އޭގެެތެރޭގައި ގިނައީ ކުޑަކުދިން ކަމަށާއި، އެހެންކަމުން މިއީ މިހާރު އިންތިހާ ދަރަޖައަށް ކަންބޮޑުވުން އޮތްކަމެއް ކަމަށް ފާހަގަކުރެއްވި އެވެ.
މިކަމުގެ ކަންބޮޑުވުން ފާހަގަކުރައްވައި ކޮމިޝަނަރ ވަނީ އެފަދަ ތަންތަނުން ފެންނަ ކުޑަކުދިންގެ ކުށުގެ ރެކޯޑް ނެތުމުން ނަސޭހަތްދީ ފޮނުވާލާ ކަމަށާއި މިކަމުގައި މައިންބަފައިންނާއި އެފަދަ ކުދިންގެ ބެލެނިވެރިން ސަމާލުވެ ދަރިން ގޮސްއުޅޭ ތަންތަން ދެނެގަނެ އެކުދިިންގެ ކަންކަން ގާތުން ބެލުމަށް އިލްތިމާސްކުރެއްވި އެވެ.
ނޫސްވެރިންގެ މި ބައްދަލުވުމުގައި ބިދޭސީންގެ މައްސަލައަށް އަލިއަޅުވާލައްވައި ކޮމިޝަނަރ އޮފް ޕޮލިސް ވިދާޅުވީ ގަވާއިދާ ހިލާފަށް ގެންނަ ކޮންޓްރާބޭންޑް އެންމެ ގިނައިން ގެންގުޅެނީ ގަވާއިދާ ހިލާފަށް އުޅޭ ބިދޭސީންކަން ފާހަގަކުރައްވައި، އެތަކެތި ރީޓެއިލް ފިހާރަތަކަށް ޑެލިވަރ ކުރާކަމަށެވެ. އަދި ގަވާއިދުގެ ތެރޭގައި ތިބޭ ބިދޭސީން މި ކަހަލަ ކަންތައްތައް ކުރާނަމަ އެ ފަރާތްތަކުގެ ސްޕޮންސަރުން އެކަމުގެ ޒިންމާ ނަންގަވަން ޖެހޭނެކަމަށް ވިދާޅުވި އެވެ.
މީގެއިތުރުން، އިމިގްރޭޝަނާ އެކު ހިންގާ ޖޮއިންޓް އޮޕަރޭޝަންސްތަކުގެ ތެރޭގައި މާލެ ސަރަހައްދުގައި އާއި އަތޮޅު ތެރޭގައި ޖުމްލަ 102 އޮޕަރޭޝަން ހިންގާފައިވާއިރު، މި އޮޕަރޭޝަންތަކުގައި 800 އިލީގަލް އިމިގްރެންޓްސް އިމިގްރޭޝަނާ ހަވާލުކުރެވިފައިވާ ކަމަށާއި، އިމިގްރޭޝަންގެ ގާނޫނާއި ގަވާއިދާ ޙިލާފުވެގެން 278 ފަރާތެއް ވެސް އިމިގްރޭޝަނާ ހަވާލުކުރެވިފައިވާ ކަމަށް ކޮމިޝަނަރ ވިދާޅުވި އެވެ.
މިބައްދަލުވުމުގައި ކޮމިޝަނަރ އޮފް ޕޮލިސް ވަނީ ފާއިތުވި އަހަރުތަކުގައި ފުލުހުން ކޮށްފައިވާ މަސައްކަތްތަކާއި މިހާރު ކުރަމުންގެންދާ މަސައްކަތްތަކާ ގުޅޭގޮތުން މައުލޫމާތު ހިއްސާކުރައްވާފަ އެވެ.
