މަޚްލޫފް ނެތުމުން ކުޅިވަރު އާއިލާއަށް ފަޅުކަން
26 އޯގަސްޓު 2021 | ބުރާސްފަތި 13:00ކުޅިވަރުގެ ތަރައްގީއަށް މަޚްލޫފް ކޮށްދެއްވި ޚިދުމަތްތައް ފާހަގަކޮށްލެވޭ
އައިއޯއައިޖީގައި ރާއްޖޭގެ އެތުލީޓުންނަށް ތަރުހީބުދިނުމުގައި ކުޅިވަރާ ބެހޭ ވަޒީރު އަޙްމަދު މަޚްލޫފް
މި ސަރުކާރުގެ އެންމެ ހިންގުންތެރި ވަޒީރަކީ ކުޅިވަރާ ބެހޭ ވަޒީރު އަޙްމަދު މަޚްލޫފޭ ބުނުމަކުން ދޮގަކަށް ނުވާނެއެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ކެބިނެޓުގެ ވަޒީރުކަމަށް މަޚްލޫފް އައްޔަނުކުރި ދުވަހުން ފެށިގެން މިއަދާ ހަމައަށްވެސް މަޚްލޫފުގެ މަސައްކަތްތަކާ މެދު ދެބަސްވެވެން ނެތްކަން ކަށަވަރެވެ. އެކަން އެންމެ ބޮޑަށް ފާހަގަކުރަނީ ކުޅިވަރު އާއިލާއިންނެވެ. ކުޅިވަރުގެ ތަރައްގީއަށް މި ވޭތުވެދިޔަ ތިން އަހަރެއްހާ ދުވަހުގެ ތެރޭގައި މަޚްލޫފް ކޮށްދެއްވި ޚިދުމަތްތަކަކީ އަގުވަޒަން ކުރެވޭނެ ޚިދުމަތްތަކެއް ނޫނެވެ.
އެހެންނަމަވެސް ކުޅިވަރާ ބެހޭ ވުޒާރާގެ ހިންގުމާ މަޚްލޫފް މިއަދު ދުރުގައި ހުންނަން ޖެހިފައިވާއިރު، ކުޅިވަރު އާއިލާއިން މަޚްލޫފް ނެތްކަމުގެ ފަޅުކަން އިހުސާސްކުރަން މިއަދު ވަނީ ޖެހިފައެވެ.
ރާއްޖެޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ ރައީސް މުޙައްމަދު ރަނޭޝް ވިދާޅުވީ މަޚްލޫފުގެ ވަޒީރުކަމުގައި ވޮލީބޯޅަ އާއިލާއަށް އުފާވެރިކަން ގެނަސްދީފައިވާ ކަމަށާއި، އެގޮތުން ބައިނަލްއަގުވާމީ ވޮލީބޯޅަ ކޯޓެއް އަޅައިދިނުމަށް މަޚްލޫފް ނިންމެވި ކަމަށެވެ. އަދި ވިދާޅުވީ ވޮލީބޯޅަ ކުޅޭތަނެއް މިވަގުތު ނެތްކަމުގައިވީ ނަމަވެސް އުއްމީދު ގެއްލުވާ ނުލައްވާނެ ކަމަށާއި، ވަޒީރާއެކު އިތުރު މަސައްކަތްތަކެއްކޮށް، ވޮލީގެ ކުރިމަގު އުޖާލާ ކުރެވޭނެ ކަމަށް އުއްމީދު ކުރައްވާ ކަމަށެވެ.
މީގެ އިތުރުން ރަނޭ ވިދާޅުވީ މަޚްލޫފަކީ ޖެހިލުންކުޑަ ކެރޭ ބޭފުޅެއް ކަމަށެވެ. އަދި މަޚްލޫފް ވަޒީރުކަމާ ހަވާލުވުމުން އެކަމާ އުފާކުރި ކަމަށާއި، މަޚްލޫފަކީ ނަތީޖާ ނެރޭނެ ވަޒީރެއްކަން އެނގުނު ކަމަށެވެ. އަދި މަޚްލޫފަކީ ކުޅިވަރަށް ލިބުނު ވެކްސިނެއް ކަމަށާއި، މަޚްލޫފް ބަދަލިކޮށްލެވޭނެ ފެންވަރުގެ ވަޒީރަކު ފެންނަން ނެތް ކަމަށްވެސް ރަނޭ ވިދާޅުވިއެވެ.
