ދިވެހި ބަހުން ވާހަކަ ދެއްކެވިއިރު ވެސް ހެރިޓޭޖް މިނިސްޓްރީން ކޮށްފައިވާ މަސައްކަތްތައް ސާފެއް ނުވޭ: މެންބަރު ޒިޔާދު

ދިވެހި ބަހުން ވާހަކަ ދެއްކެވިއިރު ވެސް ހެރިޓޭޖް މިނިސްޓްރީން ކޮށްފައިވާ މަސައްކަތްތައް ސާފުނުވާ ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ބުދަ ދުވަހުގެ ރައްޔިތުން މަޖިލީހުގައި މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އާދަމް ނަސީރާ ވަނީ މެންބަރުން ސުވާލު ކުރައްވާފައެވެ. މިނިސްޓަރު ނަސީރާ ކުރެއްވި ބައެއް ސުވާލުތަކާ ދެއްވި ޖަވާބުތަކަށް އިޝާރާތް ކުރައްވައި މެންބަރު ޒިޔާދު ވިދާޅުވީ ސުވާލަށް ޖަވާބު ދެއްވުމުގައި އިހުމާލުތަކެއް އެބަހުރި ކަމަށާއި، އެމިނިސްޓްރީން ކޮށްފައިވާ މަސައްކަތްތަށް ފަހުމްނުވާ ކަމަށެވެ.

މީގެ އިތުރުން މެންބަރު ޒިޔާދު ވިދާޅުވީ މެންބަރުން ވެސް ޒިންމާދާރު ކަމާއެކު ސުވާލުކުރަންޖެހޭ ކަމަށާއި ޒިންމާާދާރު ކަމާއެކު ސުވާލު ކޮށްފިނަމަ، އެ ސުވާލަށް ސީދާ ޖަވާބު ދޭން މިނިސްޓަރަށް މަޖުބޫރުވާނެ ކަމަށެވެ.

މިއަދު ވެސް ވަޒީރަކު ވަޑައިގެންނެވި. ދިވެހިބަހުން ވާހަކަ ދެއްކިއިރު ވެސް އަޅުގަނޑަށް ފަހުމެއް ނުވި އެ މިނިސްޓްރީން ކުރެވެނީ ކޮންކަމެއްތޯ. އެހެންވީމަ މިދެންނަވަނީ އެ ޒިންމާ އަދާކުރަން މިތިބެނީ. އަޅުގަނޑުމެންނަށް ވަޒީރަށް ރީތިވާ ގޮތަށް ރައީސުލްޖުމްހޫރިއްޔާއަށް ރީތިވާ ގޮތަށް މި މަޖިލިސް މެންބަރުން ސުވާލުކުރީމަ ދެން ވަޒީރު އަނެއްކާ ނުލާހިކު ދިވެހި ބަހުން ވާހަކަ ދައްކަވާ ބޭފުޅެއް. އެހެންނަމަވެސް ސުވާލުތަކަށް ޖަވާބު ދިނުމުގައި އެބަހުރި އިހުމާލުވުންތަކެއް. އެ ޖަވާބު ނުދެވެނީ އަޅުގަނޑުމެން އެ ޒިންމާ އަދާނުކުރާތީ. ޒިންމާާދާރު ސުވާލު ކޮށްފިއްޔާ އެއަށް ޖަވާބު ދޭން ވަޒީރަށް މަޖުބޫރުވާނެ.

ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު

ބުދަ ދުވަހުގެ ރައްޔިތުން މަޖިލީހުގައި، މިނިސްޓަރާއި ވަނީ މާލޭގެ ހުކުރު މިސްކިތާއި، ކަޅުވަކަރު މިސްކިތާ ގުޅޭގޮތުން ސުވާލު ކުރައްވާފައެވެ.

ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ކުރެއްވި ފުރަތަމަ ސުވާލަކީ މާލެ ހުކުރު މިސްކިތް އާބާތުރަ ފިލުވައި ގިނަ ދުވަހަށް ރައްކާތެރިކުރުމުގެ މަސައްކަތް ކުރަމުން އައި ނަމަވެސް މި ސަރުކާރުން އައުމާއިއެކު ހުއްޓިފައިވުމާއި، މިސްކިތުގެ އަސްލަށް ބަދަލު އަންނަ ގޮތަށް އެތެރޭގައި ތަނބުތަކެއް ޖަހާފައިވުމާއި، މިސްކިތް މިހާރު ހުރީ ނުރައްކާތެރި ހާލަތެއްގައިކަމަށްވާއިރު، މި ދެންނެވި ކަންކަމަށް ހައްލެއް ލިބޭގޮތަށް މިސްކިތުގެ މަސައްކަތް އަލުން ފަށައި ނިންމޭނީ ކޮން އިރަކުންތޯއެވެ.

މިސުވާލާ ގުޅިގެން މިނިސްޓަރު އާދަމް ނަސީރު ވަނީ މިދިޔަ ސަރުކާރުގައި މާލޭގެ ހުކުރު މިސްކިތް މަރާމާތު ކުރުމަށް ކަންތައް ކޮށްފައިވާ ގޮތުން އެ މިސްކިތަށް ވަނީ ބޮޑެތި ގެއްލުންތަކެއް ލިބިފައި ކަމަށް ތުހުމަތު ކުރައްވާފައެވެ.

ދެވަނަ އަށް ކުރެއްވި ސުވާލަކީ ކަޅުވަކަރު މިސްކިތް ރާވައި އެ ސަރަހައްދު ޕާކެއްގެ ގޮތުގައި ތަރައްގީކުރުމަށް 6 މަސް ދުވަސް ހޭދަވެފައިވީ ނަމަވެސް އެ ސަރަހައްދަށް ކަޅުއޮށްފުންމީގެ ނަމޫނާ ގެނެސް މިސްކިތާއި ޕާކުގެ މަރާމާތެއް ކުރަނީކަމަށް ބުނެ އެ ސަރަހައްދު ބަންދުކޮށްފައި އޮންނަތާ 1 އަހަރަށްވުރެ ގިނަ ދުވަސްވެފައިވާތީ އަދި ކަޅުއޮށްފުންމީގެ ނަމޫނާއަކީ އަސްލު މިންތަކާ އެއްގޮތަށް ބަނދެވިފައިވާ އުުޅަނދެއްކަން ރަސްމީކޮށް އަންގައިދެއްވާފައި ނުވާތީ އެ މައުލޫމާތު ހާމަކުރުމާއެކު އެ ޕާކާއި މިސްކިތް ހުޅުވޭނީ ކޮން ތާރީޚެއްގައިތޯ އެވެ.

ޖަވާބުގައި މިނިސްޓަރު އާދަމް ނަސީރު ވިދާޅުވީ ކަޅުވަކަރު މިސްކިތް ހުންނަ ސަރަހައްދުގައި ކުރިޔަށް ގެންދަނީ ޕާކެއް މަރާމާތް ކުރުމުގެ މަސައްކަތް ނޫން ކަމަށާއި އެ ސަރަހައްދުގައި ކުރިޔަށް ދަނީ ޒަމާނީ ޑިޖިޓަލައިޒްޑް މިއުޒިޔަމެއް ތަރައްގީ ކުރުމުގެ މަސައްކަތް ކަމަށެވެ. އަދި އެތަނުގައި ޑިޖިޓަލް މިއުޒިޔަމެއް ގާއިމުކުރުމުގެ މަސައްކަތް ފެށިގެން ކުރިޔަށްދާ ކަމަށް މިނިސްޓަރު އާދަމް ނަސީރު ވިދާޅުވިއެވެ.