ގައުމީ ދާރުލްއާސާރުގެ ދޮރުމަތީގައި ސަތަރިއަޅައި ބަންދުކޮށްފައިވަނީ ކޮން ބައެއް ކަމަށް އެނގިވަޑައިނުގަންނަވާ ކަމަށް ހެރިޓޭޖް މިނިސްޓަރު އާދަމް ނަސީރު ވިދާޅުވެއެއްޖެއެވެ.

ހޯމަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ޖަލްސާގައި ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ވަނީ ތަކުރާރުކޮށް، ގައުމީ ދާރުލްއާސާރުގެ ދޮރުމަތީގައި ސަތަރިއަޅައިފައިވާތީ އެކަމާ ގުޅޭގޮތުން ތަކުރާރުކޮށް ސުވާލު ކުރައްވާފައެވެ. ގިނަ ސުވާލުތަކަށް ސީދާ ޖަވާބު ނުދެއްވައި، މިނިސްޓަރު އާދަމް ނަސީރު ވީދާޅުވެފައިވަނީ އެ މަސައްކަތް ކޮށްފައިވަނީ ހެރިޓޭޖް މިނިސްޓްރީން ނޫން ކަަމަށެވެ.

ދާރުލްއާސާރު ދޮރުމަތީގައި ސަތަަރި އަޅައި ކުރަމުންދާ މަސައްކަތް ސާފުކޮށް ނުދިނުމާއި ގުޅިގެން ރައްޔިތުން މަޖިލީހުގައި ތޮއްޑޫ ދާއިރާގެ މެންބަރު ހުސެއިން ސަމީރު ވަނީ އެމަސައްކަތް ކުރަނީ ކޮންބައެއްކަން މިނިސްޓަރު އާދަމް ނަސީރަށް އެނގިލައްވާތޯ ސުވާލު ކުރައްވާފައެވެ.

މިސުވާލަށް ޖަވާބު ދެއްވަމުން މިނިސްޓަރު އާދަމް ނަސީރު ވިދާޅުވީ، ގައުމީ ދާރުލްއާސާރުގެ ދޮރުމަތީގައި ސަތަރި ދަމާފައި ހުރީ ކޮންބައެއް، ކިހިނެތްތޯ ބަލާލަންޖެހޭ ކަމަށެވެ.

މިނިސްޓަރު އާދަމް ނަސީރު ވިދާޅުވީ، ދާރުލްއާސާރުގެ ކުރިމަތީގައި އޮތް ސަރަހައްދު ރަނގަޅު ގޮތުގައި ބޭނުންކުރުމަކީ ދާރުލްއާސާރަށްށާއި، މިނިސްޓްރީއަށް ވަރަށް މުހިންމު ކަމެއް ކަމަށެވެ. އަދި އެކަން އެގޮތަށް ކުރަން ބޭނުންވާ ކަމަށެވެ.

ގައުމީ ދާރުލްއާސާރުގެ ދޮރުމަތީގައި ސަތަރިއަޅައި ބަންދުކޮށްފައިވަނީ ކޮން ބައެއް ކަމަށް އެނގިވަޑައިނުގަންނަވާ ކަމަށް މިނިސްޓަރު އާދަމް ނަސީރު ވިދާޅުވެފައިވާއިރު، އެސަރަހައްދުގައި ސަތަރި އަޅައި ބަންދުކޮށްފައި ހުންނަތާ ގާތްގަނޑަކަށް ވަނީ އަހަރު ދުވަސްވެފައެވެ.