ރަނޭގެ އިތުރުން މަޚްލޫފް ނެތުމުން އެކަމުގެ ފަޅުކަން ކުޅިވަރަށް ކުރަމުން އަންނަ ކަމަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭންވެސް ވަނީ ފާހަގަކުރައްވާފައެވެ.
ރާއްޖެ ޓީވީގެ "ކުޅިވަރު ފައިލް" ޕްރޮގްރާމުގައި ވާހަކަ ދައްކަވަމުން ސުޒޭން ބުނީ މަޚްލޫފުގެ ވާހަކައަކީ ސިޔާސީ ވާހަކައެއް ކަމަށާއި، އެކަމަކު މިއީ ދައްކަން ޖެހޭ ވާހަކައެއް ކަމަށެވެ. ސުޒޭން ބުނީ ކުޅިވަރަށް ވަރަށް ބޮޑެތި ޚިދުމަތްތަކެއް ކުރައްވަމުން އަންނަނިކޮށް މަޚްލޫފް ދެވަނަ ފަހަރަކަށް ގޭގައި މަޑުކުރަން ޖެހުމަކީ މުޅި ކުޅިވަރު އާއިލާ އެކަމާ ހިތާމަކުރަން ޖެހުނު ކަމެއް ކަމުގައެވެ.
ސުޒޭން ބުނީ ރާއްޖޭގެ ކުޅިވަރުގެ ހަޔާތުގައި މަޚްލޫފަކީ ކުޅިވަރުގެ އިންފްރާސްޓްރަކްޗާއަށް އެންމެ ބޮޑު ބަދަލެއް ގެނަސްދިން ވަޒީރު ކަމަށެވެ. އަދި އެފަދަ ވަޒީރަކު މަގާމުން ދުރުކޮށްފައި ބެހެއްޓުމަކީ މުޅި ކުޅިވަރަށް ލިބުނު ދެރައެއް ކަމަށްވެސް ސުޒޭން ބުންޏެވެ.
ވަޒީރުކަމުގައި މަޚްލޫފް ފާހަގަވެގެން ގޮސްފައިވަނީ ޖެހިލުން ކުޑަ ވަޒީރެއްގެ ގޮތުގައެވެ. ކުޅިވަރަށް ޚިދުމަތް ކުރެއްވުމުގައި ޚާއްސަކޮށް ކުޅިވަރުގެ އިންފްރާސްޓަކްޗާ ގާއިމުކުރުމުގައި ވަކި ކުޅިވަރަކަށް ބެލުމެއް ނެތި މަޚްލޫފް މަސައްކަތްކުރެއްވިކަން ރާއްޖޭގެ ކުޅިވަރު އެސޯސިއޭޝަންތަކުން ވަނީ ފާހަގަކޮށްފައެވެ. މީގެ އިތުރުން މަޚްލޫފުގެ ވަޒީރުކަމުގެ ދަށުން ރައީސް ޞާލިޙުގެ ވައުދުފުޅުތައް ފުއްދެވުމަށް ކުރެއްވި މަސައްކަތްތައް ފާހަގަކޮށްލެވެއެވެ. އެގޮތުން ރާއްޖެއިން އިންޑިއަން އޯޝަން އައިލޭންޑްސް ގޭމްސް (އައިއޯއައިޖީ) ބިޑް ކާމިޔާބުކުރުމުގައި މަޚްލޫފުގެ ދައުރު ބޮޑެވެ. މީގެ އިތުރުން ބައިނަލްއަގުވާމީ މުބާރާތްތައް ރާއްޖޭގައި ބޭއްވޭނެ ފެންވަރަށް ކުޅިވަރު ދަނޑުތައް ހެއްދެވުމަށް ކުޅިވަރާ ބެހޭ ވަޒީރުގެ ހައިސިއްޔަތުން މަޚްލޫފް ގިނަ މަސައްކަތްތަކެއް ވަނީ ކުރައްވާފައެވެ.
ކުޅިވަރު އާއިލާއިން ފާހަގަކުރާ ގޮތުގައި މަޚްލޫފް ވަރުގެ ކުޅަދާނަ، އެސޯސިއޭޝަންތަކާ ގުޅުން ބަދަހި ވަޒީރަކު ނެތެވެ. އަދި ކުޅިވަރު އާއިލާގެ އެދުމަކީ މަޚްލޫފްގެ ސަސްޕެންޝަން ވީ އެންމެ އަވަހަކަށް ފިލައި، އަލުން ކުޅިވަރަށް ޚިދުމަތްކުރެއްވުމަށް ނުކުތެވޭނެ ދުވަހެއް ފެނުމެއެވެ.
