އަޑޭ ހިމެނުމާ މެދު ޖެހިލުންވާންޖެހޭ ކަމެއް ނެތް: ސުޒޭން

ގައުމީ ފުޓްބޯޅަ ޓީމުގައި ހުނަރުވެރި މިޑްފީލްޑަރު އަސްހަދު އަލީ (އަޑުބަރޭ) ހިމެނުމާ މެދު ޖެހިލުންވާންޖެހޭ އެއްވެސް ކަމެއް ނެތް ކަމަށް ގައުމީ ޓީމުގެ ކޯޗު އަލީ ސުޒޭން ބުނެފިއެވެ.

ކުޅިވަރާ ބެހޭ ވުޒާރާގެ ސްޓޭޓް މިނިސްޓަރުގެ މަގާމުގައި ހުރި މިހާރު އުމުރުން 34 އަހަރުގެ އަޑޭ ގައުމީ ޓީމަށް އަލުން ނެގިއިރު، އޭނާ ވަނީ 2018 ވަނަ އަހަރުގެ މާޗު މަހުގެ ތެރޭގައި ގައުމީ ޓީމުން ރިޓަޔާކޮށްފައެވެ. އެ ފަހަރު އޭނާ ގައުމީ ޓީމުން ރިޓަޔާކުރީ އޭރުގެ ގައުމީ ޓީމުގެ ކޯޗު ޕީޓަ ސެގާޓުގެ ކުއްލި ނިންމުމަކާ މެދު ހިތްހަމަނުޖެހިގެންނެވެ. އެކަމަކު އަންނަ އޮކްޓޯބަރު މަހު ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕަށް ގައުމީ ޓީމުން އެކުލަވާލި 34 ކުޅުންތެރިންގެ ޕްރިލިމިނަރީ ސްކޮޑުގައި އަޑޭ ވަނީ ހިމަނާފައެވެ.

ގައުމީ ޓީމަށް އަޑޭ ނެގުމުން ގިނަ ބަޔަކު އަންނަނީ ސޯޝަލް މީޑިއާގައި އެ ނިންމުމަށް ފާޑުކިޔަމުންނެވެ. އެކަމާ ބެހޭގޮތުން ބުރާސްފަތި ދުވަހު ގައުމީ ފުޓްބޯޅަ ދަނޑުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސުޒޭން ބުނީ އަޑޭ ގައުމީ ސްކޮޑުގައި ހިމެނުން ސޯޝަލް މީޑިއާގައި ވަރަށް ބޮޑަށް ފާޑުކިޔާނެ ކަމަށް ބެލެވުނު ކަމަށެވެ. އެކަމަކު އަޑޭ ޓީމުގައި ހުރުމުން ހިތްހަމަނުޖެހުން ފާޅުކޮށްފައި ހުރީ ދެތިން ކުއްޖަކު ކަމަށާއި، ގައުމީ ޓީމުގައި އަޑޭ ހިމެނީ ކޯޗިން ޓީމާ މަޝްވަރާ ކުރުމަށްފަހު ކަމަށްވެސް ބުންޏެވެ.

ސުޒޭން ބުނީ އަޑޭ ގައުމީ ޓީމަށް ނެގުމަށް އޭނާ އެންމެ ފަހުން ފަރިތަކުރި ޓީމު ކަމަށްވާ ކުލަބު އީގަލްސްގެ ކޯޗު މުޙައްމަދު ޝާޒްލީއާވެސް މަޝްވަރާކުރި ކަމަށެވެ. އަދި އެ ނިންމުން ނިންމީ އޭނާގެ ފިޓްނަސް ރަނގަޅުވުމުން ކަމަށާއި، އެހެންކަމުން އަޑޭ ހިމެނުމާ މެދު ޖެހިލުންވާންޖެހޭ އެއްވެސް ކަމެއް ނެތް ކަމަށްވެސް ސުޒޭން ބުންޏެވެ.

އަޑޭ އަލުން ގައުމީ ޓީމުގައި ހިމެނިއިރު، ގައުމީ ޓީމުން 2007 ވަނަ އަހަރު ޖާގަ ހޯދި އަޑޭ ފާހަގަވެގެން ގޮސްފައިވަނީ ޖެހިލުން ކުޑަ މިޑްފީލްޑަރެއްގެ ގޮތުގައެވެ. އަދި އޭނާ ވަނީ ރާއްޖޭން 2014 ވަނަ އަހަރުގެ އޭއެފްސީ ޗެލެންޖް ކަޕުގެ ތިންވަނަ ހޯދިއިރު މުހިއްމު ދައުރެއް އަދާކޮށްފައެވެ. މީގެ އިތުރުން އަޑޭ ވަނީ ގައުމީ ޓީމުގެ ކެޕްޓަން ބޭންޑް އަޅައިގެން ގިނަ މެޗުތަކެއް ކުޅެފައެވެ.

ކުލަބު ގްރީން ސްޓްރީޓްސްއަށް 2018 ވަނަ އަހަރު ކުޅުމަށްފަހު ކަކުލަށް ލިބުނު ސީރިއަސް އަނިޔާއެއްގެ ސަބަބުން ކުޅުމާ ދުރުގައި ހުރި އަޑޭ، އެ އަނިޔާއިން ރަނގަޅުވެ އީގަލްސްއާ ގުޅުނީ މިދިޔަ މާޗު މަހުގެ ތެރޭގައި އޭއެފްސީ ކަޕާ ދިމާކޮށެވެ.

އީގަލްސްއަކީ ފުރަތަމަ ޑިވިޝަނުގައި އަޑޭ ކުޅުނު ހަވަނަ ޓީމެވެ. ކުލަބު ވެލެންސިއާއިން ކެރިއަރު ފެށި އަޑޭ ވަނީ ގްރީން ސްޓްރީޓްސްގެ އިތުރުން ވިކްޓަރީ ސްޕޯޓްސް ކުލަބު، ވީބީ އައްޑޫ އެފްސީ، ނިއު ރޭޑިއަންޓް ސްޕޯޓްސް ކުލަބު އަދި މާޒިޔާ ސްޕޯޓްސް އެންޑް ރެކްރިއޭޝަނަށްވެސް ކުޅެފައެވެ. މީގެ ތެރެއިން ނިއު ރޭޑިއަންޓުން ވަނީ އޭނާގެ ކެޕްޓަންކަމުގެ ދަށުން 2015 ވަނަ އަހަރުގެ އުރީދޫ ދިވެހި ޕްރިމިއާ ލީގު ކާމިޔާބުކޮށްފައެވެ. އަދި މާޒިޔާއާއެކު އަޑޭ ވަނީ 2014 ވަނަ އަހަރުގެ އެފްއޭ ކަޕާއި، 2016 ވަނަ އަހަރުގެ ދިވެހި ލީގުގެ އިތުރުން 2017 ވަނަ އަހަރުގެ މާލޭ ލީގު ކާމިޔާބުކޮށްފައެވެ.