ޗުމްޕު، އިއްބެ އަދި ލިލީ ގައުމީ ސްކޮޑަށް

ކުރިއަށް އޮތް ސާފް ޗެމްޕިއަންޝިޕް ފުޓްބޯޅަ މުބާރާތަށް އެކުލަވާލި ގައުމީ ފުޓްބޯޅަ ޓީމުގެ ޕްރިލިމިނަރީ ސްކޮޑުގައި ޔުނައިޓެޑް ވިކްޓަރީ (ޔޫވީ) ގެ ފޯވާޑް އަލީ ހައިޝަމް (ޗުމްޕު) އާއި، މާޒިޔާ ސްޕޯޓްސް އެންޑް ރެކްރިއޭޝަނުގެ މިޑްފީލްޑަރު އިބްރާހީމް ވަހީދު ހަސަން (އިއްބެ) އަދި އެ ޓީމުގެ ޑިފެންޑަރު އަޙްމަދު އަބްދުﷲ (ލިލީ) ހިމަނައިފިއެވެ.

 އަންނަ އޮކްޓޯބަރު މަހު ބޭއްވުމަށް ހަމަޖެހިފައިވާ ސާފް ޗެމްޕިއަންޝިޕަށް ގައުމީ ޓީމުން މި މަހުގެ 23 ވަނަ ދުވަހު އެކުލަވާލީ 31 ކުޅުންތެރިންގެ ޕްރިލިމިނަރީ ސްކޮޑެކެވެ. އެ ސްކޮޑުން މި ތިން ކުޅުންތެރިންނަށް ފުރުސަތުދީފައި ނުވާއިރު، މިހާރު ވަނީ ޕްރިލިމިނަރީ ސްކޮޑް 34 ކުޅުންތެރިންނަށް އިތުރުކޮށް، އެ ކުޅުންތެރިންނަށް ފުރުސަތުދީފައެވެ.

ގައުމީ ޓީމުގެ ސްކޮޑުގައި ޗުމްޕު ހިމެނުނުއިރު، އޭނާ އެންމެ ފުރަތަމަ ގައުމީ ސްކޮޑަށް ނަގާފައިވަނީ މިދިޔަ ޖޫން މަހު އޮތް ފީފާ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނަށެވެ. އަދި ގައުމީ ޖާޒީގައި ޗުމްޕު ކުޅުނު ފުރަތަމަ މެޗަކީ ކޮލިފައިންގައި ޗައިނާ އަތުން ރާއްޖެ ބަލިވި މެޗެވެ. އެ މެޗުގެ ފުރަތަމަ އެގާރައިގައި ހިމެނިގެން ޗުމްޕު ކުޅުނުއިރު، ފިލިޕީންސާ އެއްވަރުކުރި މެޗުގައިވެސް އޭނާ ވަނީ ފުރަތަމަ އެގާރައިގައި ހިމެނިގެން ކުޅެފައެވެ.

ދެން ސްކޮޑުގައި ހިމެނުނު އިއްބެވެސް ވަނީ ވޯލްޑް ކަޕާއި އޭއެފްސީ އޭޝިއަން ކަޕުގެ ޖޮއިންޓް ކޮލިފިކޭޝަނަށް ނެގި ސްކޮޑުގައި ހިމަނާފައެވެ. އެކަމަކު އަމިއްލަ ސަބަބަކާ ހުރެ އިއްބެ ވަނީ އެ ފަހަރު ގައުމީ ސްކޮޑުން ވަކިވެފައެވެ. މީގެ އިތުރުން ގައުމީ ސްކޮޑުން ލިލީއަށް ފުރުސަތު ލިބުނުއިރު، އޭނާއަށް އެންމެ ފަހުން ގައުމީ ޓީމުން ފުރުސަތު ލިބުނީ ކޯޗުގެ މަގާމުގައި ޑަރެން ސްޓެވާޓް ހުރިއިރުއެވެ. އެގޮތުން އޭނާ ވަނީ 2017 ވަނަ އަހަރު ފަހުކޮޅާ ހަމައަށް ގައުމީ ޓީމަށް ކުޅެފައެވެ. 

