911 އަށް ގުޅުމުން 5 ސިކުންތުން ފޯނު ނަގާ ކަމަށް ބުނެ ފުލުހުން ހެދީ ދޮގެއް!
ކުއްލި ހާލަތްތަކުގައި ގުޅައިގެން 911 އިން ޖަވާބު ނުލިބޭތީ އެކަމުގެ ކަންބޮޑުވުން މީގެ ކުރިން ބައެއް ފަރާތްތަކުން ފާޅު ކޮށްފައި ވެ އެވެ. ރާއްޖެއެމްވީ އިން މިކަން ބެލި ބެލުމުން ވެސް އެނގުނީ ފުލުހުން ބުނި ޓައިމް ފްރޭމްގައި ފޯނަށް އެޓެންޑް ނުވާ ކަން.
ފުލުހުންގެ މައި އިދާރާ، ޝަހީދު ހުސައިން އާދަމް ބިލްޑިން
ފުލުހުންގެ ކޮމާންޑް ސެންޓަރުގެ ނަންބަރު 911 އަށް އަންނަ ފޯން ކޯލު ތަކަށް 2 ސިކުންތުން ނުވަތަ 5 ސިކުންތުން ފޯނު ނަގާކަމަށް ބުނެ ފުލުހުން ދޮގު ހަދައިފި އެވެ.
އަންގާރަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ސުޕްރިންޓެންޑެންޓް އޮފް ޕޮލިސް އަބްދުﷲ ރަޝީދު ވިދާޅުވީ ފުލުހުންގެ ކޮމާންޑް ސެންޓަރުގެ ނަންބަރު 911 އަށް ދުވާލެއްގެ މައްޗަށް އެވްރެޖްކޮށް 1،500 އެއްހާ ފޯން ކޯލު އަންނަ ކަމަށެވެ.
2025 ވަނަ އަހަރު ކުރެވިފައިވާ މަސައްކަތްތަކަށް ބަލާއިރު އަޅުގަނޑުމެންގެ ކޮމާންޑް ސެންޓަރަށް ނުވަތަ މޯލްޑިވްސް ޕޮލިސް ސަރވިސް ގެ 911 އަށް މިއަހަރު އެވްރެޖް ކޮށް ދުވާލަކު 1500 ކޯލް އާދޭ. 1500 ރައްޔިތުންގެ ކޯލް. އެ ފޯނު ކޯލަށް އަޅުގަނޑުމެން ޓޫ ޓު ފައިވް ސެކަންޑްސް ތެރޭގަ އެޓެންޑްވެފަ ހުރީ،ސުޕްރިންޓެންޑެންޓް އޮފް ޕޮލިސް އަބްދުﷲ ރަޝީދު
ފުލުހުން މިހެން ބުނި ނަމަވެސް ކުއްލި ހާލަތްތަކުގައި ގުޅައިގެން 911 އިން ޖަވާބު ނުލިބޭތީ އެކަމުގެ ކަންބޮޑުވުން މީގެ ކުރިން ބައެއް ފަރާތްތަކުން ފާޅު ކޮށްފައި ވެ އެވެ. ރާއްޖެއެމްވީ އިން މިކަން ބެލި ބެލުމުން ވެސް އެނގުނީ ފުލުހުން ބުނި ޓައިމް ފްރޭމްގައި ފޯނަށް އެޓެންޑް ނުވާ ކަމެވެ.
ދިމާވާ ކުއްލި ހާލަތްތަކުގައި ގުޅޭނެ ނަންބަރެއްގެ ގޮތުގައި 911 ނަމްބަރު ތައާރަފްކޮށް ޚިދުމަތް ދޭން ފެށީ 2024 ނޮވެމްބަރު 14 ވަނަ ދުވަހު އެވެ.
މި ނަންބަރު ތައާރަފް ކުރުމާއި އެކު ކުއްލި ހާލަތްތަކުގައި ހަރަކާތްތެރިވާ ހުރިހާ އިދާރާތަކަކަށް އެއް ނަންބަރަކުން ގުޅޭނެ އިންތިޒާމް ހަމަޖެހިގެންދާނެ ކަމަށް ހޯމް މިނިސްޓަރު އަލީ އިހުސާނު ވިދާޅުވި އެވެ. މި ނަންބަރާ އެކު މައްސަލަތައް ހައްލުކުރުން އަވަސްވެ، ޚިދުމަތް ދިނުން ވެސް އަވަސް ވެގެންދާނެ ކަމަށް އިހުސާން ވަނީ ފާހަގަ ކުރައްވާފަ އެވެ.
އެ ޚިދުމަތް ފެށުމާއި އެކު އެއްފަހަރާ އެމްބިއުލާންސް، ފުލުހުން، އެމްއެންޑީއެފްގެ ފަޔަރ އެންޑް ރެސްކިއުގެ އިތުރުން ކޯސްޓްގާރޑް ގެ ސަމާލު ކަމަށް ކަންކަން ގެނެވޭނެ ކަމަށް ވަޒީރު ވިދާޅުވި އެވެ.
