"އަދަބުވެރިކަން ނެތުމުގެ" ސަބަބުން ދަނބިދަރިފުޅުގެ ޝާހީ ލަގަބުތައް ބުރޫނާއީގެ ރަސްގެފާނު އަތުލައްވައިފި

ބްރޫނާއީގެ ރަސްގެފާނުގެ އާއިލާގެ މެންބަރެއްގެ ކިބައިގައި ހުންނަންޖެހޭ "އަދަބުވެރިކަން ނެތުމުގެ" ސަބަބުން، އެ ގައުމުގެ ރަސްގެފާނުގެ ދަނބިދަރިފުޅުގެ ޝާހީ ލަގަބުތައް އަތުލައްވައިފި އެވެ.

ބްރޫނާއީގެ ރަސްގެފާނު ސުލްޠާން ޙަސަނުލް ބުލްކިޔާގެ ދަރިކަލުންގެ އަނބިކަނބަލުންގެ އުޅުން ހުރިގޮތުން، އެކަމަނާއަކީ ޝާހީ އާއިލާގެ މެންބަރަކަށް ވުމަށް އެކަށީގެންވާ ބޭފުޅެއް ނޫން ކަމަށް ވިދާޅުވެ، އެކަމަނާގެ ހުރިހާ ލަގަބުތަކެއް ރަސްގެފާނު ވަނީ އަތުލައްވާފަ އެވެ.

ބްރޫނާއީ ދާރުއްސަލާމްގެ އޮފީސް އޮފް ދަ ގްރޭންޑް ޗެމްބަލިންއިން މި މަހުގެ ކުރީކޮޅު ކަށަވަރުކޮށްދީފައިވާ ގޮތުގައި، ސުލްޠާން ޙަސަނުލް ބުލްކިޔާ ނެރުއްވި ގަރާރަކާ ގުޅިގެން އެ ލަގަބުތައް ވަނީ "ވަގުތުން އަމަލުކުރާ ގޮތަށް" ބާތިލުކުރައްވާފަ އެވެ.

ކުއާލަލަމްޕޫރުގައި 2025 އޮކްޓޫބަރު 26 ގައި ބޭއްވި އާސިއާން ސަމިޓުގައި ބްރޫނާއީގެ ސުލްޠާން ޙަސަނުލް ބުލްކިޔާ ބައިވެރިވެވަޑައިގަންނަވަނީ | ގެޓީ އިމޭޖަސް

އެ އޮފީހުން ނެރުނު ބަޔާނެއްގައި ބުނެފައިވަނީ، ރާބިއަތުލް އަދަވިއްޔާގެ ލަގަބުތައް އަތުލާފައިވަނީ ޝާހީ އާއިލާގެ މެންބަރެއްގެ އަނބިކަނބަލެއްގެ ކިބައިން ފެނިގެންނުވާނެ ފަދަ އުޅުމެއް އެކަމަނާގެ ކިބައިން ފެނިފައިވާތީ ކަމަށެވެ. އަދި އެކަމަނާގެ އަމަލުތަކުގެ ސަބަބުން ޝާހީ އާއިލާގެ އަބުރަށް ހުތުރުވެ، ސުލްޠާން ޙާޖީ ޙަސަނުލް ބުލްކިޔާއަށް އޮންނަންޖެހޭ އިހުތިރާމް ކުޑަވެފައިވާކަން ފާހަގަކުރެވިފައިވާ ކަމަށްވެސް އެ ބަޔާނުގައިވެ އެވެ.

އުމުރުފުޅުން 33 އަހަރުގެ ރާބިއަތުލް އަދަވިއްޔާއަކީ، ބްރޫނާއީގެ ތަޚުތަށް އިސްކުރެވޭ ތަރުތީބުގެ ހަތަރުވަނައިގައި ހުންނެވި، އުމުރުފުޅުން 43 އަހަރުގެ ޕްރިންސް އަބްދުލް މާލިކްގެ އަނބިކަނބަލުންނެވެ.

އެކަމަނާ ކުރެއްވި ކަމެއްގެ ތަފްސީލު ހާމަކުރުމެއް ނެތި، އެ ގައުމުގެ ދައުލަތުގެ މީޑިއާ ކަމަށްވާ އާރް.ޓީ.ބީ ނިއުސްއިން ރިޕޯޓުކޮށްފައިވާ ގޮތުގައި، ރާބިއަތުލް އަދަވިއްޔާގެ އަމަލުތަކުގެ ސަބަބުން ރަސްގެފާނަށް އޮންނަންޖެހޭ އިހުތިރާމް ކުޑަވެ، ޝާހީ އާއިލާގެ އަބުރަށް ވަނީ ގެއްލުން ލިބިފަ އެވެ.

އޮފީސް އޮފް ދަ ގްރޭންޑް ޗެމްބަލިންއިންވެސް އެކަމަނާގެ ފަރާތުން ފެނުނު "އެކަށީގެންނުވާ އުޅުމާ" ބެހޭ އެއްވެސް ތަފްސީލެއް ހާމަކޮށްފައެއް ނުވެ އެވެ.

މި ނިންމުމާއެކު، ރާބިއަތުލް އަދަވިއްޔާއަށް މީގެ ކުރިން އަރުވާފައިވާ "ޔަންގް އަމާތު މުލިއާ ޕެންގިރަން އަނަކް އިސްތެރީ" ގެ ލަގަބު މިހާރު ވަނީ ގެއްލިފަ އެވެ.