ބުރާސްފަތި ދުވަހު ގައުމީ ފުޓްބޯޅަ ދަނޑުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ގައުމީ ޓީމުގެ ކޯޗު އަލީ ސުޒޭން ބުނީ ފުރަތަމަ ނެގީ 30 ކުޅުންތެރިންގެ ސްކޮޑެއް ކަމަށާއި، އެކަމަކު މާޒިޔާ ސަމޫހް އަލީ (ސަމުއްޓެ) އަނިޔާގައި އުޅޭތީ މުޙައްމަދު އަޖުފާން ލައިގެން 31 ކުޅުންތެރިންގެ ސްކޮޑެއް އެކުލަވާލީ ކަމަށެވެ. ނަމަވެސް އައު ތިން ކުޅުންތެރިން ސްކޮޑުގައި ހިމެނުމަށް ނިންމީ ކުލަބުތަކުގެ ހުރިހާ ކޯޗުންނާ މަޝްވަރާކުރުމަށްފަހު ކަމަށްވެސް ސުޒޭން ބުންޏެވެ.

ކުރިއަށް އޮތް ސާފް ޗެމްޕިއަންޝިޕަށް ގައުމީ ޓީމުން ޕްރިލިމިނަރީ ސްކޮޑެއް އެކުލަވާލިއިރު، މި ފަހަރުގެ މުބާރާތާ ރާއްޖެ ކުރިމަތިލާނީ މުޅިން ދިވެހި ކޯޗުންގެ ޓީމަކާއެކުއެވެ. މި ފަހަރުގެ މުބާރާތް އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށް ރާއްޖޭގައި ބާއްވާއިރު، އެ މުބާރާތަށް ތައްޔާރުވުމުގެ ގޮތުން އަންނަ ސެޕްޓެމްބަރު މަހުގެ 10 ވަނަ ދުވަހު ގައުމީ ޓީމު ގަތަރުގައި ކޭމްޕުކުރާނެއެވެ.

މާޒިޔާ: ހުސެއިން ޝަރީފް (ހުސެން)، މޫސާ ޔާމީން (ޔާމްބެ)، އިބްރާހިމް އައިސަމް، އިބްރާހިމް މަހުދީ ހުސެއިން (ފޭދޫ އިއްބެ)، މުޙައްމަދު އިރުފާން (އިރޭ)، ސަމޫހު އަލީ (ސަމުއްޓެ)، މުޙައްމަދު އުމެއިރު، އަސަދުﷲ އަބްދުﷲ (އަސަކޮ)، ހުސެއިން ނިހާން (ނިހާޓް)، ހަމްޒާ މުޙައްމަދު (ހަމްޕު)، ނާއިޒު ހަސަން (ދާދު)، އިބްރާހީމް ވަހީދު ހަސަން (އިއްބެ)، އަޙްމަދު އަބްދުﷲ (ލިލީ)

އީގަލްސް: ހަސަން ރާއިފް އަޙްމަދު (ހަންނަ)، އިމްރާން ނަޝީދު (އިންމަ)، އަޙްމަދު ނޫމާން (ހެލްމެޓް)، ހުސެއިން ސިފާއު ޔޫސުފް (ކުރޯ)، މުޙައްމަދު ނާއިމް، ހައިޝަމް ހަސަން (ބިޑި)، އަސްހަދު އަލީ (އަޑުބަރޭ)

ވެލެންސިއާ: މުޙައްމަދު ޝަފީއު (ޗެކް)، މުޙައްމަދު ފައިސަލް، އަލީ ފާސިރު (ސެންޓޭ)، އަލީ އަޝްފާގު (ދަގަނޑޭ)، އަކުރަމް އަބްދުލް ޣަނީ (އަކޫ)

ޔުނައިޓެޑް ވިކްޓަރީ (ޔޫވީ): އަލީ ނާޖިހު، މުޙައްމަދު އާރިފް (ބަކާ)، އިސްމާޢީލް އީސަ (މެސީ)، އަލީ ހައިޝަމް (ޗުމްޕު)

ގްރީން ސްޓްރީޓްސް: މުޙައްމަދު ސާއިފް، ހަސަން ނަޒީމް (ޗޯޓު)

ޓީސީ: މުޙައްމަދު އަޖުފާން، އަލީ ޝާމިސް (ތޮއްޕޭ)

ދަ ގްރާންޑޭ: ޔަސްފާދު ހަބީބު (މުލަކޭ)