ވަސީލަތްތައް މަދުވުމަކީ ހެރިޓޭޖް މިނިސްޓްރީއަށް މިހާރު ދިމާވެފައިވާ ވަރަށް ބޮޑު ދަތިކަމެއް: ނާއިލް

މުއައްޒަފުންނާއި ވަސީލަތްތައް މަދުވުމަކީ ހެރިޓޭޖް މިނިސްޓްރީއަށް މިހާރު ދިމާވެފައިވާ ވަރަށް ބޮޑު ދަތިކަމެއް ކަމަށް އެމިނިސްޓްރީގެ ޑިރެކްޓަރ ކޮމިއުނިކޭޝަން އިސްމާޢީލް ނާއިލް ނަޝީދު ވިދާޅުވެއްޖެއެވެ.

ބުރާސްފަތި ދުވަހު މެދުޒިޔާރަތުގައި ބޭއްވި ނޫސްވެރިންގެ ބައްދަލުވުމުގައި ނާއިލް ވިދާޅުވީ މީގެ ކުރިން ރާއްޖޭގައި ތަރިކަ ހިމާޔަތް ކުރުމަށް މާބޮޑު މަސައްކަތްތަކެއް ކޮށްފައި ނުވާކަމަށެވެ. ނަމަވެސް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވެރިކަމަށް ވަޑައިގެން, ތަރިކަ ހިމާޔަތް ކުރުމަށް ޚާއްސަ ސަމާލުކަމެއް ދެއްވި ކަމަށެވެ. އެގޮތުން ކުރެވުނު މަސައްކަތްތަކުން އެކަމަށް ޚާއްސަ މިނިސްޓްރީއެއް އުފެދި މަސައްކަތްތައް ފެށިގެންދިޔަކަން ނާއިލް ފާހަގަކުރެއްވިއެވެ.

ނާއިލް ވިދާޅުވީ މީގެ ކުރިން އަޅާނުލެވި އޮތް ދާއިރާއަކަށްވުމާއެކު، މިހާރު ވެސް ބައެއް ދަތިތައް ކުރިމަތިވާ ކަމަށެވެ. އަދި މުއައްޒަފުންނާއި ވަސީލަތްތައް މަދުކަން ނާއިލް ފާހަގަކުރެއްވިއެވެ.

ނާއިލް ވިދާޅުވީ ތަރިކަ ހިމާޔަތް ކުރުމަށް ކުރަމުންދާ މަސައްކަތްތައް ކުރަމުންދަނީ އިޖްތިމާއީ ޒިންމާއެއްކަމަށް ދެކިގެން ކަމަށެވެ. ސަރުކާރުގެ ކުންފުނިތަކާއި މިނިސްޓްރީތަކާ މަޝްވަރާކުރެވި، އެ މުއައްސަސާތަކުގެ އެހީތެރިކަން ލިބެމުންދާ ކަމަށް އޭނާ ވިދާޅުވިއެވެ. އެގޮތުން ސްޓެލްކޯއަކީ ފާހަގަކޮށްލެވޭ ކުންފުންޏެއްކަމަށް ނާއިލް ވިދާޅުވިއެވެ.

މީގެ އިތުރުން ނާއިލް ވިދާޅުވީ އަތޮޅުތެރޭގެ ރަށްރަށުހުރި އާސާރީ ބިނާތައް ރައްކާތެރިކުރުމަށް ގިނަ މަސައްކަތްތަކެއް ކުރާ ކަމަށެވެ. އަދި ރަށްރަށުގައި ހަރަކާތްތެރިވާ ކުންފުނިތަކުން އިޖުތިމާއީ ޒިންމާގެ ދަށުން މިކަހަލަ މަސައްކަތްތަކުގައި އެއްބާރުލުން ދިނުމަށް އޭނާ އިލްތިމާސްކުރެއްވިއެވެ.