މިކަން ދިރާސާކުރާ ފަރާތްތަކުން ފާހަގަކުރާ ގޮތުގައި، ރަސްގެފާނު ޝާހީ އާއިލާގެ މެންބަރެއްގެ ލަގަބު އަތުލެއްވި މިއީ ފުރަތަމަ ފަހަރެއް ނޫނެވެ. މީގެ ކުރިން 2003 ވަނަ އަހަރު، އެމަނިކުފާނުގެ ދެވަނަ އަނބިކަނބަލުން މަރިޔަމް އަބްދުލް އަޒީޒް ވަރިކުރެއްވުމަށްފަހު، އެކަމަނާގެ ޝާހީ ލަގަބުތައްވެސް ވަނީ އަތުލައްވާފަ އެވެ.

ހަމައެއާއެކު، 2010 ވަނަ އަހަރު އެމަނިކުފާނުގެ ތިންވަނަ އަނބިކަނބަލުން އަޒްރިނާޒް މަޒްހަރު ޙަކީމް ވަރިކުރެއްވުމަށްފަހުވެސް ރަސްގެފާނު ވަނީ ހަމަ އެފަދައިން އަމަލުކުރައްވާފަ އެވެ.

ނަމަވެސް، ރާބިއަތުލް އަދަވިއްޔާގެ މައްސަލަ މިއާ ތަފާތެވެ. އެކަމަނާއަކީ ރަސްގެފާނުގެ ދަރިކަލުންގެ އަނބިކަނބަލުން ކަމަށްވާތީ، އެކަމަނާއަކީ އަދިވެސް ޝާހީ އާއިލާގެ މެންބަރެކެވެ. އަދި އެ ދެމަފިރިން ވަރިވިކަމުގެ އެއްވެސް ރަސްމީ އިއުލާނެއް މިހާތަނަށް ކޮށްފައެއް ނުވެ އެވެ.

ރާބިއަތުލް އަދަވިއްޔާ ޕްރިންސް އަބްދުލް މާލިކްއާ ކައިވެނި ބައްލަވައިގަތީ 2015 ވަނަ އަހަރު، ބްރޫނާއީގެ ވެރިރަށް ބަންދަރު ސެރީ ބެގަވަންގައި ހުންނަ ޝާހީ ގަނޑުވަރުގައި ބޭއްވި ކުލަގަދަ ރަސްމިއްޔާތެއްގަ އެވެ. ދިހަ ދުވަހުގެ މުއްދަތަށް ދެމިގެންދިޔަ އެ ކައިވެނީގެ ހަފުލާތަކުގައި އެތައް ހާސް މެހުމާނުންނެއް ބައިވެރިވި އެވެ.

މި ދެމަފިރިންގެ ހަތަރު ބޭފުޅުން ތިއްބަވަ އެވެ. އެއީ އުމުރުފުޅުން 10 އަހަރުގެ ޕްރިންސަސް މުތީއާ، އަށް އަހަރުގެ ޕްރިންސަސް ފާތިއްޔާ، ހަ އަހަރުގެ ޕްރިންސަސް ޚާލިޝާ އަދި 16 މަހުގެ ޕްރިންސަސް ނަބީލާ އެވެ. ރިޕޯޓުތައް ބުނާގޮތުގައި މި ކުދިންގެ ޝާހީ ލަގަބުތަކަށް އެއްވެސް ބަދަލެއް ނާދެ އެވެ.

ޕްރިންސް އަބްދުލް މާލިކަކީ ރަސްގެފާނުގެ ފުރަތަމަ އަނބިކަނބަލުން ރާނީ ސާލިހާގެ ބޭފުޅެކެވެ. އެމަނިކުފާނަކީ ތިން ކައިވެންޏަކުން ރަސްގެފާނަށް ލިބިވަޑައިގެންފައިވާ 12 ބޭފުޅުންގެ ތެރެއިން ބޭފުޅެކެވެ.

އުމުރުފުޅުން 80 އަހަރުގެ ސުލްޠާން ޙަސަނުލް ބުލްކިޔާއަކީ، ތެލުގެ މުއްސަނދިކަން ލިބިފައިވާ ކުޑަ ގައުމެއް ކަމަށްވާ ބްރޫނާއީގެ އެންމެ މަތީ ވެރިޔާ އެވެ.

މިހާރު ދުނިޔޭގައި ހުންނެވި އެންމެ ގިނަ ދުވަސްވީ ރަސްކަލަކީވެސް 1968 ވަނަ އަހަރު 29 ވަނަ ސުލްޠާނުގެ ގޮތުގައި ތަޚުތަށް އިސްވެވަޑައިގެންނެވި ޙަސަނުލް ބުލްކިޔާ އެވެ. އެމަނިކުފާނު ދިރިއުޅުއްވަނީ 1,788 ކޮޓަރި ހިމެނޭ، ދުނިޔޭގެ އެންމެ ބޮޑު ގަނޑުވަރު ކަމަށްވާ "އިސްތާނާ ނޫރުލް އީމާން" ގަ އެވެ.

އެމަނިކުފާނުގެ ވެރިކަމުގައި ބްރޫނާއީ ވަނީ ދުނިޔޭގެ އެންމެ މުއްސަނދި ގައުމުތަކުގެ ތެރޭގައި ހިމެނި، އެ ގައުމުގެ އިގްތިސާދު ވަރުގަދަކޮށްފަ އެވެ.